APUNG ANYIM 30

1Loto Rachelüh Yakob hau methso tsaktso tsüchet- kiuphe, Rachel apa nou Lea tü niovei kiakü iula, küta Yakob tü ngiom, “Ngü hau methso akiu tsüdekünai to ngü eane.”

2Yakobüh Rachel tü mongmatkü ngiom, “Ngo Goa noithang loau tsüshio. Ni methso chettsün ainou lolaokü taiutsün apa noin.”

3Rachelüh ngiom, “Nungko jü sua menyiuthso tsamki Bilha noin; apako lü em, nungaito apaüh ngü hao methso tsak kiu-e. Nungti ngo apa tsangkü nyiu tsak iula-e.” 4Nungtiphe Rachelüh Bilha apa tsammongpo hau kiu, küta Yakob apako em. 5Bilha pem tsükengkü iulakü Yakob hau melothso tsak chetkiu. 6Rachelüh ngiom, “Goa nou ngü tü thaisan kiu-iu. Apaüh jü misao lulaküta ngü hao melothso tsak kiu-iu.” Nungtiphe apaüh methso nou Dan ta niankiu. 7Bilha loüh pem tsükengkü iulakü Yakob hau melothso tsak chetkiu. 8Rachelüh ngiom, “Ngo jü nou ko thsüokü langekü shin, lüko ngü shiolom,” nungtiphe apaüh methso nou Napthali ta niankiu.

9Tilai Leaüh apa methso chettsün laolowaniu ta ngesan, apaüh apa tsamki sua menyiuthso Zilpa Yakob tsammongnyiu theao kiu. 10Nungaih Zilpaüh Yakob hau melothso tsak chetkiu. 11Leaüh ngiom, “Ngo aküo mei-iu,” nungtiphe apaüh methso nou Gad ta niankiu. 12Zilpaüh Yakob hau loüh melothso tsak chet kiushi, 13küta Leaüh ngiom, “Ngo titi amonglingtsün tsak! Loto nyiuhaiüh ngütü amongling ta jone” nungtiphe apaüh methso nou Asher ta niankiu.

14Jihloh taoko nai Reuben liauai khu naiuso alo aiutsün shepai eiu eplo, küta apaüh apa nyiu Lea dongai kankü shin. Rachelüh Lea tü ngiom, “Tsüojinyangkü ngü hao athsoüh kan nou aloaiutsün shepai eiu intso akiuha.”

15Leaüh thalakü ngiom, “Ni jü tsammongpo aplotsün nungüh tsüsaiu süne? Loüh ni jüthso ün alo aiutsün shepai eiu lüko kanlükhun shiao koweji.”

Rachelüh ngiom, “Ni athso ün alo aiutsün shepai eiu ngü hau kiu naito, ni Yakob ko lüsoh kamhaao shio-e.”

16Tilai Yakob asham liutsa ainou tsamai yasaom, Lea apako pheteao khuküta ngiom, “Ni lüsoh ngüko kamhaao noin, tiautenai ngo athaiutha jüthso ün alo aiutsün shepai eiu nou tuh waniu.” Nungtiphe apa nungsoh nai Lea ko emsaikü noiküla.

17Goa nou Lea misao thalakü apa pem tsükengkü iula küta Yakob hau melothso pungo nou chetkiu. 18Leaüh ngiom, “Goa nou ngü hau paopei nou kium, tiautenai ngo jü sua menyiuthso nou jü tsammongpo hau kium,” nungtiphe apaüh methso nou Isakar ta niankiu. 19Lea loüh pem tsükengkü iulakü Yakob hau melothso luok nou chetkiu. 20Apaüh ngiom, “Goa nou ngü hau paopei amei tsak kiu-iu. Loto jü tsammongpo ngüko noi-e, tiautenai ngo apa hao thsohai apem luok chetkium,” nungtiphe apaüh methso nou Zebu- lun ta niankiu. 21Nungphiai apaüh menyiuthso tsak chetkiu, küta apa nian Dina ta niankiu.

22Goa nou Rachel yangsan, Apaüh apa misao thalakü apa thaiutha methso chettao ayam sopkiu. 23Rachel pem tsükengkü iula naiuso apaüh melothso tsak chetkiu. Rachelüh ngiom, “Goa nou ngü hao melothso tsak kiutsün tsangkü jü amiam kanlükhuniu. 24Apaou nou ngü hao loüh melothso tsak kiushiaoya,” nungtiphe apaüh melothso nou Yosep ta niankiu.

Yakob Laban ko Nan-eji

25Yosep chetküta Yakobüh Laban tü ngiom, “Ngo jü eh goumchi ai khuau thaiutha ahong. 26Ngü hao jü tsammongnyiuso naiuso methsosoüh athaiutha chhikiukü chensan nou akiu küta ngo khu-e. Ngo ni titi meikü yathsüokiu nung ni ngekü noin.”

27Labanüh apa tü ngiom, Ngü nung ngioko; “Ni shioko Apaou nou ngü ouk kiu ta ngü thalouküta ngeji. 28Ni amai nou angio, küta ngo nungso ni hao thamane.”

29Yakobüh thalakü ngiom, “Ngo athaiutha titi chhikiu naiuso jü apaotsang khemko aonnemokso titi shingkü iula nung ni ngeji. 30Ngo moshikün khako ni intso taiutsün piakü iula-iu, naiuso ngo tilüsongai khukü noiküla, Apaou nou ni ouk kiu. Lo yaküto ngü meshen ün alesan nai yamao atao nou shisao-iu.”

31Nungaih Labanüh Yakob tü “Ngo ni hao ti kiu-e?” ta sangh,

Yakobüh thalakü ngiom, “Ngo amai ti tsüaiu. Ni nung ayangkiu tsün ko mongchioha naito, ngo aonnemok hoi tsülaokü paotsange. 32Ngü lonyi aonnemok hoi ta thapkü khu-e, küta aleng anyaching nouso apem lou-e naiuso alengsat potsün wonthso nouso lou-e. Nungso jü mephaiu mai noi-e. 33Ashiao taoko ngo niko ngiotsüo noiküla ta ni tsangsheikü epsane. Ni tilai ngü hau kiutsün amei nou tü shingluao shi-e, ngo won ajantso alengsat tsüpokü tsüdekünai, onnemokthso ajantso anyaching leng tsüdekü epsan nai, nung akauloutsün ta ngela-e.”

34Labanüh thalakü ngiom, “Mongchioji, samüh ni thatsantsünli chhiko.” 35Lüko nung ajekhaiu ko nai Labanüh wonpong si asang tisübaoso ta alengsat pokü noiküla, naiuso athaiu leng satkü nouso onnemok aleng anyaching nouso lowankiu. Apaüh meshen thsoso nungso tü paotsangao taiukiu, 36küta apa Yakob ainou meshen onnemokso hakü ajekhaiu samnyi tsakeitsün yam alaiuteng nai khuwan. Yakobüh Laban ün amao apoitaiu nouso tü paotsang.

37Naiuso Yakobüh poplar paikia nouso, almon paikia nouso naiuso plan paikia nouso loküta akhun nouso jeian, nungai paikia nouso aleng athaiu jije iula. 38Apaüh nung paikia akhun jeian nouso onnemok hoi khako ngüso khiam shiutsün chiu nai taiukiu, tiautenai thainian nouso khiam shiu shinai apong si asang apun yam akome tao hahakü shi. 39Nungtiphe tilai won nouso paikia nouso khako apun hakü iula-e wonthso nouso alengsat henkü popokü naiuso tükhakkhakkü popokü punsan.

40Yakobüh won nouso ainou onnemok mothikü janthat küta Laban ün onnemok hoi dongko kha phoklekü taiu. Nungti apaüh meshen won hoi ta yachu loküta Laban wonhoi ainou pungekü taiuwan.

41Tilai won akong nouso kome-e, Yakobüh paikia nouso ngüso khiam shiutsün chiu nai ngüso khako taiu, nungtiphe ngüso paikia nouso khako apun hakü iula-e. 42Lüko apaüh thainian atsaosilaohoi nouso khako to tsütaiukiu. Laban haoson atsaosilao thainian nouso iula, naiuso Yakobüh akong nouso lou. 43Nungli Yakob thatü memei iula; apaüh won hoi, tsamki hoi, ut hoi, naiuso gado hoi piakü taiuküla.

Currently Selected:

APUNG ANYIM 30: KHIABSI

Highlight

Copy