APUNG ANYIM 29

Yakob Laban Tsamai Shisaoji

1Yakob apa yam ajepek goumchi dongai tsülaokü khu. 2Alekta apa temkhao tsak lemkü onnemok ahoi süme sainoitsün nai shin. Nung temkhao ainou onnemok hoi nouso hau khaiushen, nung temkhao kuk nai lung asong tsak noiküla. 3Tilai onnemok hoi nou nungai kamshi-e, onnemok jimtsün- soüh lung nou lekkan küta onnemok nouso hau khiam shenkü noiküla. Khiam shen küta ngüsoüh nung temkhao lung nou kapjeikü taiushi.

4Yakobüh onnemok jimtsünso tü sangkü ngiom, “Jü haiso, asam tiai nou shin?” Haran ainou shin ta ngüsoüh thalan.

5Apaüh sangshin, “asamüh Nahor thso Laban ngejimo?”

Ah, samüh ngen, ta ngüsoüh thalakü ngiom.

6Apa meikü noimo? ta apaüh sangshi.

Ngüsoüh thalakü ngiom, “Apa meikü noin. Athaplu, nungko apa thso Rachel apa onnemok ko hakü shiji.”

7Yakobüh ngiom, “Lo tao anyiwem noin, nungtiphe onnemok hoi niakamao atao mosao, asamüh ngüso hau khiam shen küta thsan tsamhe-iao laokü tsünialükhun küto?”

8Ngüsoüh thalakü ngiom, “Onnemok hoi nungai moshikün lektso naiuso lung nou molekkankün lektso samüh nung chhiao tsüshio; nung lekkan nailu samüh onnemok hoitü khiam thsaluttao shio-e.”

9Tilai Yakob ngüsoko chitekü noiküla, nung taoko Rachel onnemok hoi hakü shisao. 10Tilai Yakobüh Rachel apa po ehen nou Laban ün onnemok kankü ep, apa temkhao nai khuküta lung nou lekkan, küta onnemok tü khiam thsalut. 11Nungai apaüh Rachel tü son nai chep küta amongling nou sang sungkü shap. 12Yakobüh apa hau chitekü ngiom, “Ngo Rebeka thso apo ün tsammong noin.”

Nungaih Rachelüh apa po hau chiteao kopkü khu; 13naiuso tilai apaüh apa le Yakob thaiutha lula, apa kopkü khukü ta piplo, küta son nai chep, naiuso apa tsamai nialokü shi. Tilai Yakobüh Laban hau athawaotsün alum chite, 14Labanüh ngiom, “Ah, atsüoting ni jü nyih naiuso jü she noin.” Yakob nungko alei tsak thumkü noian.

Yakobüh Rachel si Lea ne thaiutha Laban Yathsüoji

15Labanüh Yakob tü ngiom, “Ni jü tsammong nou shioko amai tsülokü jü thaiutha chhisiya tsüchhiao noin. Ni alei chai titithatso aiuji?” 16Laban thso menyiuthso nime; Nioyamchong nou Lea, naiuso niophi nou Rachel ta niankü noiküla. 17Lea nung niovei nou outsükongkü, lüko Rachel to akamshikü naiuso meso meikü noiküla.

18Yakob Rachel ko tsüojinekü iulakü, apaüh Laban tü ngiom, “Ni ngü hau Rachel tsamsigoh yangi naito, ngü ni pon chinyat yathsüokü chhikiu-e.”

19Labanüh thalakü ngiom, “Ngo apa amaohai hau kiuwan liko to ni hau kiu-e, ngü ko nungko anoiha.” 20Yakobüh Rachel tsamsigoh yangao thaiutha pon chinyat yathsüokiu, naiuso atao nung chikü ajekhaiu thsaothsaokü lilu apaüh yang, tiautenai apaüh Rachel tsüojin.

21Nungaih Yakobüh Laban tü ngiom, “Atao nou sao-iu: ngü athso tsamsigoh yange.” 22Nungtiphe Labanüh tsamsigoh shan sümai nai khaiunia apem jon. 23Lüko nungsoh nai, Rachel liko apaüh Yakob dongai Lea nialokü shi, küta Yakob apako emsai. 24Labanüh apa thso Lea tsamkiao apa ün sua menyiu Zilpa kiu. 25Nungthan nyap ah nou mongekün tao naita Yakobüh nung Lea ta tsangsheisan. Apa Laban dongai khuküta ngiom, “Ni ngütü nung chhi tiauta chhin? Ngo Rachel jonao ni yathsüokü shin. Ni tiau ngo kausaiat?”

26Labanüh thalakü ngiom, “Sam saisile nung: Niochong menyiuthso nou khako niophi menyiuthso chong tsamsigoh yangao ayam tsünoi. Tsamsigoh shantsün sümai anojet ayanan-i 27ni loüh pon chinyat jü thaiutha chhisiya yathsüokiushi naito, ngü nihau Rachel kiu-e.”

28Yakobüh mongchio, naiuso tilai tsamsigoh shan sümai anojet nou yanlükhun, Labanüh apa thso Yakob hau tsammongnyiu theau kium. 29Labanüh apa thso Rachel tsamkiao apa ün sua menyiuthso Bilha kiu. 30Yakob Rachel ko lüko tsüojinekü em, naiuso apaüh Lea ko nai Rachel tü tekkü tsüojin. Apaüh loüh Laban pon chinyat yathsüokiu shi.

Yakob tü Chetsinyimtsün Thsoso

31Tilai Apaou nou Yakob atsüojin Lea ko nai Rachel tü phopkü epsan, Apaüh Lea tü methso chetsinyimao ayam sopkiu, lüko Rachel to lon noian. 32Lea pem tsükengkü iula, küta melothso tsak chetkiu. Leaüh ngiom, “Apaou nou ngü angjatsün epiu, loto jü tsammongpoüh ngü tsüojin-e” nungtiphe apaüh methso nou Reuben ta niankiu. 33Loüh Lea pem tsükengkü iulashikü melothso tsak chetlutkiu. Apaüh ngiom, “Apaou nou nung melothso lüko kiu-iu, tiautenai apaüh ngo meikü tsütsüojin ta lula;” nungtiphe apaüh methso nou Simeon ta niankiu. 34Loüh Lea pem tsükengkü iulashikü melothso tsak chetlutshin, Apaüh ngiom, “Loto jü tsammongpo ngü tü thatü shimkü noi-e, tiautenai ngü apa hao melothso süme chetkiu-iu,” nungtiphe apaüh methso nou Levi ta niankiu. 35Loüh Lea pem tsükengkü iulashikü melothso tsak chetkiu, apaüh ngiom, “Nung taokoto ngü Apaou lomsan-e;” nungtiphe nung methso nou Yihuda ta niankiu. Loto apa methso chetkiutsün laowan.

Currently Selected:

APUNG ANYIM 29: KHIABSI

Highlight

Copy