APUNG ANYIM 24
24
Isak hau Tsammongnyiu Tsak
1Loto Abraham thatü sonankü iula, naiuso apa chhisiya alum nai Apaou nou apa ouk kiu. 2Apaüh taiutsün alum khaiuko paotsangtsün asheting tsamki tsak tü apaüh ngiom, “Apha jü siokha jetko ataiu küta ngiomong shinge tsak ashan. 3Ni jüthso thaiutha tsammongnyiu tsak Kanan nai noitsün khaiunia ong ainou tsüshinge ta Aün naiuso Goum Goa, Apaou nianko ngiomong shinge tsak shanao aiuji. 4Ni ngo chettsün goumchi nai laokü khuküta jü thso Isak thaiutha tsammongnyiu tsak jü tsammongso ong ainou kankü ashi.”
5Nungaih tsamki nou sangshikü ngiom, “Nung menyiuthso nou apa tsam leanküta ngüko nung goumchi nai tsüyaha-e tünai, Ngo athso ni shitsün goumchi nai laokü honge süne?”
6Abrahamüh thalakü ngiom, “Ni jü thso nungai laokü tsühonge ta lüyang! 7Apaou, Aün Goa nou ngo jüpo tsam ainou jonsan, naiuso jü tsammongso goumchi ainou niasan, küta apaüh jü thsaosithsoso hau nung goumchi kiu-e ta mongkü thalou. Apaüh meshen hongthon akhako honge, nungai ni jü thso thaiutha tsammongnyiu tsak epao shio-e. 8Nung menyiuthso nou niko aikü yahaao tsümongchiokü naito, ni nung athalu-etsün ainou sokkiu. Lüko ni jü thso ti thaiutha ko lünou nungai laokü tsünialükhunela.” 9Nungtiphe tsamki nou apa pha Abraham siolak jet nai taiukü, meshen Apaou, naiuso Abrahamüh ti saokü noiküla nung chhiao ngiomong shinge nou shan.
10Tsamki sau Abraham jengtsaiu khaiuko Apaou noiküla, apa ut che louküta ajenapki Mesopotamia noknio tiai Nahor kihküla nungai khu. 11Tilai apaüh nungai sao-iu, apaüh noknio bechi nai ut nouso asingkau nou thaothiokü noi-i. Menyiuhoi khiam khaiu shitsün atao nung anyiwem yankü noiküla. 12Apaüh misao sao, “Apaou, jü Apaou Abraham Goa, ngü hao lonyi ashio nou a-epi, naiuso jü Apaou tü ni thaloutsün ataiukiu. 13Nung noknio ainou mesohoi khiam khaiu shiao noitsün temkhao dongko ngo nungai noin. 14Ngo ngüso ongko tsak tü ngio-e, ‘Tsüojinyangkü akhiam meng nyapkü ale-i, küta ngü hau ashiu au akiu.’ Lüshiu, küta ngo a-utso hao lüko khiam kankü shi-e ta apaüh ngio naito, atsamki Isak thaiutha ni chosantsün apa tsak anoi-i.Nung thawao naito, jü Apaou tü athalou nou taim ta ngo nge-e.”
15Apa misao mokhemloukün khako, Rebeka apa sangdong khaiu nai khiam meng kankü shisao. Apa Abraham nio Nahor naiuso tsam- mongnyiu nou Milka ngüso Bethuel thso menyiuthso noiküla. 16Nung mesothso nou athap ao thatü meikü asangting tsak noiküla. Apa temkhao nai saokü khiam meng meankü khaiulokü laokü shin. 17Tsamki nou apako pheteao jingkü khuküta ngiom, “tsüojinyangkü akhiam meng ainou ngü hao ashiuau akiu.”
18Apaüh thalakü ngiom, “Lüshiu, Apaou,” naiuso shakta apaüh meshen sangdong khaiu ainou nyapkü semlo küta apaüh shiu. 19Tilai tsamki nou khiam shiukheman, apaüh ngiom, “Ngo loüh a utso hau khiam kankü shi-e küta ngüsoüh aiutsünli apem ngüsoüh lüshiu.” 20Apaüh khiam meng nouso thainian nouso hau shenkü shakta lokeng küta apa utso apem hau moshen-khemkün lektso temkhao nai khiam piakü khaiusanao khaolaokü khu. 21Apaou nou apa chhi nai ashio nou kiujimota tsamki nou menyiuthso nou ta nyankü thapkü taiu.
22Tilai apaüh chhi nou khem, tsamki nou chai apia mai lakkeng daokhiap nou apa ngan nai lolut naiuso apa sang nai lakkeng lak nime lakthio kiu. 23Apaüh sangkü ngiom, “Tsüojinyangkü apo sau ngü hau achite. Apa tsamai jü khaiuniaso naiuso ngo sotsüo aaluao tsampai noimo?”
24Apaüh thalakü ngiom, “Jü po Nahor si Milka ne thso nou Bethuel noin.” 25“Nungai sam tsamai tsokap si jangchih saiukü noin, naiuso nungai asam thaiutha anoiau athang noin.”
26Nungai tsamki nou singkaongam langthiokü Apaou nou tü amkham. 27Apaüh ngiom, “Apaou lülom, jü Apaou Abraham Goa, sauüh jü Apaou tü apa athalo monglamkü taiukü shin. Apaou nou ngü jü Apaou tsammongso dongai saitha yam niakü shin.”
28Nung menyiuthso nou apa nyiu tsamai kopkü khukü nung ngiolat apem chiten. 29Rebeka dei Laban ta niankü tsak noiküla, apa kengchiai temkhao dongai Abraham ün tsamkiso noitsün nai kopkü khu. 30Labanüh apa nio ngan nai lakkeng daokhiap naiuso sang nai lakkeng lak nouso ep, naiuso apaüh tsamki nou apa tü ti ngiom, nung lula. Apa Abraham tsamki sau temkhao shimkü apa ut so dongko tsakü noiküla khukü ta, 31ngiom, “Ngü ko hakü tsamai ashi. Ni Apaou nou ouk kiutsün khaiunia tsak noin. Tiauta ni nungai kengchiai tsakü noin? Ngo jütsamai athaiutha tsampai tsak khemkü taium, naiuso nungai a utso thaiutha lüko athang noin.”
32Nungtiphe tsamki nou apa tsamai khu, naiuso Labanüh ut nouso thsa yaman kiu küta ngüso hau tsokap naiuso achih nou wao. Nungai apaüh Abraham ün tsamki naiuso apa khaiuniaso hok tsawanao khiam kankü shin, 33tsamki nou ngiom, “Ngo ti ngioau noin nung mongiokün lektso to ngo tsühe-e.”
Labanüh ngiom, “Lüngio.”
34Apaüh yalou, “Ngo Abraham tsamki noin.” 35Apaou nou jü Apaou phopkü ouk kiu-iu, naiuso apa memei khaiunia tsak shankiu-iu. Apaüh apa hau onnemok hoi naiuso won hoi, naiuso tsam thainian nouso, tangkason, lakkeng, melo naiuso menyiu, ut hoi naiuso gado hoi, ouk kium. 36Sara, jü Apaou tsammong- nyiu, tilai apa sonan apaüh melothso tsak chetkium, naiuso jü Apaou üh apa hau meshenüh taiutsün alum kium. 37Jü Apaou nou ngü hao ngiomong shingekü aikü athalu-e tsak angio angao thoilut. Apaüh ngiom, “Jü thso thaiutha tsammong- nyiu Kanan goumchi ainou menyiuhoi ong ainou to lacho. 38Nungliko to, Jü po ün khaiuniaso dongai, jü tsammongso dongai khukü apa thaiutha tsammongnyiu tsak lücho. 39Naiuso ngo jü Apaou tü sangkü ngiom, ‘Meso nou ngü ko aikü tsüshi hanai titi the-e?’ 40Apaüh thalakü ngiom, ‘Apaou, sübao ngo asai angio angji, apaüh meshen honghoi niko hakü honge küta nihao ashio nou kiu-e. Ni jüthso thaiutha tsammongnyiu tsak jü khaiunia ongko naiuso jü po tsammongso ainou eppe. 41Ni ngiomong shinge ainou thakhuau yam tsaklu noin. Ni jü tsammongso dongai khunaito, naiuso ngüsoüh angio tsüangkü naito ni nung ainou sok-iu.’
42“Tilai ngo temkhao dongai shin, ngo nungti misao saokü noiküla: ‘Apaou, jü Apaou, Abraham Goa, atsüojinyangko ngo ti chhiji nungko ashio nou akiu. 43Ngo nungai temkhao nai noin; tilai meso tsak khiam khaiuloau shi-e, ngo apa khiam meng ainou ngü hao ashiuau akiu ta sao-e. 44Apa mongchio küta jü ut so thaiutha lüko khiam khaiushen ha naito, jü Apaou ün thso thaiutha tsammongnyiu tsak nou ni chosantsün nung noi-e sao.’ 45Ngo nyankü misao loutsün mothunkün khako, Rebeka apa sangdong khaiu nai khiam meng kankü shiküta khiam khaiu au temkhao nai sao. Ngo apa tü ngiom, ‘tsüojinyangkü ngü hao khiam ashiuau akiu.’ 46Apaüh shakta apa khiam meng sangdong khaiu ainou kaukü napküta ngiom, ‘Lüshiu, küta ngo loüh a ut so hao lüko khaiushene.’ Nungtiphe ngü shiu, naiuso apaüh ut hoi hao lüko khaiushen. 47Ngo apa tü sangkü ngiom, ‘Apo sau?’ Naiuso apaüh thalakü ngiom, ‘Jü po Nahor si Milka ne thso Bethuel noin.’ Nungai ngo lakkeng khiapthso nou apa ngan nai lolut, naiuso lakkeng lak nou apa sang nai ngiolut. 48Ngo kaukü napkü Apaou tü amkham. Jü Apaou Abraham Goa, sauüh ngü jü Apaou ün thso thaiutha tsammongnyiu epao apa tsammongso dongai saitha nialut ngo Apaou nian lomji. 49Naiuso lo asamüh jü Apaou tü tsüojinkü, naiuso atsüoting kankei-e tünaito, ngü tü angio sai: ngo uai tsüdekünai tsatai phokleshi-e.” 50Laban si Bethuel neüh thalakü ngiom, “Nung chhisiya Apaou ainou shiphe, nung athalou tsak loau sam chhi tsüde. 51Rebeka nungai noin, apa niakü lükhu, Apaou apa pemüh ngiotaiu nouli, apa ni nou Apaou ün thso tsammongnyiu lü-iula.” 52Tilai Abraham tsamki nou nung lula, apa kaukü napküta Apaou tü amkham. 53Nungai apaüh neshe naiuso tangkason, naiuso lakkeng chaiou nou losan küta nungso Rebeka hau kiu. Loüh apaüh adei si anio nouso hao lüko paopei apiamai nou kiu.
54Nungai Abraham ün tsamki naiuso apako ha nouso khaiuniahoi nou heshiu, naiuso asoh nou nungko aalokü wan. Tilai ngüso ahom chunge, “Ngü jü Apaou dongai laokü khu.”
55Lüko Rebeka deisiniosoüh ngiom, “Menyiu nou sam ko anojet tsak tsüdekünai che nyi anoiha-i, nungphiai apa khuau shio-e.” 56Lüko apaüh ngiom, “Sam lanoi-ishi. Apaou nou jü chhi ashiolotsün tsak kiu-iu, ngü jü Apaou dongai laokü khuko.”
57Ngüsoüh thalakü ngiom, “Samüh menyiuthso nou jonko küta apaüh lüko ti ngio-e ta taiuko.” 58Nungtiphe ngüsoüh Rebeka jon küta sangkü ngiom, “Ni nung khaiunia ko hakü khuau aiujimo?” “Aiuji” ta apaüh thalan.
59Nungtiphe ngüsoüh Rebeka naiuso apa akeng tsammongso tsamki Abraham ün tsamki naiuso apa khaiuniaso ko khuha-i. 60Naiuso ngüsoüh Rebeka hau nung ouk ngioyak nouko kium.
“Nyiuhai, ni hengsiheng nyiu tsak lüthe!
Athsaosithsosoüh ngüso ehoi noknioso lüshiolo!”
61Nungaih Rebeka naiuso meso nouso Abraham ün tsamki ko ut nouso chiai noikü khuau khemlou, küta ngüso chikü tsalokü khu.
62Isak shikü, “Ngü eptsün Aa Tsak ün Temkhao” ta ngiotsün liutsa nai taiukü noiküla, naiuso apa Kanan ajepekki goumchi nai kihküla. 63Apa asham beta eiu nai tsakeikü khu, nungai ut nouso shitsün ep, 64Tilai Rebekaüh Isak ep, apa ut chiai nou saom 65küta Abraham ün tsamki tü sangkü ngiom, “Nung eiu nai sam dongai shikü tsakeitsün khaiunia nou sau?” “Apa jü Apaou” ta tsamki nou thalakü ngiom. Nungai apaüh apa kha sang nai khitsün ne nou lopok.
66Tsamki nou Isak hau apa chhisiya alum chiten. 67Nungaih Isaküh apa nyiu Sara kihtsün nejenkhio nai Rebeka nialoukü nap, naiuso apa meshen tsammongnyiu ao iula. Isaküh Rebeka tsüojin, naiuso apa nyiu mowantsün ainou aalu ep.
Currently Selected:
APUNG ANYIM 24: KHIABSI
Highlight
Share
Copy
Want to have your highlights saved across all your devices? Sign up or sign in
Khiamnuingan Naga C.L. Bible - ASIO THSAMLAI
Copyright © 2005 by The Bible Society of India
Used by permission. All rights reserved worldwide.
