APUNG ANYIM 23
23
Sara Ean: küta Abrahamüh apa Khananao Goh tsak Tuh
1Sara aakihlaiu pon 127 kih. 2Apa Kanan goumchi Hebron nai ean, naiuso apa eantsün shioko Abraham mongsaiukü noiküla.
3Abrahamüh apa tsammongnyiu mea letaiukü, Het hai dongai khu, küta ngiom. 4“Ngo nungai asam ongko gohmao khaiunia tsak kihakü noin, ngo jü tsammongnyiu khananao goh intso ajankiu.”
5Ngüsoüh thalakü ngiom, 6“Sam tü anglu, Apaou, Samüh nitü oukong noitsün ahei tsak ta thapji, sam etam ameiting nai atsammongnyiu lükhanan. Ni apa khananao, sam sau lünou nihau etam tsak kiuao monglingkü noi-e.”
7Nungaih Abrahamüh ngüso khako kaukü napküta ngiom, 8“Asamüh ngü hau jü tsammongnyiu nungai khananiao mongchio naito, Zoar thso Efron tü, 9Makpela Lungken, sübao apa gohthun shimkü noin nung ajankiu ta asangkiu. Lo asam khako, nung gohmai thomkü lokü ngühau ajankiu ta asangkiu, nungaito ngo nung etam gohthang ao theau shio-e.”
10Efron pem lüko nung noknio bekhan dongko Het hai akamshihoi ongko moknoihakü noiküla, apaüh khaiunia pungkü nou lulakü thalakü ngiom, 11“Anglu, Apaou, ngü nihau gohthang apem naiuso nungko hakü Lungken nou kiu-e. Nungko jükhaiuniaso khako, ni atsammong- nyiu khananao ngo nung gohthang nou kiu-e.”
12Abrahamüh Het hai khako kauthio küta 13khaiunia pungkü nou lulaao lümeikü Efron tü ngiom, “Ngo ni tü sangji, tsüojinyangkü anglu, Ngo gohthang apem tuh-e, Amai nou alo, küta ngo jü tsammongnyiu nungai khanane.”
14Efronüh thalakü ngiom, 15“Apaou, goh nou tangkason tsom püle mailu noin, je jetko nung thaiutha ti? Atsammongnyiu nungko lükhanan.” 16Abrahamüh mongchio küta Efron khaiunia hoiüh lulakü ngiotsün chai mai nou chaile hai tsoithat ko wekü tangkason tsom püle nou thatkiu.
17Nungti thekü Mamre tsamei tü ajepek nai noitsün Makpela nai Efron goh Abraham ün jengtsaiu hao iula. Nung goh, Lungken, goh tü suntsün pai nouso athun saokü Abraham ün iula. 18Het hai apem sauhai nung akamshi nai noiküla nungsoüh nung Abraham ün jengtsaiu ta mitha kiu.
19Nungaih Abrahamüh apa tsammongnyiu Sara Kanan goumchi Lungken nai khanan. 20Nungtiphe goh naiuso Lungken sübao Het hai ün noiküla, nung Abraham jengtsaiu etam goh tsak iula.
Currently Selected:
APUNG ANYIM 23: KHIABSI
Highlight
Share
Copy
Want to have your highlights saved across all your devices? Sign up or sign in
Khiamnuingan Naga C.L. Bible - ASIO THSAMLAI
Copyright © 2005 by The Bible Society of India
Used by permission. All rights reserved worldwide.
