Zakari 9
9
Zizman lo bann Nasyon Vwazen
1En mesaz sorti kot Senyer:
Parol SENYER kont rezyon Hadrak pou reste lo Damas.
Annefe, parey bann tribi Izrael, limanite i pour SENYER.
2Hamat osi, ki pros avek Hadrak,
Tir ek Sidon avek tou son lasazes.
3Tir in konstri en miray fortifikasyon.
In anmas en ta larzan,
parey lapousyer
e lor parey labou dan semen.
4Me aprezan, SENYER pou pran
tou sa ki i annan.
I pou zet son larises dan lanmer;
lavil pou ganny devore par dife.
5Ler Askelonn pou war sa,
i pou per.
Gaza osi pou tranble dan lafreyer;
Ekronn osi, akoz i pa ganny sipor ki i pe espere.
Lerwa dan Gaza pou ganny touye.
Personn pa pou vin reste Askelonn.
6En pep melanze pou enstal li dan Asdod.
Mon pou detri lorgey bann Filisten.
7Mon pou tir disan dan son labous
e restan manze degoutan dan son ledan.
Alor, li osi, i pou fer parti
sa restan pep nou Bondye;
i pou annan son plas dan tribi Zida.
Zabitan Ekronn pou vin parey bann Zebizit.
8Mon pou kanp a kote mon lakaz koman en gardyen,
pour ki personn pa ale vini.
Okenn opreser pa pou pas kot li
akoz aprezan, mon pe vey avek mon prop lizye.
Prosen Lerwa
9Fiy Siyon! Danse avek lazwa.
Fiy Zerizalenm! Kriy byen for!
Ou lerwa pe vin kot ou!
I pe vin an triyonf e viktorye;
i pe vini koman en dimoun senp,
lo en bourik, en pti bourik,
piti en femel bourik.
10I pou detri kales lager dan Efraim
e seval lager dan Zerizalenm.
Bann fles lager pou ganny detri
e i pou proklanm lape
pour bann nasyon.
Son pouvwar pou al
depi en kote lanmer ziska lot,
depi larivyer Efrat
ziska dan bout later.
Liberasyon Bann Kaptif
11Ou osi, akoz lalyans avek ou ki mon'n sele par disan,
mon pou liber ou bann prizonnyen
ki dan lafos kot napa delo.
12Prizonnyen ki annan ankor lespwar!
Retourn dan ou fortifikasyon.
Ozordi mon deklare:
Mon pou double ou rekonpans.
13Zida ki pou redi mon lark;
Efraim ki pou tir mon fles.
Mon pou eksit bann zanfan Siyon
kont bann zanfan ki reste Lagres.
Mon pou fer ou vin parey lepe en vayan gerye.
14Apre sa, SENYER pou aparet par lao zot
e son fles pou sorti parey zekler.
Senyer BONDYE pou soufle tronpet.
I pou avanse dan tanpet sorti dan Sid.
15SENYER liniver pou protez zot.
Zot ava detri e kraz bann ros ki servi dan fles.
Zot ava bwar zot disan konmsi diven.
Zot ava plen parey lakoup,
e kouver bann kwen lotel.
16Sa zour, SENYER zot Bondye pou sov son pep,
akoz zot fer parti son troupo.
Parey bann bizou dan en kouronn,
zot ava briye lo sa later.
17Zot pou vreman ere!
Zot pou vreman zoli!
Dible ava donn lafors bann zennzan
e diven nouvo bann zenn fiy.
Currently Selected:
Zakari 9: BSK
Highlight
Share
Copy
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.
