Zakari 10
10
Senyer I Promet Delivrans
1Demann SENYER fer lapli tonbe
dan sezon prentan.
SENYER ki provok loraz,
ki donn ou lapli annabondans
e i pou fer pouse zerb partou.
2Annefe, zot bann pti stati in koz mansonz;
bann deviner in ganny fo vizyon.
Zot bann rev ki zot rakonte, pa realize.
Zot bann konsolasyon pa vo nanryen.
Pour sa rezon, lepep i mars san direksyon parey bann mouton.
Zot soufer akoz zot napa berze.
3Mon byen ankoler kont bann berze etranze,
ki pretann diriz mon pep.
Mon pou pini zot.
Annefe, mwan SENYER liniver,
mon pou pran swen mon troupo, pep Zida,
ki'n vin son meyer seval dan lager.
4Ros prensipal pou sorti dan Zida;
solid koman pike latant,
for koman lark lager.
5Ansanm, zot pou parey bann konbatan dan lager.
Lo semen, zot pou kraz lennmi dan labou;
zot pou konbat,
akoz SENYER pou avek zot
e zot pou imilye bann kavalye.
6Mon pou donn pep Zida
ki'n plis kouraz
e mon pou sov pep Izrael.
Mon pou fer zot retournen,
akoz mon annan konpasyon pour zot.
Zot ava konmsi zanmen mon'n rezet zot.
Mwan menm SENYER zot Bondye
e mon pou egzos zot.
7Apre sa, bann zabitan Efraim pou vin parey bann vayan gerye.
Zot leker pou dan lazwa
parey kan ou'n bwar diven.
Zot bann zanfan pou kontan
kan zot ava war sa;
zot leker pou dan lazwa akoz SENYER.
8Mon pou donn zot sinyal pour rasanble zot,
akoz mon'n sov zot.
Zot popilasyon pou osi nonbre
ki zot ti ete avan.
9Mon ti'n dispers zot parmi bann nasyon,
me menm dan bann pei etranze,
zot pou mazin mwan.
Zot pou fer zanfan
e zot pou retournen.
10Mon pou fer zot sorti Lezip
e retourn kot zot;
mon pou rasanble zot depi Asiri.
Mon pou fer zot vin dan pei Galaad ek Liban,
ziska ki pou nepli annan okenn plas.
11Zot pou travers lanmer Lezip;
pou nepli annan gro laroul.
Larivyer Nil pou sek ziska dan son profonder.
Asiri pou ganny imilye;
Lezip ki pwisan,
pou perdi son pouvwar.
12Zot pou met zot lafors dan SENYER
e zot pou mars anba son non.
SENYER ki deklare.
Currently Selected:
Zakari 10: BSK
Highlight
Share
Copy
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.
