Zakari 14
14
Zerizalenm ek Lezot Nasyon
1Sa zour ki pour SENYER pe vini,
kan bann depouy lager
pou ganny partaze parmi zot.
2Mon pe rasanble tou bann nasyon pour atak Zerizalenm.
Lavil pou ganny kaptire, bann lakaz met anba lao, e bann fanm pou ganny vyole.
Lanmwatye bann zabitan Zerizalenm
pou ganny deporte;
me sa lot lanmwatye
ava kapab reste dan lavil.
3Alor, SENYER pou sorti
e konbat sa bann nasyon,
parey i fer sak fwa i al lager.
4Sa zour, i pou poz son lipye
lo Montanny Zolivye
ki lo kote Les Zerizalenm.
Montanny Zolivye pou fann an de
e form en gran vale dan direksyon Les-Was.
Lanmwatye montanny pou rekil dan Nor
e lot lanmwatye dan Sid.
5Alor, zot pou sove
an pasan par vale montanny SENYER,
akoz vale sa bann montanny pou al ziska Asal.
Zot pou taye parey ler zot ti fer pour sov tranblemandter
dan letan Ozyas, lerwa Zida.
Apre sa, SENYER mon Bondye pou arive
avek tou son bann lanz ki servi li.
6Sa zour, lalimyer pa pou neseser.
I pou nepli fer fre;
pa pou annan laglas.
7Sa zour ki zis SENYER i konnen,
pa pou annan ni lizour, ni lannwit
e kan lannwit pou tonbe,
i pou reste kler.
8Sa zour, delo pir pou sorti dan Zerizalenm;
lanmwatye pou koul lo kote Les,
lot lanmwatye pou koul lo kote Was.
Sa pou kontinyen pandan lete koman liver.
9Alor, SENYER ava vin lerwa partou lo later.
Sa zour, zis SENYER ki pou ganny adore koman Bondye.
10Pei antye pou vin en laplenn,
depi Geba ziska Rimonn ki sitye dan Sid avek Zerizalenm.
Me Zerizalenm pou reste kot i ete lo oter,
depi Laport Benzamen kot vye laport ti ete,
ziska laport Kwen,
e depi Latour Hananeel,
ziska bann basen lerwa
kot i kraz rezen pour fer diven.
11Dimoun pou vin reste la,
akoz zanmen ankor,
Zerizalenm pou ganny detri.
Bann zabitan pou viv an sekirite.
12La maler ki SENYER pou anvoy
lo tou bann pep
ki'n lager kont Zerizalenm:
Zot lapo pou pouri
pandan ki zot ankor debout;
zot lizye pou pouri dan son orbit
e zot lalang pou pouri dan zot labous.
13Sa zour, SENYER pou anvoy en gran lafreyer lo zot.
Sakenn pou anponny son kanmarad
e zot ava lager ant zot.
14Menm Zida pou lager dan Zerizalenm.
Alor, zot pou pran
tou larises bann nasyon dan zalantour:
Lor, larzan, lenz an kantite.
15En fleo parey pou tap bann seval,
mile, samo, bourik
e tou bann zannimo ki pou dan zot bann kan.
16Alor, dimoun ki ti'n vin fer lager kont Zerizalenm
e ki pa'n ganny touye,
pou monte toulezan.
Zot pou vin ador lerwa,
SENYER liniver e selebre lafet bann Payot.
17Sa fanmir ki pa mont Zerizalenm
pour ador lerwa, pa pou ganny lapli.
18Si bann fanmir Ezipsyen pa monte,
e pa prezant zot,
alor fleo ki SENYER
in frap bann nasyon ki pa monte pour selebre lafet Payot
pour tonm lo zot.
19Sa i ava pinisyon Lezip
e pinisyon tou bann nasyon
ki pa monte pour selebre lafet Payot.
20Sa zour, zot ava ekri lo laklos bann seval:
Konsakre pour SENYER.
Bann marmit ki servi dan tanp SENYER,
pou osi sakre ki bann bol
ki servi devan lotel.
21Tou bann marmit ki annan dan Zerizalenm e dan Zida
ava ganny konsakre pour SENYER liniver.
Konmsa, tou dimoun ki vin ofer sakrifis,
ava servi zot pour bwi lavyann pour sakrifis.
Sa zour, pou nepli annan marsan dan tanp SENYER liniver.
Currently Selected:
Zakari 14: BSK
Highlight
Share
Copy
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.
