Zakari 13
13
1Sa zour, en sours pou ouver pour tribi David e pour bann zabitan Zerizalenm. I pou pirifye zot pese ek zot bann lespri enpir.
Idolatri ek Fo Profet Pou Disparet
2La sa ki SENYER liniver i deklare:
Mon pou debaras pei avek non bann zidol
e personn pa pou mazin zot ankor.
Mon pou osi debaras pei avek bann profet
ek zot lanvi enpir.
3Si zanmen okenn profet i aparet ankor,
zot papa ek zot manman ki ti fer zot, pou dir zot:
Zot pa pou viv, akoz zot koz lalang lo non SENYER.
Alor, zot papa e zot manman pou touy zot, pandan ki zot profetize.
4Sa zour, tou bann profet pou kanmi
kan zot ava profetiz lo zot bann vizyon.
Zot pa pou met en lenz profet pour zot tronp dimoun,
5me sakenn zot pou dir:
Mon pa en profet, mon en fermye;
mon ti menm annan later depi dan mon lazenes.
6Si nenport ki dimoun i demann zot:
Kote ou'n ganny sa bann blesir ki lo ou ledo?
Zot pou reponn:
Mon ti ganny blese
dan lakaz mon bann met.
Lalyans I Ganny Renouvle
7La sa ki SENYER liniver i deklare:
Lepe! Leve kont mon berze,
kont mon zanmi pros.
Atak berze pour dispers bann mouton;
mon lanmen pou atak bann ki pti.
8La sa ki SENYER i deklare:
Alor, dan pei antye,
de tyer bann zabitan pou mor,
e en tyer pou ganny sove.
9Mon pou zet sa dernyen tyer dan dife.
Mon pou fer li fonn parey ou fer fonn larzan.
Mon pou teste li parey ou teste lor.
I pou envok mon non e mon pou egzos li.
Mon pou dir: Ou menm mon pep!
Zot ava reponn:
SENYER ki nou Bondye!
Currently Selected:
Zakari 13: BSK
Highlight
Share
Copy
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.
