Zakari 11
11
Bann Gran Pei I Ganny Detri
1Liban! Ouver ou bann laport,
pour ki dife i devor ou bann pye sed.
2Bann pye sipre i plere,
akoz bann pye sed in tonbe,
akoz bann zoli pye dibwa in ganny detri.
3Ekout bann berze ki pe plennyen,
akoz zot laglwar in disparet.
Ekout bann lyon ki pe kriye,
akoz lafore dan bor larivyer Zourden in ganny detri.
De Kalite Berze
4La sa ki SENYER mon Bondye i deklare: Vey lo troupo ki pe al ganny anmennen labatwar. 5Dimoun ki aste zot, i touy zot, san ganny pini. Dimoun ki vann zot, zot dir: Loue SENYER, akoz mon'n vin ris. Zot prop berze napa okenn pitye pour zot.
6La sa ki SENYER i deklare:
Mon pou nepli annan pitye pour bann zabitan later.
Mon pou fer sakenn zot tonm dan lanmen son vwazen
e sakenn zot dan lanmen son lerwa.
Bann lerwa pou devaste later
e mon pa pou delivre personn dan zot lanmen.
7Alor, mon ti vey lo mouton bann marsan. Mon ti'n vin berze sa troupo ki'n ganny kondannen pour labatwar. Mon ti pran de baton; mon ti nonm enn Faver, lot Linite e mon ti pran swen bann mouton.
8Apre zis en mwan, mon ti sas sa trwa berze. Apre, mon ti perdi pasyans avek bann mouton. Zot osi, zot ti deteste mwan.
9Alor mon ti deklare: Mon pou nepli ou berze. Sa enn ki pou mor, les li mor! Sa enn ki pou disparet, les li disparet! Les bann sirvivan devor kanmarad!
10Mon ti pran mon baton Faver e mon ti kas li. Konmsa, mon ti kas lalyans ki mon ti'n fer avek tou bann pep.
11Sa zour, sa lalyans ti ganny anile e bann marsan troupo ki ti pe obzerv mwan, ti konnen ki SENYER ti pe koz atraver mwan.
12Alor, mon ti dir zot: Si i fer zot plezir, donn mwan mon lapey; si zot pa oule, garde. Alor, zot ti donn mwan 30 pyes larzan pour mon lapey.
13La sa ki SENYER ti dir mwan: Met sa larzan, dan trezor. Sa i en zoli pri, ki montre ki valer mon annan pour zot.
Alor, mon ti pran sa 30 pyes larzan e mon ti zet dan trezor, dan tanp SENYER.
14Apre sa, pou kas relasyon lafanmir ant Zida ek Izrael, mon ti kas mon dezyenm baton: Linite.
15La sa ki SENYER ti dir mwan:
Aprezan, fer krwar ou en berze ki bet!
16Annefe, mon pe al swazir dan pei,
en berze ki pa pran swen bann mouton ki pe mor,
oubyen al rod sa enn ki'n perdi.
I pa pou pran swen sa enn ki'n ganny blese,
oubyen angres sa enn ki an bonn sante.
Me, i pou devor sa bann ki byen gra
e i pou fann zot sabo.
17Maler lo sa fo berze,
ki abandonn son troupo!
Mon demann lepep koup son lebra
e krev son lizye kote drwat!
Currently Selected:
Zakari 11: BSK
Highlight
Share
Copy
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.
