Romen 8

Lavi avek Lespri Bondye

1Aprezan, i nepli annan okenn kondannasyon pour sa bann ki ini avek Zezi-Kri. 2Annefe, Lalwa Lespri ki donn lavi par Zezi-Kri, in rann mwan lib anver lalwa pese ek lanmor. 3Bondye in fer sa ki Lalwa Moiz pa ti kapab, akoz febles natir imen ti rann lalwa enpwisan. Bondye in anvoy son prop Garson dan en natir parey natir pese. I'n kondann pese dan natir imen. 4I'n fer sa pour satisfer bann egzizans Lalwa dan nou ki nepli viv dapre nou prop natir, me dapre Lespri.

5Annefe, bann ki viv dapre zot prop natir, zot ganny kontrole par sa ki zot natir i demann zot. Me bann ki viv dapre Lespri, zot ganny kontrole par sa ki Lespri i demande. 6Kan nou dezir i ganny kontrole par natir imen, i anmenn lanmor. Me kan nou dezir i ganny kontrole par Lespri, i anmenn lavi ek lape. 7Si en dimoun i les li ganny kontrole par son natir imen, i vin lennmi Bondye. Annefe, i pa soumet li avek Lalwa Bondye e i menm enkapab fer li. 8Sa enn ki anba kontrol son prop natir, pa kapab fer plezir Bondye.

9Kanta zot, zot pa viv anba kontrol natir imen. Zot viv anba kontrol Lespri, si vreman Lespri Bondye i reste dan zot. Sa enn ki napa Lespri Kris, pa pour Kris. 10Si Kris i dan zot, zot lekor pou kanmenm mor akoz pese. Me Lespri li, i lavi dan zot, akoz zot in ganny zistifye devan Bondye. 11Si Lespri Bondye ki'n resisit Kris i reste dan zot, alor, sa enn ki'n resisit Kris, pou donn osi lavi zot lekor mortel par son Lespri ki dan zot.

12Alor, mon bann frer ek ser! Nou annan en det, non pa anver nou prop natir, pour viv dapre son bann dezir. 13Annefe, si zot viv dapre zot prop natir, zot pou mor. Me si par Lespri, zot touy bann aksyon zot natir egois, zot ava viv. 14Tou dimoun ki les li ganny gide par Lespri Bondye, zot bann zanfan Bondye. 15Annefe, zot pa'n resevwar en Lespri ki rann zot lesklav, ki ranpli zot ankor avek lafreyer. Me zot in resevwar en Lespri ki fer zot vin zanfan Bondye e ki permet nou kriye: Aba! Mon Papa#8.15 War Mrk 14.36.!

16Lespri Bondye li menm i rann temwannyaz ki nou zanfan Bondye. 17E si nou son bann zanfan, alor, nou osi son bann zeritye: Zeritye Bondye, e zeritye ansanm avek Kris, akoz si nou soufer avek li, nou pou osi ganny glorifye avek li.

Laglwar dan Lavenir

18Mon annan sa lasirans ki sa ki nou pe soufer konmela, pa kapab ganny konpare avek laglwar ki Bondye pou revel nou dan lavenir. 19Lakreasyon antye ki Bondye in kree pe esper avek enpasyans sa moman kan Bondye pou revele lekel son bann zanfan. 20Annefe, lakreasyon antye in tonm anba pouvwar bann lafors san valer. Pa par son prop swa, me akoz Bondye ki'n fer li soumet. Sepandan, i annan ankor en lespwar: 21Sa kreasyon pou ganny libere en zour kont pouvwar destrikter ki pe gard li dan lesklavaz, pour li partisip dan laliberte ek laglwar bann zanfan Bondye.

22Nou konnen, annefe, ki ziska aprezan, lakreasyon antye pe soupire e soufer parey en fanm ki pe akouse. 23Me pa zis lakreasyon: Nou ki'n deza resevwar Lespri koman premye par bann don Bondye, nou pe soupire dan nou menm, an atandan ki Bondye i pran nou koman son bann zanfan e akord nou en delivrans total. 24I vre: Nou'n ganny sove, me dan lesperans selman. Si nou war sa ki nou pe espere, sa i nepli lesperans. Annefe, personn pa esper en keksoz ki deza la. 25Me si nou esper sa ki nou pa ankor war, nou esper avek pasyans.

26Pareyman, Lespri i ed nou dan tou nou febles. Annefe, nou pa konn priye koman fodre. Me Lespri li menm i pled pour nou avek bann siplikasyon ki nou pa kapab eksprim an parol. 27Alor, Bondye ki war dan leker, i konpran sa ki Lespri i oule demande. Annefe, Lespri i priy an faver bann krwayan, parey Bondye i dezire.

28Nou konnen ki Bondye i fer tou pour byennet tou bann ki kontan li, pour tou sa bann ki i'n swazir dapre son plan. 29Annefe, tou bann ki Bondye in swazir davans, in osi deside davans pour rann zot parey son Garson. Konmsa, son Garson i vin lene parmi en kantite frer. 30Bann ki Bondye in destinen davans, i'n osi apel zot. Bann ki i'n apele, i'n osi rann zot zis devan li. Bann ki i'n zistifye, i'n osi fer zot partisip dan son mazeste.

Lanmour Bondye

31Ki nou kapab dir ankor? Si Bondye i pour nou, lekel ki pou kapab kont nou? 32I pa'n eparny son prop Garson, me i'n livre li pour nou tou. Alor, avek son Garson, i pou donn nou osi tou. 33Lekel ki pou akiz sa bann ki Bondye in swazir? Personn, akoz Bondye ki deklar zot non koupab. 34Alor, lekel ki kapab kondann zot? Personn, akoz Zezi-Kri li menm ki'n mor. Me anplis, i'n resisite e i lo kote drwat Bondye e i pe entersed pour nou. 35Lekel ki pou separ nou avek lanmour Kris? Ladetres, langwas, persekisyon, lafen, lanmizer, danze, lanmor? 36Lekritir i deklare:

Akoz ou, nou pe ganny met anmor tou le zour.

Nou ganny trete parey mouton

ki pe al ganny egorze labatwar#8.36 Ps 44.23..

37Pourtan, dan tousala, nou sorti gran venker, gras a sa enn ki'n kontan nou. 38Mon annan sa lasirans ki ni lanmor, ni lavi, ni bann lanz, ni bann pouvwar, ni letan prezan, ni lavenir, 39ni okenn pwisans, ni lao dan oter oubyen anba dan profonder, ni okenn keksoz dan lakreasyon, pa pou kapab separ nou avek lanmour Bondye dan Zezi-Kri, nou Senyer.

Currently Selected:

Romen 8: BSK

Highlight

Copy