Romen 6

Mor akoz Pese, Vivan avek Kris

1Ki nou pou dir alor? Eski nou pou kontinyen viv dan pese pour ki lagras Bondye i ogmante? 2Pa ditou! Pour sa ki konsern pese, nou'n mor. Ki mannyer nou kapab kontinyen viv dan pese? 3Eski zot pa konnen ki nou tou ki'n ganny batize pour vin ini avek Zezi-Kri, nou'n ganny batize asosye dan son lanmor? 4Alor, par nou batenm, nou'n ganny antere avek li dan son lanmor, pour ki, parey Kris in resisite par mazeste pwisan son Papa, nou osi, nou ava ganny en nouvo lavi.

5Annefe, si nou'n ini avek li dan lanmor ki parey pour li, nou pou osi ini avek li dan rezireksyon ki parey pou li.

6Konpran byen sa: Sa ki nou ti ete avan, in ganny krisifye avek Kris. Konmsa, nou lekor pese i ganny detri e nou nepli lesklav pese. 7Annefe, en dimoun ki'n mor, i'n ganny libere anba pouvwar pese. 8Me si nou'n mor avek Kris, nou krwar ki nou pou osi viv avek li. 9Annefe, nou konnen ki depi ki Kris in resisite, i pa pou zanmen mor ankor: Lanmor nepli annan okenn pouvwar lo li.

10Kris in mor. Son lanmor in separ li totalman avek pese enn fwa pour tou. Me aprezan ki i vivan, i viv pour Bondye. 11Se pour sa rezon ki zot osi, zot devre konsider zot koman mor pour pese, me vivan pour Bondye, ini avek Zezi-Kri.

12Alor, pa les pese pran kontrol lo zot lekor mortel, pour fer zot obei son bann dezir. 13Pa les pese servi bann diferan parti zot lekor koman bann lenstriman pour fer sa ki mal. O kontrer, met zot lekor dan servis Bondye, koman dimoun ki ti'n mor e ki'n resisite. Met zot lekor antye dan servis Bondye pour akonpli sa ki zis. 14Annefe, pese pou nepli annan okenn kontrol lo zot, akoz zot pou nepli viv anba Lalwa, me anba lagras Bondye.

Dan Servis Lazistis

15Alor, eski nou ava fer pese akoz nou pa anba Lalwa, me anba lagras Bondye? Pa ditou! 16Zot konn tre byen: Si zot met zot anba servis en dimoun pour obeir li, zot vin lesklav sa met ki zot obeir. E sa met i swa pese ki anmenn lanmor, swa lobeisans ki anmenn lazistis.

17Me annou remersye Bondye: Avan, zot ti lesklav pese. Aprezan, zot obei avek tou zot leker, sa lansennyman ki zot in resevwar. 18Zot in ganny libere avek pese e zot in met zot o servis sa ki zis.

19Mon pe servi sa fason koze imen, akoz febles zot natir imen. Annefe, otrefwa, parey bann lesklav, zot ti'n soumet zot lekor avek toudsort pratik enpir e zot in viv en lavi dezord ki ti fer zot revolte kont Bondye. Me aprezan, soumet zot lekor konpletman koman bann lesklav, pour zot servi sa enn ki zis e pour anmenn en lavi ki fer plezir Bondye.

20Kan zot ti pe viv koman lesklav pese, zot pa ti enterese avek lazistis. 21Me ki benefis zot ti gannyen par sa bann aksyon? Aprezan, sa bann aksyon i fer zot onte, akoz son rezilta, se lanmor. 22Me aprezan zot in ganny libere avek pese, e zot in vin dan servis Bondye. Zot pe prodwi fri en lavi sen e son rekonpans final se lavi eternel. 23Annefe, lapey pour pese i lanmor, me don gratwi ki Bondye i donnen, i lavi eternel dan linyon avek Zezi-Kri, nou Senyer.

Currently Selected:

Romen 6: BSK

Highlight

Copy