Romen 4

Legzanp Abrahanm Koman Krwayan

1Alor, ki nou pou dir lo Abrahanm nou zanset? Kwa ki in gannyen koman en zonm? 2Si Abrahanm ti'n ganny zistifye akoz son bann aksyon, i ti ava'n kapab vant son lekor. Me i pa kapab vant son lekor devan Bondye. 3Annefe, Lekritir i deklare:

Abrahanm ti krwar dan Bondye

e akoz son lafwa, i'n ganny aksepte koman en zis#4.3 Zen 15.6..

4En dimoun ki travay, lapey ki i gannyen i pa kont koman en kado, me en keksoz ki i merite. 5Me kan en dimoun ki pa'n travay, i zis krwar ki Bondye i akey anbyen en peser, son lafwa ki fer li ganny konsidere koman en dimoun zis. 6Konmsa menm ki David i koz lo boner en dimoun ki Bondye i konsider koman zis, san pran an konsiderasyon son bann aksyon:

7Byennere sa bann

ki zot fot in ganny pardonnen,

e ki zot pese in ganny efase.

8Byennere sa enn ki Senyer

pa pran kont son pese#4.8 Ps 32.1-2..

9Eski sa benediksyon i egziste zis pour bann sirkonsi, oubyen osi pour bann ki pa'n ganny sirkonsi? Annefe, Abrahanm in ganny konsidere koman zis akoz son lafwa. 10Kan eski sa ti arive? Avan oubyen apre ki Abrahanm ti ganny sirkonsi? Pa apre, me avan ki i ti ganny sirkonsi. 11I ti ganny sirkonsi plitar koman en siny#4.11 War Zen 17.9-14.. Sa ti en mark ki montre ki akoz son lafwa, Bondye ti konsider li koman en zis, alor ki i pa ti'n ankor ganny sirkonsi. Konmsa, Abrahanm in vin papa tou sa bann ki krwar dan Bondye menm san ganny sirkonsi, me ki Bondye osi i konsider koman bann zis.

12Abrahanm i osi papa bann sirkonsi, savedir bann ki pa'n zis ganny sirkonsi, me ki mars dapre legzanp lafwa nou papa Abrahanm avan ki i ti ganny sirkonsi.

Promes Bondye par Lafwa

13Bondye ti promet Abrahanm ek son desandan ki zot pou erit later#4.13 War Zen 12.2-3; 17.4-6; 22.15-18., pa akoz Abrahanm ti obei Lalwa, me akoz i ti ganny konsidere koman zis, par son lafwa. 14Si zis sa bann ki obei Lalwa ki pou erit sa bann byen, alor lafwa i initil e promes Bondye napa valer. 15Annefe, Lalwa i provok lakoler Bondye. Me la kot napa Lalwa, napa osi dezobeisans Lalwa.

16Pour sa rezon, sa promes i depann lo lafwa, pour ki i vin en don gratwi ki Bondye i fer, e pour ki i valab pour tou bann desandan Abrahanm. Non pa zis pour bann ki obei Lalwa, me pour tou dimoun ki krwar, parey Abrahanm ti krwar. Annefe, Abrahanm i papa nou tou. 17Parey i'n ekri dan Lekritir:

Mon'n fer ou vin papa en kantite nasyon#4.17 Zen 17.5..

Abrahanm i nou papa devan Bondye, dan ki i'n krwar. Dan sa Bondye ki rann lavi sa bann ki'n mor e ki donn legzistans sa ki pa ti egziste. 18Menm kan ti sanble nepli annan lespwar, Abrahanm ti krwar e i ti espere. Alor, i ti vin papa en kantite nasyon, parey Bondye ti'n dir li:

Ou bann desandan pou nonbre#4.18 Zen 15.5..

19I ti annan apepre 100 an, me son lafwa ti reste solid, menm kan i ti konsider son lekor ki ti'n preski deza mor, e son fanm Sara, ki pa ti kapab fer zanfan#4.19 War Zen 17.1,15-22.. 20I pa ti perdi konfyans ni dout promes Bondye. O kontrer, son lafwa ti vin pli for e i ti loue Bondye. 21I ti sir ki Bondye i annan pouvwar pour akonpli son promes.

22Pour sa rezon osi, akoz son lafwa, Bondye ti konsider Abrahanm koman zis. 23Sa bann parol: Bondye ti konsider Abrahanm koman zis, pa ti ganny ekri zis pour Abrahanm. 24In ganny ekri osi pour nou, ki ganny konsidere koman zis, nou ki krwar dan sa enn ki'n resisit Zezi, nou Senyer. 25Zezi ti ganny livre anmor akoz nou bann pese. Me Bondye i'n resisit li pour rann nou zis devan li#4.25 War Eza 53.4-6..

Currently Selected:

Romen 4: BSK

Highlight

Copy