Romen 13
13
Relasyon avek Lotorite
1Tou dimoun i devre soumet li anba bann lotorite ki'n ganny etabli. Annefe, napa lotorite ki pa sorti kot Bondye, e bann lotorite ki egziste in ganny etabli par li.
2Alor, sa enn ki opoz lotorite, i opoz lord ki'n ganny etabli par Bondye, e ensi i pe atir kondannasyon lo li menm.
3Annefe, pa dimoun ki fer dibyen, ki devre per bann ziz, me plito bann ki fer sa ki mal. Ou pa oule ganny problenm avek lotorite? Alor, fer sa ki byen e ou ava ganny felisite. 4Annefe, lotorite i dan servis Bondye pour li fer ou dibyen. Me si o kontrer ou fer sa ki mal, la alor, ou devre per, akoz pa pour nanryen ki i annan pouvwar pou pini. Lotorite i la koman en serviter Bondye pour egzekit lakoler Bondye lo tou malfeter. 5Alor, i bon ki ou soumet ou avek lotorite, pa zis pour evit lakoler Bondye me akoz i en devwar de konsyans.
6Pour sa menm rezon ki zot pey taks, akoz lotorite ki ranmas taks, pe travay pour Bondye. 7Rann tou dimoun sa ki zot merite: Ki swa taks, ki swa taks lo reveni; ki swa respe, ki swa loner, anver sa enn ki fodre.
Lanmour pour Lezot
8Pa dwa personn, apar lanmour anver kanmarad; sa i sel det ki ou devret annan. Annefe, sa enn ki kontan son prosen in akonpli sa ki lalwa i demande. 9Komannman ki dir: Pa komet adilter, pa fer krim, pa vole, pa anvi keksoz ou prosen. Tousala ek lezot ankor, i enkli dan sa sel komannman: Kontan ou prosen parey ou prop lekor#13.9 War Egz 20.13-17; Det 5.17-21; Lev 19.18..
10Lanmour pa fer ditor son prosen. Ler nou kontan nou prosen nou pe akonpli lalwa konpletman.
Prepar Ou pour Retour Kris
11Zot devre konnen dan ki letan nou pe viv. Ler in arive pour zot reveye dan zot sonmey. Delivrans i pli pre avek nou ki kan nou ti krwar pour premye fwa.
12Lannwit in avanse, lizour pe aprose. Annou rezet bann aksyon ki ganny fer dan fernwanr e pran bann zarm ki permet konbat dan lalimyer. 13Annou konport nou avek dinyite parey dimoun ki pe viv an plen zour. Annou prezerv nou kont bann move fason viv tel ki: Fer parti bwar, dezord ek vis, dispit ek zalouzi. 14Abiy zot avek nou Senyer Zezi-Kri; pa les zot ganny antrennen par zot prop natir pour satisfer zot bann dezir.
Currently Selected:
Romen 13: BSK
Highlight
Share
Copy
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.
