Romen 12
12
Nouvo Lavi dan Servis Bondye
1Alor, mon bann frer ek ser! Pour tou sa bonte ki Bondye in manifeste anver nou, mon ankouraz zot pour ofer zot lekor koman en sakrifis vivan, sen e agreab, devan Bondye. Sa i ava zot ladorasyon spirityel. 2Pa swiv bann koutim sa lemonn aktyel, me les Bondye transform zot e donn zot en nouvo lentelizans. Alor, zot ava kapab disern lavolonte Bondye: Sa ki byen, sa ki fer li plezir, sa ki parfe.
3Par lagras ki, dan son bonte, Bondye in donn mwan, mon dir avek zot tou: Pa bezwen ganny en tro gran lopinyon lo zot menm. O kontrer, reste rezonnab, mezir zot valer dapre lafwa ki Bondye in donn zot.
4Dan nou lekor, i annan plizyer manm e sak manm i ranpli en fonksyon diferan. 5Demenm, menm si i annan bokou nou, nou form en sel lekor avek Kris, e nou tou ansanm, nou form bann manm ini, parey dan en sel lekor.
6Nou posed bann diferan don dapre lagras ki Bondye in akord sakenn ant nou. Sa enn ki posed don pour profetize, i devre fer li dapre lafwa. 7Si en lot i annan don servis, i devre annan lespri servis. Si enn i annan don pour lansennyman, i devre byen ansennyen. 8Sa enn ki annan don pour ankouraz lezot, i devre fer li. Sa enn ki partaz son byen avek lezot, i devre fer li avek zenerozite. Sa enn ki dirize, i devre fer li byen. Sa enn ki ed malere i devre fer li dan lazwa.
9Lanmour i devre senser. Deteste sa ki mal e reste atase avek sa ki byen. 10Annan en gran lafeksyon ant zot, parey bann frer ki kontan kanmarad; setaki, montre plis respe pour kanmarad. 11Pa fer pares, me servi Senyer avek tou zot leker. 12Reste dan lazwa akoz zot lesperans! Gard pasyans dan lasoufrans! Reste fidel dan lapriyer! 13Ed zot bann frer ki dan bezwen e pratik lospitalite.
14Demann Bondye beni bann ki persekit zot; demann li pour beni zot, pa pour modi zot. 15Rezoui avek sa enn ki dan lazwa, e pran lapenn avek sa enn ki dan lapenn. 16Viv an akor avek tou zot kanmarad. Pa bezwen annan lorgey, me aksepte bann travay ki senp. Pa bezwen annan en tro gran lopinyon lo zot menm.
17Pa rann personn mal pour mal. Me fer tou sa ki posib pour fer sa ki byen devan tou dimoun. 18Si i posib, fer tou sa ki depann lo zot, pour zot viv anpe avek tou dimoun.
19Mon bann zanmi! Pa fer zot prop vanzans, me les lakoler Bondye azir. Annefe, Senyer i deklare dan Lekritir:
Mwan ki pou fer vanzans.
Mwan ki pou fer peye#12.19 Det 32.35..
20E osi:
Si ou lennmi i lafen, donn li manze;
si i swaf, donn li bwar,
akoz kan ou ava azir konmsa,
ou pou plas li dan en sityasyon
kot i pou santi li pe brile avek laont.
21Pa les lemal domin ou.
O kontrer, domin lemal par lebyen.
Currently Selected:
Romen 12: BSK
Highlight
Share
Copy
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.
