Zenez 40

Zozef I Enterpret Rev de Prizonnyen

1Apre en pe letan, de sef dan lakour Faraon, responsab labwason ek son sef patisye, ti'n komet en fot kont lerwa Lezip. 2Faraon ti ankoler kont sa de fonksyonner enportan. 3I ti fer met zot dan prizon kot son sef gard, sa menm prizon kot Zozef ti ete. 4Sef gard ti met Zozef responsab pour servi zot. Zot ti reste dan prizon pandan en serten letan.

5En menm swar, tou le de, responsab labwason lerwa ek sef patisye ti ganny sakenn en rev ki ti annan sinifikasyon spesyal. 6Kan Zozef ti vin war zot bomaten, i ti remarke ki zot ti byen trakase. 7I ti demann zot, “Akoz zot figir i paret tris ozordi?”

8Zot ti dir li, “Nou'n ganny en rev, e napa personn ki kapab donn nou en lenterpretasyon.”

Zozef ti dir zot, “Pa Bondye ki donn lenterpretasyon rev? Pa per! Rakont mwan zot rev.”

9Responsab labwason lerwa ti rakont son rev avek Zozef, “Mon ti reve ti annan en pye rezen devan mwan. 10I ti annan trwa brans. Sa pye rezen ti bourzonnen e fleri. Bann fler ti ouver e donn bann grap rezen. 11Lakoup Faraon ti dan mon lanmen. Mon ti pran bann grap rezen e mon ti pers zot dan lakoup e donn Faraon.”

12Zozef ti dir li, “La lenterpretasyon ou rev: Sa trwa brans i reprezant trwa zour. 13Dan ankor trwa zour, Faraon pou retabli ou dan ou responsabilite. Ou ava repran ou travay, e servi Faraon son lakoup parey avan. 14Mazin mwan kan ou pou dan byen. Mon demann ou mansyonn mwan; ganny labonte koz avek Faraon pour mwan e fer mwan sorti dan sa prizon. 15Annefe, mon ti ganny anmennen pardfors sorti dan pei bann Ebre, e isi osi, mon pa'n fer nanryen mal pour merit ganny met dan prizon.”

16Ler sef patisye ti war ki lenterpretasyon rev responsab labwason lerwa ti bon, i ti dir Zozef, “Mwan osi mon ti ganny en rev: Ti annan trwa pannyen gato lo mon latet. 17Dan pannyen anler ti annan tou kalite dipen ek gato pour Faraon, e bann zwazo ti pe bek gato dan pannyen lo mon latet.”

18Zozef ti reponn, “La son lenterpretasyon: Sa trwa pannyen i reprezant trwa zour. 19Dan trwa zour, Faraon pou fer pann ou dan en pye dibwa, e zwazo pou vin bek ou laser.”

20Trwa zour plitar, Faraon ti ganny son lanniverser. Ti annan en gran lafet pour tou son bann serviter. Faraon ti fer sorti responsab labwason ek sef patisye dan prizon. 21Responsab labwason ti ganny retabli dan son travay pour met lakoup dan lanmen Faraon. 22Me Faraon ti fer pann sef patisye, parey lenterpretasyon ki Zozef ti'n donnen. 23Pourtan, responsab labwason lerwa ti oubliy koz lo Zozef.

Currently Selected:

Zenez 40: BSK

Highlight

Copy