Zenez 39

Zozef ek Fanm Potifar

1Zozef ti ganny anmennen Lezip. Potifar, en sef Ezipsyen, sef bann gard dan lakour Faraon, ti aste li avek bann Ismaelit ki ti'n anmenn li. 2SENYER ti avek Zozef. I ti reisi dan tou sa ki i ti antreprann. I ti travay dan lakaz son met Ezipsyen. 3Son met ti war ki SENYER ti avek li, e ki SENYER ti fer li reisi dan tou sa ki i ti antreprann. 4Potifar ti bon anver Zozef. I ti pran li dan son servis e anmenn li dan son lakaz. I ti met li ansarz son lakour ek tou sa ki i ti posede.

5Kan Zozef ti ansarz tou keksoz dan lakaz Potifar, SENYER ti beni lakour sa Ezipsyen akoz Zozef. Benediksyon SENYER ti lo tou sa ki i ti posede, dan son lakaz koman dan son plantasyon. 6I ti konfye tou son byen dan lanmen Zozef; i ti nepli okip nanryen, eksepte son manze.

Zozef ti en zoli garson. 7Apre en serten letan, fanm Potifar ti konmans zet en regar lo Zozef. I ti dir li, “Vin dormi avek mwan.”

8Me i ti refize e i ti dir fanm son met, “Mon met pa okip nanryen dan lakaz e in konfye mwan tou sa ki i posede. 9Dan sa lakaz, i pa pli gran ki mwan. I'n konfye mwan tou eksepte ou, akoz ou son fanm. Ki mannyer eski mon pou kapab fer en keksoz osi mal e komet en pese kont Bondye?”

10Tou le zour, i ti demann Zozef pour dormi avek li, me Zozef pa ti aksepte; i ti refize dormi avek li.

11Me en zour, Zozef ti antre kot lakaz pour fer son travay. Bann serviter ti absan. 12Fanm Potifar ti atrap son lenz. I ti dir li, “Vin dormi avek mwan!”

Me Zozef ti les son lenz dan lanmen sa fanm e i ti tay deor. 13Kan i ti war ki Zozef ti'n kit son lenz dan son lanmen e ki i ti'n sov deor, 14i ti kriy bann serviter. I ti dir zot, “Gete! En Ebre in ganny anmennen isi pour ensilte nou. In vin kot mwan pour dormi avek mwan e mon'n kriye. 15Ler in antann mwan kriye i'n kit son lenz lanmenm akote mwan e in tay deor.”

16I ti gard lenz Zozef obor li ziska ki son mari ti ariv dan lakaz. 17Alor, i ti rakont li sa menm zistwar, “Ou lesklav Ebre, ki ou'n anmenn isi, in vini pour sali mwan. 18Me de ki mon'n kriye, i'n kit son lenz akote mwan e sov deor.”

19Ler Potifar, son met, ti antann sa parol ki son fanm ti'n dir: La ki mannyer ou lesklav in tret mwan, son lakoler ti monte. 20Potifar ti pran Zozef e met li dan prizon kot tou prizonnyen lerwa ti ganny garde. I ti reste la, dan prizon.

21SENYER ti avek Zozef; i ti montre son labonte anver li. Zozef ti ganny faver avek sa komandan prizon, 22ki ti ansarz tou lezot prizonnyen. Tou sa ki ti annan pour fer dan prizon ti pas par li. 23Komandan prizon pa ti annan nanryen pour trakase, tou ti dan lanmen Zozef. SENYER ti avek li e i ti fer li reisi dan tou sa ki i ti antreprann.

Currently Selected:

Zenez 39: BSK

Highlight

Copy