Zenez 37
37
Zozef ek Son Bann Frer
1Zakob ti pe reste dan Kanaan, dan pei kot son papa ti'n reste koman en etranze. 2La zistwar fanmir Zakob:
Zozef ti annan 17 an, i ti pe vey troupo avek son bann frer. I ti avek bann garson Bila e Zilpa, bann fanm son papa. Zozef ti raport tou sa ki zot fer mal avek zot papa.
3Izrael ti kontan Zozef plis ki tou son bann zanfan, akoz i ti ne dan son vye zour. I ti koud en gran rob lanmans long pour li. 4Kan son bann frer ti remarke ki zot papa ti kontan Zozef plis ki zot, zot ti ay li; zot pa ti kapab koz byen avek li.
5En zour, Zozef ti ganny en rev, e kan i ti rakont son bann frer sa rev, zot ti deteste li plis ankor. 6I ti dir zot, “Ekout mon rev: 7Nou ti pe anmar pake dible dan plantasyon, e mon pake ti lev drwat debout. Me zot pake ti rasanble otour sa ki pour mwan e tonm ater devan li.”
8Son bann frer ti dir li, “Eski ou pou vreman vin nou lerwa? Oubyen, eski vreman ou pou annan dominasyon lo nou?” Zot ti deteste li plis ankor akoz son bann rev e mannyer i ti rakont zot.
9Zozef ti ganny en lot rev ki i ti rakont son bann frer, “Mon'n ganny en lot rev: Soley, lalin ek 11 zetwal ti pe prosternen devan mwan.”
10Kan i ti rakont sa rev avek son papa e son bann frer, son papa ti reprimann li. I ti dir li, “Ki sa kalite rev ki ou'n fer? Eski mwan avek ou manman ek ou bann frer, nou pou prosternen devan ou?”
11Son bann frer ti zalou li, me son papa ti gard sa rev dan son lespri.
Zozef I Ganny Vann
12Son bann frer ti anmenn bann troupo manz zerb Sikenm. 13Izrael ti dir Zozef, “Eski ou bann frer pa'n anmenn bann troupo Sikenm? Mon pou anvoy ou kot zot.”
Zozef ti reponn, “La mon la.”
14Alor i ti dir, “Al gete si ou bann frer i byen avek troupo, e retourn kot mwan.” Alor, i ti anvoy li dan vale Hebron.
Zozef ti kit Hebron e i ti al Sikenm. 15En zonm ti trouv li pe marse dan lafore e demann li, “Lekel ki ou pe rode?”
16I ti reponn, “Mon pe rod mon bann frer. Eski ou konnen kote zot ete?”
17Sa zonm ti reponn, “Zot in al lwen, akoz mon ti antann zot dir: Annou al Dotan.” Alor, Zozef ti al rod son bann frer e i ti trouv zot Dotan.
18Zot ti war li depi lwen e avan ki i ariv obor zot, zot ti fer plan pour touy li.
19Zot ti dir kanmarad, “La sa rever pe vini. 20Annou touy li e zet son lekor dan enn bann pwi. Nou ava dir ki en zannimo sovaz in touy li. Nou ava war ki pou arive avek son bann rev.”
21Kan Riben ti antann sa, i ti esey sov li an dizan, “Pa bezwen pran son lavi.”
22Riben ti dir zot, “Pa bezwen vers disan. Zet li dan enn sa bann pwi, me pa bezwen fer li ditor.”
I ti dir sa pour li delivre Zozef e retourn li kot son papa. 23Kan Zozef ti ariv kot zot, zot ti tir son rob, sa rob lanmans long ki i ti'n mete, 24e zot ti zet li dan en pwi. Sa pwi ti sek. Ti napa delo ladan.
25Answit, zot ti asize pour manze. Zot ti war en karavann bann Ismaelit sorti Galaad, zot bann samo ti pe anmenn parfen, lagonm ek lamir, ki zot ti pe anmenn Lezip. 26Zida ti dir son bann frer, “Ki benefis nou pou gannyen pour touy nou frer, e kasyet son disan? 27Annou vann li avek bann Ismaelit e annou pa sali nou lanmen avek son disan. Apre tou, i nou prop laser.” Son bann frer ti ekout li. 28En bann marsan Madyanit ti pas par la. Zot ti tir Zozef dan sa pwi e zot ti vann li avek sa bann Ismaelit pour 20 pyes larzan. Sa bann marsan ti anmenn Zozef Lezip.
29Kan Riben ti retourn kot pwi, i pa ti war Zozef. Alor, i ti desir son lenz 30e retourn kot son bann frer. I ti dir, “Zozef pa la. Kote mon pou ale aprezan?”
31Alor, zot ti touy en kabri e tranp rob Zozef dan son disan. 32Zot ti anvoy sa rob kot zot papa. Zot ti fer dir li, “Sanmenm ki nou'n trouve. Gete si sa i vreman rob ou garson oubyen non.”
33Zozef ti rekonnet sa rob. I ti dir, “Sa rob mon garson. En zannimo sovaz i'n devor li. Zozef san dout in ganny desire.”
34Zakob ti desir son lenz e i ti met en sak dan son leren. I ti pler son garson pandan plizyer zour. 35Tou son bann garson ek son bann fiy ti vin konsol li. Me i ti refiz tou konsolasyon. I ti dir, “Dan dey ki mon pou al kot mon garson, dan lemonn lanmor.” Zakob pa ti arete plere.
36Alor, bann Madyanit ti'n vann Zozef Lezip avek Potifar, en sef e kaptenn gard rwayal dan lakour Faraon.
Currently Selected:
Zenez 37: BSK
Highlight
Share
Copy
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.
