Akt de Zapot Lentrodiksyon
Lentrodiksyon
Liv Akt de Zapot i dezyenm parti travay Lik. Dan premye liv, son Levanzil, Lik i limit li lo lepok lavi Zezi lo later. Apartir lasansyon (1.1-11), prezans Kris parmi son bann disip i sanz natir: I nepli posib war li avek lizye. Se alor, ki liv Akt i fer nou antre dan lepok Legliz Kretyen: Zezi i reste prezan par Lespri ki anim bann disip.
Sa liv i ranpli avek lavi. I fer nou asiste nesans kominote kretyen parmi bann kominote Zwif, dan Zerizalenm; parmi kominote non-Zwif, dan bann gran lavil: Antyos, Korent, Filipi.
Nou kapab swiv Pol tou dilon son bann vwayaz misyonner. Nou kapab ganny en lide bann difikilte ki kominote krwayan in pas ladan e koman bann problenm i ganny rezoud gras a Lespri Sen.
Lik i eksprim li dan en fason pour montre ki i ti la, ler i rakont son vwayaz depi Troas ziska Filipi (16.10-40), apre, ziska Zerizalenm kot Pol i ganny arete e met dan prizon (20.5—21.19). Finalman, i kit Sezare pour al Ronm, kot Pol i esper 2 an avan i ganny zize (27–28).
Sa liv i anons son plan klerman depi konmansman (1.8)
Konmansman premye kominote Zerizalenm apre lasansyon Zezi (1.1—8.3)
Propagasyon Levanzil dan leres pei (8.4—12.25) e dan rezyon Mediterane ek Ronm, kapital Lanpir Romen (13.1—28.31)
Dan mesaz ki bann zapot i prese partou dan lemonn, Zezi i ganny prezante avek tou dimoun, Zwif koman non-Zwif. Lespri Sen i anmenn bann disip konstaman ver Zezi, son bann parol ek son aksyon.
Bann levennman ki ganny rakonte dan sa liv i prepar semen pour misyon bann krwayan dan tou letan, i bezwen akonpli: Anons Bonn Nouvel Zezi-Kri dan lemonn antye.
Currently Selected:
Akt de Zapot Lentrodiksyon: BSK
Highlight
Share
Copy
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.