Akt de Zapot 1
1
Promes Lespri Sen
1Ser Teofil, dan mon premye liv#1.1 War Lk 1.1-4; Liv Akt i laswit Levanzil Lik., mon'n rakont tou sa ki Zezi in fer e ansennyen depi konmansman, 2ziska zour ki i ti mont dan lesyel. Avan mont dan lesyel, i ti donn bann lenstriksyon, par Lespri Sen pour bann zonm ki i ti'n swazir koman zapot. 3Apre son lanmor, pandan 40 zour, i ti aparet plizyer fwa avek zot e i ti prouve klerman par plizyer mannyer, ki i ti vivan. I ti aparet avek zot e koz avek zot lo Rwayonm Bondye.
4En zour, pandan ki i ti pe manz avek zot, i ti donn zot sa lord: Pa kit Zerizalenm, me esper sa kado ki mon Papa in promet, parey mon'n deza dir zot#1.4 Pour sa parol Zezi, war Lk 24.49.. 5Zan ti batiz avek delo, me zot, dan detrwa zour, zot pou ganny batize dan Lespri Sen#1.5 Lk pe koz lo Zanbatis. War Mat 3.11; Mrk 1.8; Lk 3.16; Zn 1.33..
Zezi I Mont dan Lesyel
6Alor, kan bann zapot ti ansanm avek li, zot ti demann li, “Senyer, eski letan in arive pour ou retabli rwayonm Izrael?” 7Zezi ti dir zot, “I pa neseser pour zot konn letan ek moman ki mon Papa in fikse par son prop desizyon. 8Me kan Lespri Sen pou desann lo zot, zot pou resevwar en lafors. Zot ava mon bann temwen dan Zerizalenm, dan rezyon Zide antye e dan Samari, ziska dan bout later.”
9Apre sa bann parol, Zezi ti mont dan lesyel. Pandan ki zot ti pe get li, en nyaz ti maske li avek zot.
10Zot ti ankor pe fikse lesyel kot Zezi ti pe monte, kan de zonm abiye an blan ti aparet akote zot. 11Sa de zonm ti dir zot, “Galileen! Akoz zot reste la pe get dan lesyel? Sa Zezi ki'n ganny anleve dan lesyel parmi zot, pou retournen dan menm mannyer ki zot in war li mont dan lesyel.”
Ranplasan Zida
12Bann zapot ti kit lo sa kolin ki apel montanny Zolivye. Zot ti retourn Zerizalenm ki pa ti lwen, en distans otorize pour en zour saba#1.12 Sa distans otorize i mwens ki en kilomet.. 13Kan zot ti ariv Zerizalenm, zot ti mont dan en lasanm dan letaz, kot zot ti abitye reini. Ti annan Pyer, Zan, Zak, Andre, Filip ek Toma, Bartelemi ek Matye, Zak garson Alfe, Simon, en nasyonalis, ek Zid, garson Zak. 14Avek en sel leker, zot ti rasanble pour lapriyer, ansanm avek bann fanm. Mari, manman Zezi ek bann frer Zezi ti osi la.
15Dan sa bann zour, pandan ki bann krwayan ti'n reini, apepre 120 dimoun an tou, Pyer ti debout parmi zot. I ti dir, 16“Mon bann frer! Fodre ki sa ki Lespri Sen in anonse davans dan Lekritir, par labous David konsernan Zida, ki ti servi koman gid pour bann ki ti vin aret Zezi, i realize. 17Zida ti enn parmi nou. I ti'n ganny swazir pour pran par dan sa menm misyon. 18Avek larzan ki i ti'n ganny peye pour son krim, Zida ti aste en morso later, kot i ti tonm par latet e i ti mor. Son lekor ti pete e tou son zentesten ti fannen. 19Tou dimoun ki ti pe reste Zerizalenm ti antann sa nouvel. Dan zot lalang, zot ti apel sa landrwa Hakeldama, savedir, Later disan#1.19 War Mat 27.3-8..
20Annefe, la sa ki'n ganny ekri dan liv Psonm:
Son lakaz ava ganny abandonnen,
e personn pa pou reste ladan!
I'n ganny osi ekri:
Les en lot ranplas li
dan son fonksyon#1.20 Ps 69.26; 109.8.!
21Alor, i neseser ki nou swazir parmi bann ki'n toultan avek nou, letan ki Senyer Zezi ti ale vini parmi nou, 22depi batenm Zan ziska zour ki i ti kit nou pour mont dan lesyel#1.22 War Mat 3.16; Mrk 1.9; Lk 3.21.. Fodre ki enn sa bann zonm, i vin avek nou, temwen son rezireksyon.”
23Zot ti propoz de zonm: Zozef ki ti apel Barsabas, ki ti osi apel Zistis, ek Matyas. 24Zot ti priye, “Senyer! Ou ki konn leker tou dimoun, montre nou ant sa de, lekel ki ou'n swazir, 25pour pran koman fonksyon en zapot, plas ki Zida in kite, pour al dan sa enn ki ti pour li.”
26Zot ti tir osor pour swazir parmi sa de zonm. Matyas ti ganny swazir, e i ti pran son plas parmi sa group onz zapot.
Currently Selected:
Akt de Zapot 1: BSK
Highlight
Share
Copy
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.
