Akt de Zapot 21

Pol I Al Zerizalenm

1Apre ki nou ti'n dir orevwar, nou ti anbarke e al direkteman Kos. Son lannmen nou ti ariv Rod. Depi la, nou ti al Patara, 2kot nou ti ganny en lot bato ki ti pe al Fenisi. Nou ti anbarke e nou ti ale.

3Kan nou ti apersevwar zil Sip, nou ti les sa zil lo nou kote gos, pour al ver Lasiri. Nou ti al koste Tir, kot bato ti debark son kargezon. 4La, nou ti trouv bann disip e nou ti reste avek zot pandan set zour. Gide par Lespri Sen, zot ti sipliy Pol pour li pa al Zerizalenm. 5Me apre en semenn, nou ti kontiny nou vwayaz. Zot tou, avek zot fanm ek zot zanfan, ti kondwir nou ziska an deor lavil. Nou ti azenou lo bor lanmer e nou ti priye. 6Apre, nou ti dir orevwar kanmarad. Nou ti anbarke e zot ti retourn kot zot.

7Nou ti kontiny nou vwayaz par bato depi Tir ziska Ptolemais, kot nou ti al dir bonzour bann frer e pas lazournen avek zot. 8Lannmen, nou ti lev lank e ariv Sezare. La, nou ti al kot levanzelis Filip, e reste kot li. Filip ti enn parmi sa set zonm ki ti'n ganny swazir#21.8 War 6.5; 8.5.. 9I ti annan kat zenn fiy ki ti profet.

10Nou ti la depi plizyer zour kan en profet ki ti apel Agabis#21.10 War 11.28. ti arive sorti Zide. 11I ti vin kot nou. I ti pran sentir Pol e anmar son prop lipye ek son lanmen avek. I ti dir, “La sa ki Lespri Sen i dir: Konmsa ki propriyeter sa sentir pou ganny anmare par bann Zwif dan Zerizalenm, e zot pour livre li dan lanmen bann etranze.”

12Kan nou menm ek bann frer Sezare, nou ti'n antann sa bann parol, nou ti sipliy Pol pour li pa al Zerizalenm. 13Me Pol ti reponn, “Akoz zot pe plere konmsa e kas mon leker? Mwan mon pare pa zis pour ganny anmare, me menm pour mor pour nou Senyer Zezi dan Zerizalenm.”

14Nou pa ti kapab konvenk li. Alor, nou ti aret ensiste. Nou ti dir, “Les lavolonte Senyer ganny akonpli.”

15Apre detrwa zour dan sa landrwa, nou ti prepar nou pour repran nou vwayaz ver Zerizalenm. 16Detrwa disip Sezare ki ti'n vin avek nou depi Sezare ti akonpanny nou. Zot ti kondwir nou kot en zonm kot nou ti devre reste, en serten Mnason, en disip depi lontan, ki ti sorti zil Sip.

Vizit Pol Zerizalenm

17Kan nou ti ariv Zerizalenm, bann frer ti akey nou avek lazwa. 18Lannmen, Pol, ansanm avek nou, ti al kot Zak kot tou bann ansyen ti'n reini. 19Pol ti dir zot bonzour e answit, i ti rakont an detay tou sa ki Bondye ti'n akonpli par son minister parmi bann pep non-Zwif.

20Apre ki zot ti'n antann li, zot ti rann glwar Bondye. Answit, zot ti dir Pol, “Frer! Ou war ki i annan plizyer milye Zwif ki'n aksepte lafwa. Me zot tou, zot atase avek Lalwa. 21Sepandan, zot in ganny dir ki ou pe ansenny tou bann Zwif ki pe reste parmi lezot nasyon ki zot bezwen abandonn Lalwa Moiz. Ou'n osi dir ki pa neseser fer sirkonsi zot bann zanfan ni swiv bann koutim Zwif. 22Ki nou pou fer? Sirman zot pou konnen ki ou'n arive. 23Alor, swiv konsey ki nou pou donn ou: Nou annan isi kat zonm ki'n fer en ve. 24Al avek zot, partisip dan seremoni pirifikasyon e pey bann depans pour zot raz zot latet#21.24 War 18.18.. Alor, tou dimoun ava konnen ki napa nanryen ki vre dan tou sa ki zot pe rakonte lo ou, me ki ou osi, ou pe viv dapre Lalwa Moiz.

25Kanta bann krwayan non-Zwif, nou'n deza ekri pour dir zot sa ki nou'n deside, setadir ki zot pa devre manz okenn lavyann ki'n ganny ofer koman sakrifis avek zidol, ni disan, ni lavyann en zannimo ki'n mor toufe, e ki zot bezwen prezerv zot kont bann pratik imoral#21.25 War 15.20..”

26Alor, Pol ti al avek sa kat zonm, e lannmen, i ti partisip avek zot dan seremoni pirifikasyon. Apre, i ti al dan Tanp e anonse konbyen zour seremoni pirifikasyon pou dire e kan sakrifis pour sakenn zot pou ganny ofer.

Pol I Ganny Arete dan Tanp

27Ver lafen sa set zour, bann Zwif ki sorti dan provens Lazi, ti war Pol dan Tanp. Zot ti eksit lafoul e atrap Pol. 28Zot ti kriye, “Pep Izrael, osekour! La i la, sa zonm ki pe prese partou avek tou dimoun kont pep Izrael, kont Lalwa Moiz e kont nou Tanp. Aprezan i'n menm anmenn bann Grek dan Tanp e fer sa landrwa sen vin enpir.”

29Zot ti dir sa akoz zot ti'n war Trofim ki sorti Efez, avek Pol dan lavil, e zot ti krwar ki Pol ti'n anmenn li dan Tanp.

30Ti annan dezord dan lavil antye e dimoun ti tay partou dan konfizyon. Zot ti sezi Pol, trenn li an deor Tanp e ferm bann laport. 31Zot ti pe rod fason touy Pol, me komandan en batayon Romen ti ganny enformen ki ti annan dezord dan Zerizalenm. 32Deswit, sa komandan ti pran bann solda ek bann zofisye avek li e tay kot lafoul ti'n rasanble. Kan lafoul ti war komandan larme ek son bann solda, zot ti aret bat Pol. 33Alor komandan ti apros Pol e fer aret li. I ti donn lord pour atas li avek de lasenn. Apre, i ti demande lekel li e ki i ti'n fer.

34Me lafoul ti dan konfizyon; en bann ti dir en keksoz, en lot bann ti dir en lot zafer. Komandan pa ti kapab konpran nanryen dan sa dezord. Alor, i ti donn lord pour anmenn Pol dan fortres.

35Kan Pol ti ariv dan leskalye, bann solda ti bezwen anmenn li, akoz lafoul ti'n vin tro vyolan. 36Annefe, lepep antye ti pe swiv an kriyan, “Touy li.”

Pol I Prezant Son Defans

37Zis ler zot ti pe anmenn li dan fortres, Pol ti demann avek komandan, “Eski ou permet mwan dir ou keksoz?”

Komandan ti demann li, “Ou konn koz Grek? 38Ou pa sa Ezipsyen, ki, napa lontan, ti provok en revolt e anmenn 4,000 teroris dan dezer?”

39Pol ti reponn, “Mon en Zwif, ne Tars, an Silisi. Mon sitwayen en lavil enportan. Silvouple, les mwan koz avek lepep.”

40Komandan ti donn li permisyon. Pol alor, ti debout lo leskalye e avek lanmen i ti fer en siny avek lepep. Kan zot ti'n reste trankil, Pol ti adres zot an Ebre.

Currently Selected:

Akt de Zapot 21: BSK

Highlight

Copy