Akt de Zapot 22

1I ti dir, “Mon bann frer! Mon bann papa! Ekoute sa ki mon annan pou dir pour mon defans.”

2Kan zot ti antann li koz dan lalang Ebre, zot ti reste pli trankil. Alor Pol ti dir, 3“Mwan, mon en Zwif, mon'n ne Tars, an Silisi, me mon'n grandi isi, Zerizalenm. Mon'n ganny koman profeser, Gamalyel#22.3 War 5.34. ki'n ansenny mwan Lalwa nou bann zanset. Parey zot ozordi, mon ti ranpli avek devouman pour Bondye. 4Mon ti persekit anmor, tou bann ki ti swiv sa Semen Senyer. Mon ti aret zonm koman fanm e zet zot dan prizon. 5Gran-Pret ek lasanble bann ansyen, zot mon temwen: Zot ti donn mwan bann let pour nou bann frer ki Damas. Mon ti al laba pour aret sa bann krwayan e retourn avek zot ansennen isi Zerizalenm, pour zot ganny pini#22.5 War 8.3; 9.1-2..”

Pol I Rakont Son Konversyon

(Akt 9.1-19; 26.12-18)

6Mon ti dan semen pre avek Damas kan toutakou, ver midi, en gran lalimyer sorti dan lesyel ti klate otour mwan. 7Mon ti tonm ater e mon ti antann en lavwa ki ti dir mwan: Sol, Sol! Akoz ou pe persekit mwan?

8Mon ti demande, “Senyer, lekel ou?” Sa lavwa ti dir: Mwan Zezi ki sorti Nazaret, ki ou pe persekite.

9Bann dimoun ki ti avek mwan ti war lalimyer, me zot pa ti antann lavwa sa enn ki ti pe koz avek mwan.

10Alor, mon ti demande, “Ki fodre mon fer Senyer?”

Senyer ti dir mwan, “Leve! Al Damas. La, zot ava dir ou sa ki ou devre fer.”

11Alor, akoz mon ti'n vin aveg par sa gran lalimyer, bann ki ti avek mwan, ti atrap mon lanmen e anmenn mwan ziska Damas.

12Ti annan la en zonm ki ti apel Ananyas. I ti en zonm byen relizye e i ti obei nou Lalwa. Tou bann Zwif ki ti reste Damas ti annan gran respe pour li. 13I ti vin kot mwan. I ti dir, “Sol mon frer! Revwar kler.”

Deswit mon ti revwar kler e mon ti war li. 14I ti azoute, “Bondye nou bann zanset in swazir ou davans pour fer ou konn son lavolonte, pour ou war sa enn ki Zis, e pour ou antann son prop lavwa. 15Annefe, ou pou vin son temwen devan tou dimoun, lo tou sa ki ou'n war e tande. 16Aprezan, pa tarde. Leve! Ganny batize. Envok son non, pour ki ou bann pese i ganny lave.”

Pol I Ganny Swazir pour Pres avek bann non-Zwif

17Mon ti retourn Zerizalenm, e pandan ki mon ti pe priye dan Tanp, mon ti ganny en vizyon. 18Dan sa vizyon, mon ti war Senyer ki ti dir mwan, “Depes ou, kit Zerizalenm, akoz son bann zabitan pa pou aksepte ou temwannyaz lo mwan.”

19Mon ti dir, “Senyer! Zot konn byen ki mon ti al dan tou sinagog pour arete e bat bann dimoun ki krwar dan ou. 20Kan zot ti touy Etyenn, ou temwen, mwan osi mon ti la. Mon ti dakor avek sa bann ki ti pe touy li; mwan ki ti gard zot lenz#22.20 War 7.58; 8.1..”

21Me Senyer ti dir mwan, “Ale! Mon pou anvoy ou lwen, ver bann non-Zwif.”

Pol avek Komandan Romen

22Ziske la, lafoul ti ekout Pol. Me apre, zot ti konmans kriye, “Fer disparet en tel zonm lo later! I pa merit viv!”

23Pandan ki zot ti pe kriye, anvoy zot lenz e zet lapousyer anler, 24komandan Romen ti donn lord son bann zonm anmenn Pol anndan dan fortres. I ti donn lord ki zot fwet Pol pour konnen akoz bann Zwif ti pe kriye konmsa kont li. 25Kan zot ti'n anmar li pour li ganny fwete, Pol ti dir avek sa zofisye ki ti la, “Eski ou annan drwa fwet en sitwayen Romen ki pa'n ganny zize#22.25 War 16.37.?”

26Ler sa zofisye ti antann sa, i ti al kot komandan e demann li, “Ki ou pou fer? Sa zonm i en sitwayen Romen.”

27Alor, komandan ti al kot Pol e demann li, “Dir mwan, eski ou en sitwayen Romen?”

Pol ti reponn, “Wi!”

28Komandan Romen ti dir, “Mwan mon ti bezwen pey en kantite larzan pour mwan vin sitwayen Romen.”

Pol ti reponn, “Me mwan, mon en sitwayen par nesans.”

29Deswit bann zonm ki ti pe al kestyonn li, ti rekile e les li trankil. Komandan ti per ler i ti realize ki Pol ti en sitwayen Romen e ki i ti'n fer ansenn li.

Pol devan Konsey Siperyer

30Komandan ti oule konnen egzakteman ki lakizasyon bann Zwif ti annan kont Pol. Pour sa rezon, lannmen, i ti fer larg li e konvok bann gran-pret ek konsey. I ti fer Pol konparet devan zot.

Currently Selected:

Akt de Zapot 22: BSK

Highlight

Copy