Akt de Zapot 19
19
Pol I Al Efez
1Pandan ki Apolos ti Korent, Pol ti travers pei dan rezyon montanny pour ariv Efez, kot i ti rankontre detrwa disip. 2I ti demann zot, “Eski zot ti resevwar Lespri Sen kan zot ti vin krwayan?”
Zot ti reponn, “Nou pa'n zanmen antann koz lo Lespri Sen.”
3Pol ti demann zot, “Alor, ki batenm zot in resevwar?”
Zot ti reponn, “Batenm Zan.”
4Alor, Pol ti dir zot, “Zan ti batiz sa bann ki ti oule sanz zot lavi. I ti dir avek pep Izrael krwar plito dan sa enn ki pou vin apre li, setadir Zezi#19.4 War Mat 3.11; Mrk 1.4,7-8..”
5Apre ki bann krwayan Efez ti'n antann sa bann parol, zot ti aksepte ganny batize lo non Senyer Zezi. 6Kan Pol ti enpoz lanmen lo zot, Lespri Sen ti desann lo zot. Zot ti konmans koz bann lalang etranze, e anons mesaz ki Bondye ti donn zot. 7Ti annan apepre 12 zonm an tou.
8Pol ti al dan sinagog, e pandan trwa mwan, i ti koz avek konviksyon. I ti pres lo Rwayonm Bondye e i ti esey konvenk bann dimoun ki ti pe ekout li. 9Me ti annan serten ki ti antete e refize krwar. Devan lasanble, zot ti koz avek mepri lo size Semen Senyer. Alor Pol, ti kit zot. I ti anmenn bann disip avek li dan lekol Tiranis, kot i ti diskite tou le zour. 10Sa ti dire pandan 2 an. Konmsa, tou sa bann ki ti pe viv dan provens Lazi, Zwif koman Grek, ti antann Parol Senyer.
Bann Garson Seva
11Bondye ti pe fer bann mirak ekstraordiner par lentermedyer Pol. 12Zot ti anmenn kot bann malad, lenz, oubyen bann mouswar ki ti'n tous lekor Pol. Alor, zot ti geri e bann move lespri ti kit bann ki ti posede.
13Ti annan detrwa Zwif ki ti pe pas partou pour sas bann move lespri an servan non Senyer Zezi. Zot ti dir avek bann move lespri, “Mon donn ou lord lo non sa Zezi ki Pol i prese: Sorti!”
14Parmi bann ki ti pe fer sa, ti annan set garson en gran-pret Zwif ki ti apel Seva. 15Me bann move lespri ti reponn zot, “Mon konn Zezi. Mon konn Pol, me zot, lekel zot?”
16Sa zonm ki ti posede par sa move lespri ti sot lo zot, atrap zot e donn zot en bon bate, ki ti fer zot kit lakaz e taye touni avek blesir. 17Tou bann zabitan Efez, Zwif koman Grek, ti antann sa ki ti'n arive. Zot ti ranpli avek lafreyer e zot ti montre bokou respe pour non Senyer Zezi.
18Bokou, parmi bann ki ti'n vin krwayan, ti vini e konfes tou lemal ki zot ti'n fer. 19En kantite ki ti pratik mazik#19.19 War Mrk 6.37., ti anmenn zot bann liv e brile devan tou dimoun. Zot ti estim valer tou sa bann liv 50,000 pyes larzan. 20Konmsa ki parol Senyer ti fannen avek gran pwisans e konverti bokou dimoun.
Demetriis I Met Dezord dan Efez
21Apre tou sa bann levennman, Pol ti deside travers Masedwann ek Akai pour al Zerizalenm. I ti dir, “Apre ki mon ava'n al laba, fodre ki mon war Ronm osi.”
22Alor, i ti anvoy de son bann asistan Masedwann: Timote ek Erast; me li, i ti reste ankor en pe letan dan provens Lazi.
23Dan sa letan, ti ariv en bann troub grav konsernan Semen Senyer. 24En lorfev, ki ti apel Demetriis, ti prodwi bann pti model tanp Artemis annarzan. Sa ti anmenn gran profi pour bann artizan. 25Alor, i ti rasanble zot, ansanm avek tou bann zouvriye ki ti fer menm metye. I ti dir zot, “Mon bann zanmi! Zot konnen ki nou prosperite i depann lo sa travay. 26Me zot in war oubyen zot in tande sa ki pe pase: Sa zonm, Pol, pe dir ki bann bondye fer par zonm, pa bondye. I'n reisi konverti bokou dimoun, pa zis isi Efez, me preski dan provens Lazi antye. 27Tousala i riske fer ditor nou metye. I osi riske fer tanp nou gran bondye Artemis perdi tou son repitasyon. I kapab menm detri gran lenportans sa bondye ki tou dimoun dan Lazi e dan lemonn antye i adore.”
28Kan bann dimoun ki ti pe ekout li ti antann sa, zot ti ankoler e konmans kriye: Viv Artemis, Bondye bann Efezyen! 29Lazitasyon ti fannen dan lavil antye. Bann dimoun ti trenn Gayis ek Aristark dan teat piblik. Sa ti de Masedonyen ki ti pe akonpanny Pol dan son vwayaz. 30Pol ti oule prezant li devan lafoul, me bann krwayan ti anpes li fer sa. 31Parmi bann sef dan lavil, en zanmi ti anvoy en mesaz e sipliy li pour pa prezant li devan lafoul dan teat.
32Antretan, ti annan en gran konfizyon parmi lafoul. Serten ti pe kriy en keksoz e en lot group ti pe kriy en lot zafer. Serten pa ti ni menm konnen pour ki rezon zot ti'n rasanble.
33Pandan ki serten dan lafoul ti pe esey eksplike, bann Zwif ti pous Aleksann devan. Aleksann ti fer siny avek lanmen e esey koze pour defann son lekor devan lafoul. 34Me kan zot ti rekonnet ki i ti en Zwif, zot tou ansanm, zot ti kriye avek en menm parol pandan preski 2 erdtan: Viv Artemis, bondye bann Efezyen!
35Finalman, sekreter lavil ti reisi kalme lafoul. I ti dir, “Zabitan Efez! Tou dimoun i konnen ki lavil Efez i gardyen tanp gran Artemis ek son stati ki'n tonbe sorti dan lesyel. 36Personn pa kapab nye sa. Alor, reste trankil e pa bezwen fer nanryen san reflesir. 37Zot in anmenn sa bann zonm isi, menm si zot pa'n fer nanryen mal kont tanp, ni ensilte nou bondye. 38Alor, si Demetriis ek lezot bann artizan avek li i annan okenn konplent kont en dimoun, i annan zour lakour e bann ziz ki kapab ekout zot bann konplent. 39Si zot annan en lot keksoz ki zot oule prezante, sa ava ganny regle dan lasanble legal. 40Dapre sa ki'n arive ozordi, nou riske ganny akize pour revolt. Napa okenn rezon ki kapab zistifye en tel rasanbleman, e nou pa pou kapab donn en bon leksplikasyon.”
41Apre sa bann parol, i ti fer bann dimoun al se zot.
Currently Selected:
Akt de Zapot 19: BSK
Highlight
Share
Copy
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.
