Akt de Zapot 18

Pol dan Lavil Korent

1Apre sa, Pol ti kit Atenn pour al Korent. 2La, i ti zwenn en Zwif ki ti apel Akila, ki sorti dan provens Pon. Akila ti fek arive avek son fanm Prisil, sorti Itali, akoz Lanperer Klod ti'n donn lord pour ki tou Zwif i kit Ronm. Pol ti al war zot. 3Konman zot ti annan menm metye, Pol ti reste kot zot e zot ti travay ansanm. Zot ti fabrik latant. 4Sak saba, i ti al koze dan sinagog e i ti esey konvenk Zwif koman Grek.

5Kan Silas ek Timote ti arive sorti Masedwann#18.5 War 17.15., Pol ti konsakre tou son letan pour pres Laparol. I ti prouve avek bann Zwif ki Zezi ti li menm Mesi. 6Me akoz bann Zwif ti opoz li e ensilte li, i ti sekwe lapousyer son lenz kont zot. I ti dir zot, “Si zot pa ganny sove, i ava par zot prop lafot. Mwan, mon pa responsab. Apartir ozordi mon pou al ver bann non-Zwif.”

7Alor, i ti kit sinagog e al kot en zonm ki ti apel Titiis Zistis, en adorater Bondye e ki ti reste akote sinagog. 8Krispis, sef sinagog, avek son fanmir antye, ti krwar dan Senyer. Bokou Korentyen ki ti antann Pol, ti osi krwar e zot ti ganny batize.

9En swar, Pol ti ganny en vizyon. Senyer ti dir li, “Pa bezwen per, kontinyen koze. Pa bezwen reste trankil, 10akoz mon avek ou, e personn pa pou kapab fer ou dimal. Mon annan en gran pep dan sa lavil.”

11Pol ti reste enn an edmi dan Korent, e i ti ansenny bann zabitan Laparol Bondye.

Pol I Konparet devan Galyon

12Dan lepok ki Galyon ti gouverner Romen dan Akai, bann Zwif ti zwenn ansanm kont Pol. Zot ti atrap li e anmenn li devan tribinal. 13Zot ti dir, “Sa zonm pe fer tou mannyer pour persiad dimoun pour ador Bondye dan en fason ki kont lalwa.”

14Pol ti pe al pran laparol, kan Galyon ti dir avek bann Zwif, “Si zot ti annan konplent lo size en krim, oubyen en fot grav, mon ti ava pran letan pour ekout zot. 15Pour bann diskisyon lo bann mo, bann non e lo zot prop lalwa, zot menm, debrouy zot. Mwan, mon pa kapab ziz en zafer parey.”

16Alor, i ti fer zot kit tribinal. 17Me zot ti atrap Sostenn, sef sinagog e konmans bat li lanmenm devan tribinal. Me Galyon pa ti pran okenn ka.

Pol I Retourn Antyos

18Pol ti reste ankor ase lontan Korent. Apre, i ti kit bann frer pour anbark avek Akila ek Prisil pour al Siri. Letan i ti Sankre, Pol ti raz son latet akoz i ti'n fer en ve#18.18 War Nm 6.5-18.. 19Kan i ti ariv Efez, Pol ti kit Prisil ek Akila. I ti al dan sinagog e diskit avek bann Zwif. 20Zot ti demann li pour reste pli lontan, me i ti refize. 21I ti kit zot an dizan, “Mon ava retourn kot zot, si Bondye i oule.” Alor, i ti kit Efez par bato. 22I ti debark Sezare e al dabor Zerizalenm pour dir bonzour Legliz. Apre, i ti desann Antyos.

23Pol ti reste Antyos en pe letan. Apre, i ti ale. I ti travers rezyon Galasi ek Frizi, e fortifye bann disip dan zot lafwa.

Apolos dan Efez

24En Zwif ki ti apel Apolos, e ki ti'n ne Aleksandri, ti ariv Efez. I ti en zonm ki ti koz avek elokans e avek en gran konnesans Lekritir. 25I ti'n ganny byen enstri dan lansennyman Senyer. Ranpli avek lantouzyasm, i ti prese e ansenny egzakteman sa ki ti konsern Zezi. Me i ti konn zis batenm Zan. 26I ti ansenny avek bokou lasirans dan sinagog. Me kan Prisil ek Akila ti antann son mesaz, zot ti anmenn li kot zot e eksplik li pli byen Semen Bondye.

27Apre, Apolos ti deside pour al Akai. Alor, bann krwayan Efez ti ed li. Zot ti ekri bann frer ki ti reste Akai e demann zot pour byen resevwar li. Kan i ti ariv laba, i ti vin byen itil pour bann ki, par lagras Bondye, ti vin krwayan. 28Annefe, avek son bann largiman solid, i ti montre bann Zwif piblikman ki zot ti dan lerer. I ti prouve par Lekritir, ki Zezi i Mesi.

Currently Selected:

Akt de Zapot 18: BSK

Highlight

Copy