Akt de Zapot 15

Konsil Zerizalenm

1Detrwa zonm ki ti sorti Zide ti konmans donn bann frer sa lansennyman: Si zot pa ganny sirkonsi parey Lalwa Moiz i demande, zot pa pou ganny sove#15.1 War Lev 12.3..

2En gran diskisyon ti leve lo sa size, ant sa bann zonm, avek Pol ek Barnabas. Alor, zot ti deside ki Pol ek Barnabas, akonpannyen par detrwa lezot frer, zot mont Zerizalenm pour diskit sa problenm avek bann zapot ek bann ansyen.

3Alor, Legliz ki Antyos ti donn zot led neseser pour zot antreprann sa vwayaz. Zot ti travers Fenisi ek Samari, e rakonte koman bann non-Zwif ti aksepte Bondye. Sa nouvel ti donn bokou lazwa tou bann frer.

4Kan zot ti ariv Zerizalenm, zot ti ganny byen resevwar par Legliz, par bann zapot ek bann ansyen. Zot ti rakont tou sa ki Bondye in fer pour zot. 5Ti annan parmi zot, serten krwayan ki ti manm group Farizyen. Zot ti leve. Zot ti dir, “Fodre sirkonsi zot e fer zot obei Lalwa Moiz.”

6Bann zapot ek bann ansyen ti reini pour konsider sa kestyon. 7Apre en long diskisyon, Pyer ti leve. I ti dir, “Mon bann frer! Zot tou zot konnen ki depi en bon pe letan, Bondye ti swazir mwan parmi zot, pour ki par mon labous, bann non-Zwif i antann parol Bonn Nouvel e krwar. 8Bondye ki konn leker dimoun, ti vin temwanny an zot faver kan i ti aksepte zot e donn zot son Lespri Sen parey i ti'n donn nou#15.8 War 10.44; 11.15.. 9I pa ti fer okenn diferans ant zot ek nou; me i ti pirifye zot leker, akoz zot in krwar.

10Aprezan, pour ki rezon fodre ki nou provok Bondye par enpoz lo bann krwayan, en fardo ki ni nou bann zanset, ni nou menm, nou pa'n kapab anmennen? 11Nou krwar, o kontrer, ki par lagras nou Senyer Zezi, nou pou ganny sove, parey zot.”

12Alor lasanble antye ti reste trankil. Zot ti ekout Pol ek Barnabas rakonte koman atraver zot, Bondye ti fer bokou siny ek mirak parmi bann non-Zwif.

13Kan zot ti'n fini koze, Zak ti pran laparol. I ti dir, “Mon bann frer! Ekout mwan byen. 14Simon#15.14 Simon Pyer. War Mat 4.18. in rakont nou koman Bondye, depi o konmansman, in swazir parmi bann nasyon, en pep pour son non. 15Parol bann profet i dakor avek sa. Annefe, Lekritir i deklare:

16Apre sa, mon pou retournen,

e mon pou rekonstri

latant David ki'n tonbe.

Mon pou relev sa ki'n tonm anrin,

e redres li,

17pour ki leres dimoun i rod Senyer,

ensi ki tou bann nasyon

ki port mon non.

Sanmenm sa ki Senyer in deklare, 18li menm ki'n fer konn son bann plan depi byen lontan#15.18 War Am 9.11-12..

19Alor, dapre mwan, nou pa devre kre okenn difikilte pour sa bann non-Zwif ki pe tourn ver Bondye. 20Me annou ekri zot e demande ki zot pa manz lavyann ki'n ganny ofer avek bann zidol, gard zot kont tou pratik imoral, pa manz zannimo ki'n toufe, ni disan#15.20 War Egz 34.15-16; Lev 17,10-16.. 21Annefe, depi tre lontan, Lalwa Moiz i ganny ansennyen dan sak lavil e lir dan bann sinagog zour saba.”

Let pour bann Krwayan Non-Zwif

22Alor, bann zapot, bann ansyen, avek Legliz antye, ti deside swazir serten parmi zot pour anvoy zot Antyos avek Pol ek Barnabas. Zot ti swazir Zid, nonmen Barsabas, ek Silas, de zonm ki ti ganny byen respekte parmi bann frer. 23La let ki zot ti ganny sarze pour anmennen: Bann zapot ek bann ansyen, zot bann frer, nou anvoy salitasyon pour bann frer non-Zwif ki reste Antyos, Siri ek Silisi.

24Nou konnen ki i annan serten dimoun ki sorti kot nou, ki'n vin trouble e fatig zot par serten parol. Nou pa ti'n donn sa bann dimoun okenn manda pour fer sa. 25Pour sa rezon, nou'n dakor a linanimite, pour swazir serten delege pour anvoy kot zot. Zot pou akonpanny nou de bon zanmi Barnabas ek Pol 26ki'n riske zot lavi dan servis Senyer Zezi-Kri. 27Alor, nou pe anvoy zot Zid ek Silas ki ava dir zot personnelman sa ki nou'n ekri isi.

28Annefe, Lespri Sen ek nou menm, nou'n war bon ki nou pa devre enpoz okenn fardo an plis lo zot, an deor bann devwar endispansab, setadir: 29Pa manz lavyann ki'n ganny sakrifye avek zidol, pa manz disan, pa manz zannimo toufe, e evit tou imoralite. I ava byen si zot evit fer tousala. Adye!

30Alor, sa bann delege ti ganny anvoye, e zot ti desann Antyos. Zot ti reini tou bann krwayan e remet zot sa let. 31Kan zot ti lir sa let, zot ti ranpli avek lazwa pour son mesaz lankourazman. 32Zid ek Silas ki ti zot menm profet, ti koz lontan avek bann frer, pour ankouraz zot e fortifye zot dan lafwa. 33Zot ti reste en pe letan laba. Apre, bann frer ti les zot retourn anpe kot bann ki ti'n anvoy zot. 34Silas li, ti deside reste la#15.34 Napa sa verse dan plizyer ansyen maniskri.. 35Pol ek Barnabas ti reste Antyos. Ansanm avek bokou lezot frer, zot ti ansennyen e anons Parol Senyer.

Pol ek Barnabas I Separe

36Apre en serten letan, Pol ti dir Barnabas, “Annou retourn vizit bann frer dan tou bann lavil kot nou'n anons Parol Senyer, pou war koman zot ale.”

37Barnabas ti oule anmenn Zan ki osi apel Mark, avek zot. 38Me Pol ti estimen ki i pa byen anmenn li avek zot, akoz i ti'n kit zot Panfili e i pa ti reste pour fini sa misyon avek zot#15.38 War 13.13.. 39Zot ti ganny en largiman byen serye ki ti fer zot separe. Barnabas ti pran Mark avek li e anbark pour Zil Sip. 40Pol ti swazir Silas e zot ti ale, apre ki bann frer ti konfye zot avek lagras Senyer.

41Pol ti travers Siri ek Silisi. I ti fortifye lafwa bann Legliz.

Currently Selected:

Akt de Zapot 15: BSK

Highlight

Copy