Akt de Zapot 13

Barnabas ek Sol I Ganny Swazir pour En Misyon

1Dan Legliz Antyos, ti annan bann profet ek bann ansennyan: Barnabas, Simeon, ki zot ti apel Nizer, Lisiis ki sorti Sirenn, Manaen ki ti'n grandi avek gouverner Herod#13.1 Herod Antipas (war Lk 3.1)., ek Sol.

2En zour, pandan ki zot ti pe ador Senyer e fer zenn, Lespri Sen ti dir zot, “Met Barnabas ek Sol apar. Mon'n swazir zot pour akonpli en misyon.”

3Alor, zot ti priye e zennen. Apre, bann zapot ti enpoz lanmen lo zot e les zot ale.

Pol ek Barnabas dan Zil Sip

4Alor, Barnabas ek Sol ki ti'n ganny anvoye par Lespri Sen, ti desann Selesi, kot zot ti anbarke pour al dan zil Sip. 5Zot ti ariv Salamin, kot zot ti konmans anons Parol Bondye dan bann sinagog Zwif. Zan-Mark ti osi avek zot pour ed zot.

6Zot ti travers zil antye ziska Pafos. La, zot ti rankontre en mazisyen, en Zwif, en fo profet, ki ti apel Bar-Zezi. 7I ti en zanmi gouverner zil, ki ti apel Serziis Polis, en zonm tre entelizan. Sa gouverner ti konvok Barnabas ek Sol pour vin devan li, pour li antann Parol Bondye. 8Me mazisyen Elimas, sa i son non an Grek, ti opoz Barnabas ek Sol. I ti oule anpes gouverner krwar dan Parol Bondye. 9Alor, Sol ki ti osi apel Pol#13.9 Sol ti son non Zwif e Pol son non Romen War 22.27-29., ranpli avek Lespri Sen, ti fikse Elimas. 10I ti dir li, “Ou piti dyab, lennmi tou sa ki byen, ranpli avek riz ek malis! Kan eski ou pou arete fos laverite ek plan Senyer? 11Aprezan, ekoute: Senyer pou poz lanmen lo ou. Ou pou vin aveg, ou pa pou war lalimyer soley pour en pe letan.”

Deswit, Elimas ti santi en vwal pas lo son lizye. I ti war li dan fernwanr. I ti tat tate pour en dimoun atrap son lanmen e gid li. 12Kan i ti war sa ki ti'n arive, gouverner ti krwar. Annefe, lansennyman konsernan Senyer ti'n enpresyonn li en kantite.

Pol ek Barnabas dan Antyos Pisidi

13Pol avek son bann zanmi ti anbark Pafos pour al Perze, dan Panfili. La, Zan-Mark ti kit zot e retourn Zerizalenm.

14Sorti Perze, zot ti ariv Antyos dan Pisidi. La, zour saba, zot ti al dan sinagog kot zot ti asiz. 15Apre lektir dan liv Lalwa ek bann profet, bann sef sinagog ti fer dir zot, “Bann frer! Si zot annan okenn mesaz pour ankouraz lasanble, zot kapab pran laparol.”

16Pol ti leve e fer en siny avek lanmen. I ti dir: Mon bann zanmi Izraelit ek zot tou ki ador Bondye! Ekout mwan! 17Bondye pep Izrael, ti swazir nou bann zanset. I ti fer sa pep vin en gran nasyon pandan letan ki zot ti pe viv Lezip. Par pwisans son lebra, i ti delivre zot dan pei Lezip.

18Pandan anviron 40 an, i ti pran swen avek zot dan dezer#13.18 War Egz 1.7; 12.51; Nm 14.34; Det 1.31.. 19Apre ki i ti'n detri set nasyon dan pei Kanaan, i ti donn zot sa pei koman en posesyon#13.19 War Det 7.1; Zoz 14.1.. 20Tousala in dire pandan anviron 450 an.

Apre sa, i ti donn zot bann ziz ziska lepok profet Samyel#13.20 War Ziz 2.16; 1 Sam 3.20..

21Answit, zot ti demann en lerwa e Bondye ti donn zot Sail, garson Kis, sorti dan tribi Benzamen, ki ti renny pandan 40 an.

22Apre ki Bondye ti'n rezet Sail, i ti donn zot David koman lerwa. I ti dir lo son size: Mon'n trouv dan David, garson Zese, en zonm dapre mon leker, en zonm ki pou akonpli tou mon volonte#13.22 War 1 Sam 8.5,19; 10.21; 13.14; 16.12..

23Parey i ti promet, se apartir enn son desandan, ki Bondye ti fer sorti en Sover pour pep Izrael.

24Avan ki Zezi ti arive, Zan ti anons en batenm repantans avek pep Izrael antye#13.24 War Mrk 1.4; Lk 3.3.. 25Ver lafen son lavi, Zan ti dir, “Mon pa sa enn ki zot pe espere. Me apre mwan, pe vin enn ki mon pa diny pour delarg son sandal dan son lipye#13.25 War Zn 1.20; Mat 3.11; Mrk 1.7; Lk 3.16; Zn 1.27..”

26Mon bann frer! Zot ki desandan Abrahanm, e zot ki annan respe pour Bondye: Pour nou ki sa mesaz delivrans in ganny anvoye. 27Bann zabitan Zerizalenm ek zot bann sef ti refize rekonnet ki Zezi ti ete. Zot pa ti ni konpran parol bann profet ki zot lir sak saba. Me an kondannan Zezi, zot in akonpli sa bann parol. 28Menm ki zot pa ti trouv okenn rezon pour kondann li anmor, zot ti demann Pilat pour fer touy li. 29Apre ki zot ti'n akonpli tou sa ki Lekritir ti'n anonse lo son size, zot ti tir li lo lakrwa e met li dan en tonbo#13.29 War Mat 27.22-23, 57-61; Mrk 15.13-14,42-47; Lk 23.21-23, 50-56; Zn 19.15,38,42.. 30Me Bondye ti resisit li. 31Pandan plizyer zour, Zezi ti aparet avek bann ki ti'n vin avek li depi Galile ziska Zerizalenm#13.31 War 1.3.. Aprezan, zot son bann temwen devan pep Izrael. 32E nou, nou pe anons zot sa Bonn Nouvel: Promes ki Bondye ti fer avek nou bann zanset, 33i'n akonpli li aprezan pour nou, son bann desandan, par relev Zezi dan lanmor. Annefe, i'n ganny ekri dan dezyenm Psonm:

Ou menm mon Garson,

ozordi mon'n vin ou Papa#13.33 Ps 2.7..

34Konsernan lefet ki Bondye ti pou resisit li pour ki son lekor pa dekonpoze, la sa ki i ti dir:

Mon pou donn ou

bann benediksyon sen e sir,

ki mon ti promet David.

35Pour sa menm rezon, i afirmen ankor dan en lot pasaz:

Ou pa pou les ou Sen

war dekonpozisyon#13.35 Ps 16.10..

36Annefe, David ti akonpli plan Bondye dan son zenerasyon. Apre, i ti mor e ganny antere avek son bann zanset, e son lekor in pouri#13.36 War 1 Rwa 2.10.. 37Me sa enn ki Bondye in resisite, son lekor pa ti dekonpoze. 38Pour sa rezon, mon bann frer! Mon oule ki zot konnen: Se atraver Zezi ki pardon pese pe ganny anonse avek zot. 39Par li, tou dimoun ki krwar i ganny libere avek tou sa ki Lalwa Moiz pa ti kapab liber zot. 40Alor, fer atansyon ki sa ki bann profet in anonse pa ariv zot:

41Gete, zot ki kontan boufonnen,

reste etonnen, e disparet!

Annefe, mon pou fer en mervey, dan zot letan;

si dimoun ti ava rakont zot,

zanmen zot ti pou krwar#13.41 Hab 1.5..

42Letan Pol ek Barnabas ti pe kit sinagog, bann dimoun ti demann zot pour retournen en lot saba, pour koz plis lo sa bann size. 43Apre sa renyon, bokou parmi bann Zwif, ek bann ki'n konverti, ti swiv Pol ek Barnabas. Sa de zapot ti koz avek zot e ankouraz zot pour reste fidel dan lagras Bondye.

44Saba swivan, preski tou dimoun dan lavil ti vin ekout Parol Senyer. 45Ler bann Zwif ti war sa kantite dimoun, zot ti ranpli avek zalouzi. Zot ti kontredir Pol e ensilte li.

46Alor, Pol ek Barnabas ti dir avek konviksyon, “I ti neseser ki Parol Bondye i ganny anonse avek zot an premye. Me akoz zot rezet li e ki zot pa konsider zot diny pour lavi eternel, alor, aprezan nou tourn nou ver bann non-Zwif. 47Annefe, sanmenm sa ki Senyer in ordonn nou:

Mon'n etabli ou koman lalimyer pour bann nasyon,

pour ki ou anmenn delivrans

ziska landrwa pli lwen lo later#13.47 Eza 49.6..”

48Kan bann non-Zwif ti antann sa parol, zot ti dan lazwa e zot ti loue Parol Senyer. Tou bann dimoun ki Bondye ti'n swazir pou ganny lavi eternel ti vin krwayan.

49Parol Senyer ti pe repann dan sa rezyon antye. 50Me bann Zwif ti eksit bann fanm enportan dan lasosyete ki ti ador Bondye, ek bann personnalite enportan dan lavil. Zot ti konmans en persekisyon kont Pol ek Barnabas e sas zot dan zot teritwar. 51Bann zapot ti sekwe kont zot lapousyer zot lipye#13.51 War Mrk 6.11. e zot ti al dan lavil Ikonyonm. 52Kanta bann disip, zot ti ranpli avek lazwa e avek Lespri Sen.

Currently Selected:

Akt de Zapot 13: BSK

Highlight

Copy