Akt de Zapot 12

Lanmor Zak

1Dan sa letan, lerwa Herod#12.1 Herod Agripa I, neve Herod Antipas. I ti renny lo Zide antye, 41-44 apre Zezi-Kri. ti konmans persekit serten bann manm dan Legliz. 2I ti fer touy Zak, frer Zan, par lepe. 3Kan i ti war ki tousala ti fer plezir bann Zwif, i ti osi fer aret Pyer. Sa ti pas pandan lafet Dipen san lelven#12.3 War Egz 12.1-27.. 4Donk, kan Pyer ti'n ganny arete, Herod ti fer met li dan prizon. I ti donn lord pour ki kat group solda i vey li. I ti annan lide fer ziz li an piblik apre Pak. 5Pandan ki Pyer ti dan prizon, bann manm Legliz ti pe priy Bondye pour li avek bokou ferver.

En Lanz I Delivre Pyer dan Prizon

6Sa menm swar, kan Herod ti pou fer li paret devan lakour, Pyer ti pe dormi ant de solda. I ti'n ganny atase avek de lasenn. Ti osi annan bann gard devan laport prizon. 7Toutakou, en lanz Senyer ti aparet e en lalimyer ti ekler sa kaso. Lanz ti tap Pyer dan son kote e revey li, “Leve, vit!”

Bann lasenn lo son pwannyen ti tonbe. 8Lanz ti dir li, “Met ou sang e atas ou sandal.”

Pyer ti fer parey lanz ti dir li. Lanz ti dir li ankor, “Met ou palto e swiv mwan.”

9Pyer ti sorti e swiv lanz. I pa ti realize ki sa ki lanz ti pe fer ti reel. I ti krwar ki i ti pe ganny en vizyon.

10Zot ti pas premye group gard, apre dezyenm e zot ti ariv kot baro an fer ki vir kote lavil. Sa baro ti ouver tousel devan zot e zot ti sorti. Zot ti desann dan lari, e toutakou lanz ti kit Pyer.

11Alor, Pyer ti realize sa ki ti'n ariv li. I ti dir, “Aprezan mon war ki tousala i vre: Senyer in anvoy son lanz. I'n delivre mwan anba pouvwar Herod e anba tou dimal ki bann Zwif ti pe swete ariv mwan.”

12Kan Pyer ti realize kot i ti ete, i ti al kot Mari, manman Zan ki ti osi apel Mark. Plizyer dimoun ti'n rasanble laba e zot ti pe priye. 13Pyer ti tap laport. En servant ki ti apel Rod ti vin ouver. 14Me ler i ti rekonnet lavwa Pyer, dan son kontantman, i pa ti ouver laport, me i ti taye pour al anonse ki Pyer ti la deor. 15Zot ti dir li, “Ou fol!”

Me i ti ensiste ki i vre. Alor zot ti dir, “Sa i son lanz!”

16Pyer ti kontinyen tap laport. Kan zot ti ouver e war li, zot ti reste etonnen. 17I ti fer siny avek son lanmen pour zot reste trankil e i ti eksplike koman Senyer ti'n delivre li dan prizon. I ti azoute, “Al anons sa Zak ek lezot bann frer.”

Apre, i ti sorti e al en lot landrwa.

18Kan lizour ti fer, ti annan en bann lazitasyon parmi bann solda ki ti pe demande ant zot sa ki ti'n arive avek Pyer. 19Herod ti fer rod li, me zot pa ti trouv li. I ti fer kestyonn bann gard e donn lord pour met zot anmor. Answit, Pyer ti kit Zide e al Sezare kot i ti reste pandan en serten letan.

Lanmor Herod

20Herod ti pran en gran lakoler avek bann zabitan Tir ek Sidon. Alor, sa bann zabitan ti tonm dakor pour al war li. Zot ti ganny dan zot kote Blastis, en zofisye enportan dan servis lerwa, pour al demann lerwa Herod pour fer lape. Annefe, zot pei ti depann lo son rwayonm pour ganny aprovizyonnen.

21Lo zour fikse, Herod ti met son lenz rwayal, asiz lo son tronn e adres lepep. 22Lepep ti kriye, “Sa pa en zonm ki pe koze, me en bondye!”

23Me dan sa menm moman, en lanz Senyer ti frap Herod#12.23 Herod Agripa ti mor dan lannen 44., akoz i pa ti rann Bondye loner ki i merite. Lever ti devor li e i ti mor.

24Sepandan Parol Bondye ti fannen e progrese plis ankor. 25Kan Barnabas ek Sol ti'n termin zot misyon Zerizalenm, zot ti retournen e anmenn avek zot Zan, ki ti osi apel Mark.

Currently Selected:

Akt de Zapot 12: BSK

Highlight

Copy