Kolosyen 1

Konpliman

1Sa let i sorti kot Pol ek Timote nou frer, bann serviter Zezi-Kri, par lavolonte Bondye. 2Pour bann pep Bondye ki reste Kolos, ek nou bann frer ek ser fidel ini avek Kris: Nou demande ki Bondye nou Papa e Senyer Zezi-Kri i akord zot lagras ek lape.

Rekonesans

3Kan nou priy pour zot, nou touzour remersye Bondye, e Papa nou Senyer Zezi-Kri. 4Annefe, nou'n antann koz lo zot lafwa dan Zezi-Kri ek zot lanmour pour tou bann krwayan. 5Kan pour premye fwa mesaz laverite, Bonn Nouvel, ti ariv kot zot, zot ti ganny anonse lesperans ki ti rezerve pour zot dan lesyel. Se pour sa rezon, ki zot lanmour ek zot lafwa i fonde lo sa ki zot pe espere. 6Mesaz Bonn Nouvel i kontinyen repann e raport fri dan lemonn antye, parey in fer parmi zot, depi sa zour ki pour premye fwa, zot ti antann koz lo lagras Bondye e konnen ki i ete vreman. 7Epafras, nou bon koleg travay, ki ti donn zot sa lansennyman. I ti pour zot, en fidel serviter Kris. 8In fer nou konn zot lanmour ki Lespri Sen in donn zot.

9Pour sa rezon, depi ki nou'n antann koz lo zot, nou'n kontinyen priy pour zot. Nou demann Bondye pour fer zot konn plennman son lavolonte, avek lasazes ek disernman ki son Lespri i donnen. 10Konmsa, zot ava kapab viv en lavi ki Bondye i aprouve e ki fer li plezir dan tou sa ki zot fer. Konmsa, par zot bann bon aksyon, zot ava prodwir fri e progrese dan konnesans Bondye. 11Nou demann Bondye pour fortifye zot par pwisans son mazeste, pour ki zot ava kapab siport tou avek pasyans. 12Remersye Bondye nou Papa dan lazwa: I'n rann zot kapab ganny par dan leritaz pep Bondye dan son rwayonm lalimyer. 13Annefe, i'n fer nou sorti dan pwisans teneb e i'n transfer nou dan rwayonm son Garson byenneme. 14Par li, Bondye in delivre nou e nou pese i'n ganny pardonnen.

Travay Kris

15Kris i zimaz vizib Bondye ki envizib. I lene dan kreasyon antye. 16Annefe, par li, Bondye in kree tou sa ki egziste dan lesyel e lo later, sa ki vizib e sa ki envizib, pwisans spirityel, pouvwar, gouvernman ek lotorite. Tousala, in ganny kree par li e pour li.

17Kris i egziste avan tou keksoz, e dan li, tou keksoz i tenir ansanm. 18I latet sa lekor, ki son Legliz; li menm konmansman, lene parmi bann ki'n resisite, pour li vin premye dan tou keksoz. 19Bondye i oule ki son natir antye i reste dan son Garson. 20Par li, Bondye in oule rekonsilye liniver antye avek li. Par lanmor son Garson lo lakrwa, in etabli lape pour tou dimoun, lo later koman dan lesyel.

21Otrefwa, zot ti etranze e lennmi Bondye. Zot ti son lennmi akoz tou bann move aksyon ki zot ti mazinen e ki zot ti komet. 22Me aprezan, par lanmor ki son Garson in sibir dan son lekor, Bondye in rekonsilye zot avek li, e fer zot vin sen, pir e san defo devan li.

23Sepandan, fodre ki zot kontinyen reste fidel dan lafwa lo en fondasyon solid. Fodre pa les zot ganny antrennen lwen avek sa lesperans ki zot in gannyen depi ki zot in antann Bonn Nouvel. Sanmenm sa Bonn Nouvel ki'n ganny anonse avek tou dimoun dan lemonn antye e pour ki mwan, Pol, mon'n vin son serviter.

Responsabilite Pol anver Legliz

24Aprezan, mon trouv mon lazwa dan bann soufrans ki mon pe pas atraver pour zot. Par mon bann soufrans fizik, mon pe kontinyen konplet soufrans lekor Kris, setadir, Legliz. 25Annefe, mon'n vin serviter Legliz par sa responsabilite ki Bondye in konfye mwan pour akonplir pour zot, setadir, pour anons son mesaz: 26Sa i mister ki'n reste kasyet depi touzour avek limanite, me ki aprezan i'n ganny revele avek bann ki'n aksepte vin pour li. 27Annefe, Bondye in oule fer konn sa plan sekre ki ris e manifik e ki i'n prepare an faver tou bann pep. E sekre sa plan, se ki Kris i dan zot; i donn zot lasirans ki zot ava pran par dan laglwar Bondye. 28Pour sa rezon, nou pe anons Kris avek tou dimoun. Nou pe averti e ansenny zot tou, avek tou lasazes posib, pour rann zot parfe dan Kris. 29Pour sa rezon ki mon travay dir pour ranpli sa misyon, e mon lite avek tou sa gran lafors Kris ki i azir dan mwan; lafors ki Kris in donn mwan.

Currently Selected:

Kolosyen 1: BSK

Highlight

Copy