2 Tesalonisyen 2
2
Revolt Final
1Mon bann frer ek ser! Pour sa ki konsern retour nou Senyer Zezi-Kri ek nou rasanbleman avek li, mon sipliy zot: 2Pa les zot lespri trouble fasilman ni alarme, si en dimoun i vin anonse ki zour Senyer in arive. Pa krwar li, menm si i pretann ki en profesi, en deklarasyon oubyen en let i sorti kot nou.
3Pa les personn tronp zot dan okenn fason. Sa zour pa pou arive avan ki sa gran revolt kont Bondye i arive e sa gran rebel i ganny revele. Avan ki sa lennmi ki'n ganny destinen pour destriksyon, i aparet. 4Li menm sa lennmi ki pou kont tou sa ki zonm i adore, e ki'n ganny konsakre pour Bondye. I pou menm enstal li dan Tanp Bondye e fer li pas pour Bondye. 5Zot ava rapel ki mon ti koz lo la, kan mon ti ankor avek zot.
6Aprezan, zot konnen kwa ki pe retenir li. Alor, I pou aparet kan son letan pou arive. 7Annefe, sa pwisans move i deza pe travay an sekre. Me sa bann levennman pou arive selman kan sa enn ki pe retenir li ava les li fer.
8Alor, sa pwisans move pou aparet. Senyer Zezi pou touy li par souf sorti dan son labous. I pou detri li par manifestasyon son retour. 9Sa pwisans move pou azir avek pwisans Satan. I pou fer toudsort mirak ek bann siny ekstraordiner pour tronp dimoun. 10I pou servi tou kalite move aksyon pour tronp sa bann ki pou ganny detri akoz zot pa'n akey, ni kontan laverite ki ti ava'n sov zot. 11Pour sa rezon, Bondye i anvoy lo zot en pwisans ki pous zot pour fer zot krwar dan mansonz. 12Alor, tou bann ki pa'n krwar laverite, me ki'n pran plezir dan sa ki mal, pou ganny kondannen.
13Kanta nou, frer ek ser! Nou devre toultan remersye Bondye pour zot, ki Senyer i kontan. Annefe, Bondye in swazir zot an premye pour li sov zot, par Lespri ki rann zot lavi sen, e gras a zot lafwa dan laverite. 14Se pour sa osi ki Bondye in apel zot par Bonn Nouvel ki nou'n anonse, pour ki zot annan par dan laglwar nou Senyer Zezi-Kri.
15Alor, mon bann frer ek ser! Reste solid e gard byen bann lansennyman ki nou'n transmet zot, swa par parol oubyen par let.
16Mon demande ki nou Senyer Zezi-Kri li menm, e Bondye, nou Papa ki'n kontan nou, e ki, par son lagras, i donn nou en lankourazman eternel ek en bon lesperans, 17i ranpli zot leker avek kouraz; ki i donn zot lafors pour touzour pratik sa ki byen, par aksyon e an parol.
Currently Selected:
2 Tesalonisyen 2: BSK
Highlight
Share
Copy
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.
