2 Makabe 11
11
Laviktwar Makabe lo Lisyas
(1 Mak 4.26-35)
1En pti pe letan apre, Lisyas, titer e paran lerwa, sef zafer gouvernman, ti pran lakoler kan i ti antann sa ki ti'n arive.
2I ti mobiliz anviron 80,000 zonm apye ek tou son kavalri e sorti pour al atak bann Zwif. I ti annan plan pour fer Zerizalenm vin en lavil Grek. 3I ti oule fer tanp pey taks parey lezot pep. I ti oule osi met fonksyon Gran-Pret an vant toulezan. 4I pa ti tenir kont pwisans Bondye, me i ti plito met son konfyans dan son 10,000 zonm apye, son bann milye kavalye ek son 80 lelefan.
5I ti antre dan Zide e atak Bet-Sour, en fortres ki ti anviron 28 kilomet Sid avek Zerizalenm.
6Kan Zida ek son bann zonm ti aprann ki Lisyas ti pe atak bann fortres dan pei, zot ti rasanble lepep. Ansanm zot ti priy Senyer, fer bann lamantasyon, plere, pour li anvoy en bon lanz pour vin delivre pep Izrael. 7Zida ti premye pour pran zarm e ankouraz lezot pour riske zot lavi ansanm avek li pour ed zot bann frer. Ranpli avek kouraz, zot tou, zot ti sorti ansanm.
8Zot ti pre avek Zerizalenm, kan en kavalye dan lenz blan ki ti pe balans son zarm annor, ti aparet devan zot. 9Ansanm zot ti loue Bondye pour son bonte. Pouse par en gran kouraz, zot ti pare pour atak pa zis zonm, me osi zannimo pli feros, e menm miray an fer. 10Zot ti avans dan pozisyon lager avek led sa kavalye sorti dan lesyel. Annefe, Senyer ti'n pran pitye pour zot. 11Zot ti lans kont lennmi koman bann lyon. Zot ti fer tonbe 11,000 zonm apye avek 1,600 kavalye, e fors lezot sove. 12Laplipar ti ganny depouye e blese. Lisyas osi ti sove dan laont.
Lisyas I Fer Lape avek bann Zwif
(1 Mak 6.57-61)
13Sepandan, Lisyas ki pa ti bet ditou, ti mazin defet ki i ti'n fek pas ladan. I ti realize ki Bondye ti avek bann Zwif e ki i ti enposib bat zot. Alor, i ti anvoy bann mesaze 14pour propoz zot lape baze lo bann kondisyon zis. I ti osi promet pour fors lerwa tret zot koman son zanmi.
15Zida ki ti kontan byennet tou dimoun, ti aksepte tou sa ki Lisyas ti'n propoze. Lo son kote, lerwa ti aksepte tou sa ki Zida ti demande e prezante par ekri, delapar bann Zwif.
16La sa ki Lisyas ti dir bann Zwif dan son let: Konpliman sorti kot Lisyas pour pep Zwif! 17Bann mesaze, Zan ek Absalon#11.17 War 1 Mak 11.70; 13.11., in delivre sa dokiman sinyen par zot, konsernan zot propozisyon. 18Mon'n pas lenformasyon avek lerwa e i'n aksepte tou sa ki ti posib. 19Si zot gard sa bon dispozisyon anver gouvernman, mon ava fer tou sa ki posib dan lavenir pou travay pour zot byennet.
20Konsernan lezot zafer ek bann detay, mon'n donn lord sa bann zonm ek mon bann reprezantan pour diskit avek zot.
21Meyer salitasyon!
Ekri le 24, dan mwan Dioskor, lannen 148#11.21 Savedir dan lannen 164 avan Zezi-Kri..
Antyokis I Ekri Lisyas ek bann Zwif
22La let ki lerwa ti adres Lisyas:
Lerwa Antyokis, avek konpliman, pour son frer, Lisyas.
23Depi ki mon papa in al rezwenn bann bondye, i nou dezir ki tou zabitan dan sa rwayonm i okip zot prop zafer san ganny trakase. 24Nou konnen ki bann Zwif pa enterese pour aksepte koutim Grek e zot in demande ki zot ganny permisyon viv dapre zot prop koutim.
25Donk, akoz mon oule ki sa pep osi pa ganny trakase, mon deside ki zot tanp i ganny rann e ki zot viv dapre koutim zot bann zanset. 26Alor, i ava byen ki ou enform ou pep mon desizyon e asir zot nou lentansyon amikal. Konmsa, avek konfyans, zot ava okip zot prop zafer dan lape.
27La sa ki lerwa ti ekri pour pep Zwif:
Lerwa Antyokis, avek konpliman, pour konsey bann ansyen Zwif ek lepep Zwif antye.
28Nou swete ki zot byen; nou osi, nou an bonn sante. 29Menelas#11.29 War 4.23-25. in fer nou konnen ki zot oule retourn kot zot pour okip zot prop zafer.
30Donk, mon garanti lanmnesti pour sa bann ki retourn kot zot avan le 30, dan mwan Ksantik. 31Zot ava kapab swiv zot prop lalwa e manz sa ki fer zot plezir parey dan lepase. An plis, sa enn ki komet en fot envolonterman, pa pou ganny pini. 32Mon'n osi anvoy Menelas pour trankiliz zot.
33Port zot byen!
Ekri le 15, dan mwan Ksantik, lannen 148#11.33 Savedir dan lannen 164 avan Zezi-Kri..
Let bann Romen pour bann Zwif
34Lo zot kote, bann Romen ti ekri bann Zwif sa let: Kentis Memiis ek Titis Maniis, delege Romen, avek konpliman pour bann Zwif.
35Nou donn plen konsantman konsernan tou bann propozisyon ki Lisyas, paran Lerwa, in akord zot. 36Me konsernan bann zafer ki i devre soumet avek lerwa, osito ki zot in fini byen ganny pran an konsiderasyon, anvoy kot nou san tarde, pour nou propoz avek lerwa keksoz ki ava dan zot faver. Annefe, nou pe al Antyos.
37Alor, san tarde anvoy zot bann mesaze kot nou pour fer konn zot lopinyon.
38Port zot byen!
Ekri le 15, dan mwan Ksantik, lannen 148.
Currently Selected:
2 Makabe 11: BSK
Highlight
Share
Copy
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.