2 Makabe 10
10
Pirifikasyon Tanp
(1 Mak 4.36-61)
1Makabe avek son bann zonm ti les zot ganny gide par Senyer. Zot ti repran kontrol tanp ek lavil Zerizalenm. 2Zot ti detri bann lotel ki bann etranze ti'n konstri e detri osi bann landrwa adorasyon. 3Zot ti pirifye tanp e konstri en nouvo lotel pour sakrifis. Zot ti frot de ros ansanm e apartir letensel, alim dife lo lotel. Pour premye fwa depi 2 an, zot ti ofer en sakrifis. Zot ti bril lansan, alim bann lalanp e plas dipen pour sakrifis.
4Ler zot ti'n fini, zot ti prostern lafas ater e priy Senyer pour ki zot pa zanmen tonm dan sa sityasyon ankor. Me, si zot arive fer pese, zot ava ganny pini avek moderasyon, san bezwen ganny livre dan lanmen bann nasyon barbar ki ensilte son non.
5Sa zour ki tanp ti ganny rekonsakre ti tonm menm zour ki bann etranze ti'n profann li: Vennsenkyenm zour dan mwan Kislev#10.5 War Neh 1.1.. 6Selebrasyon ti ganny fer pandan wit zour dan lazwa, parey pour lafet bann Payot#10.6 War sa mo dan Vokabiler., ki ti rapel zot ki zot ti eran dan bann montanny e dan bann kavern, parey zannimo sovaz. 7Pour sa rezon ki zot ti anmenn bann bouke feyaz, bann brans ek fey palm. Zot ti sant kantik remersiman pour sa enn ki'n permet zot pirifye son tanp. 8Par en vot aprouve e konfirmen dan lasanble, zot ti donn lord ki nasyon Zwif antye i selebre sa lafet toulezan.
9Ensi Antyokis, ki ti osi apel Epifann, ti mor.
Antyokis Epator I Vin Lerwa
10Aprezan, nou pou rakont sa ki ti arive anba Antyokis Epator, garson sa zonm ki ti napa respe pour Bondye. Nou pou rakont an bref, bann maler ki i'n anmennen avek lager.
11Kan sa zonm ti vin lerwa, i ti nonm en serten Lisyas gouverner ansef Gran Siri ek Fenisi. 12Ptoleme, alyas Makronn, ti premye pour met an pratik lazistis anver bann Zwif ki ti'n sibir en kantite lenzistis. I ti esey etablir lape ant zot. 13Pour sa rezon, i ti ganny akize par bann zanmi lerwa devan Epator. Dimoun ti souvan akiz li koman en tret. Annefe, lerwa Filometor ti'n konfye li Sip. Me i ti'n abandonn sa zil e pas lo kote Antyokis Epifann. Akoz i ti nepli kapab gouvern avek loner, i ti touy son lekor avek en pwazon.
Zida I Atak Idoume
(1 Mak 5.1-8)
14Kan Gorzyas ti vin gouverner sa rezyon, i ti rekrit bann mersener. Tou lokazyon ti bon pour li atak bann Zwif. 15Anmenmtan, bann Idoumeen ki ti pe okip bann fortres, ti pe toultan atak bann Zwif. Zot ti akey bann ki ti'n ganny pouse dan Zerizalenm e fer tou pour provok lager.
16Makabe avek son bann zonm, apre ki zot ti'n priy an piblik pour demann Bondye vin zot alye, ti al atak fortres bann Idoumeen. 17Zot latak ti vyolan. Zot ti fer bann ki ti lo ranpar rekile e okip sa bann pozisyon. Zot ti touy tou bann ki ti tonm anba zot lanmen. Zot ti touy omwen 20,000 zonm.
18Pourtan, anviron 9,000 zonm ti al refizye dan de fortres byen proteze, kot ti annan tou sa ki fodre pou reziste en long latak. 19Alor, Makabe ti kit deryer Simon, Zozef ensi ki Zase avek son latroup: En larme ase for pour kontinyen anserkle zot. Li, i ti al dan bann landrwa kot zot ti pli bezwen li.
20Me bann zonm ki ti avek Simon, par lanmour pour larzan, ti aksepte gous avek serten ki ti dan bann tour: Zot ti aksepte 70,000 pyes larzan pour les zot sove.
21Kan Zida ti antann sa zafer, i ti rasanble bann sef larme. I ti akiz bann koupab konmkwa zot in vann zot bann frer. Annefe, pour larzan, zot ti'n larg lennmi ki ti pre pour konbat kont zot. 22Zida ti touy sa bann tret e deswit pran sa de fortres.
23Zida ti pe ganny laviktwar dan son bann ekspedisyon militer: I ti touy plis ki 20,000 zonm dan sa de fortres.
Viktwar Zida kont Timote
24Timote ki ti'n deza perdi lager kont bann Zwif#10.24 War 8.30., ti mobiliz en gran group mersener ek en kantite seval sorti Lazi. Avek son larme, i ti al atak Zide dan lentansyon pour pran sa pei pardfors.
25Kan Timote ti pe aprose, Zida ek son bann zonm ti fann lapousyer lo zot latet, met lenz dey e priy Bondye. 26Zot ti prostern lafas ater devan lotel. Zot ti demann Bondye pour vin lennmi zot bann lennmi, ladverser zot bann ladverser, parey Lalwa i deklare#10.26 War Egz 23.22..
27Apre sa lapriyer, zot ti pran zot zarm e al pran pozisyon en bon distans avek lavil. Kan zot ti pre avek lennmi, zot ti arete. 28Lannmen byen granmaten, sa de larme ti konfront kanmarad dan konba. Pour zot ganny laviktwar, bann Zwif ti kont lo kouraz zot bann zonm, me sirtou lo led Senyer. Larme Timote li, ti les li gide dan konba par zot lakoler.
29Letan konba ti feros, bann lennmi ti war aparet dan lesyel, senk kavalye manifik, seval avek labrid annor, e ki ti vin plas zot devan bann Zwif. 30De parmi sa senk kavalye ti plas zot ant Zida pour protez li avek zot zarm e anpes li ganny blese. Zot ti ebloui lennmi avek bann fles ki zot ti tire. Lennmi ti fannen an dezord e dan konfizyon. 31Zot ti touy anviron 20,500 solda apye e 600 kavalye ti ganny egorze.
32Timote ti sov dan en fortres ki ti apel Gazara e ki ti anba komannman Kereas. 33Pandan kat zour, Zida ek son bann zonm ti atak sa fortres avek kouraz. 34Bann ki ti annan konfyans dan sa fortres kot zot ti ete, ti kontinyen zoure e maltret Bondye bann Zwif avek bann parol ensiltan.
35Granmaten senkyenm zour, 20 zonm dan larme Zida, ranpli avek lakoler akoz sa bann ensilt kont Bondye, ti atak miray avek tou zot kouraz. Zot ti masakre tou sa ki zot ti zwenn lo zot semen. 36Lezot zonm ti swiv zot legzanp: Zot ti fer letour fortres e atak lennmi par lot kote. Zot ti met dife lo bann ta dibwa pour bril bann ki ti pe ensilte Bondye. Zot ti osi fer en pasaz pour ariv kot leres larme lennmi. Zot ti pran lavil fasilman. 37Zot ti touy Timote ki ti pe kasyet dan en sitern. Zot ti touy li, ensi ki son bann frer Kereas ek Apolofann.
38Apre sa bann sikse, zot ti sant kantik remersiman ek louanz devan Senyer pour son labonte anver pep Izrael ki i'n donn laviktwar.
Currently Selected:
2 Makabe 10: BSK
Highlight
Share
Copy
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.