2 Makabe 1
1
Let pour bann Zwif ki Lezip
1Bann Zwif ki Zerizalenm ek bann ki reste dan Zide i salye zot bann frer Zwif ki Lezip. I swet zot vre lape.
2Nou swete ki Bondye i rapel son lalyans ki i ti fer avek son bann serviter fidel, Abrahanm, Izaak ek Zakob, e ki i kouver zot avek son benediksyon.
3Nou swete ki i donn zot sa dezir pour ador li e fer son lavolonte avek tou zot leker ek en bon lespri.
4Nou swete ki i ava ouver zot leker pour son Lalwa ek son komannman, e ki i ava akord zot lape.
5Nou swete ki zot lapriyer ava ganny ekoute, zot pese ava ganny pardonnen e ki zot pa ava ganny abandonnen kan zot dan maler. 6Sa i nou lapriyer ki nou pe met devan Bondye dan zot faver konmela menm.
7Dan lannen 169#1.7 Bann lannen ti ganny kalkile dapre renny bann lerwa Grek, pa dapre kalandriye kontanporen. Alor, lannen 169 i koresponn avek lannen 143-142 avan Zezi-Kri., kan Demetriis ti lerwa Siri, nou, bann Zwif, nou ti ekri zot pour fer zot konnen ki depi ki Zason ek son group ti rebele kont lotorite later sent ek Bondye, nou trouv nou dan gran maler. 8Sa bann zans in bril gran laport tanp e fer koule disan bann inosan. Nou ti priy Senyer e in ekout nou; nou ti ofer sakrifis ek lofrann vezetal; nou ti alim bann lalanp e prezant bann dipen. 9Nou ankouraz zot pour selebre lafet bann Payot#1.9 War sa mo dan Vokabiler. dan mwan Kislev.
Sa ti ganny ekri dan lannen 188#1.9 Savedir dan lannen 124 avan Zezi-Kri..
Let pour Aristobil
10Bann zabitan Zerizalenm ek Zide, Konsey bann ansyen ek Zida, pour Aristobil, dan lafanmir bann pret konsakre par lonksyon, konseye lerwa Ptoleme, ek bann Zwif ki reste Lezip: Konpliman ek swe bonn sante!
11Nou remersye Bondye dan fon nou leker, akoz in delivre nou dan gran danze e i'n pran nou kote, kont lerwa. 12Annefe, in sas bann ki ti'n vin pour atak lavil sen.
13Kan lerwa Antyokis ti ariv Lapers, i ti sanble ki personn pa kapab bat son larme. Me zot tou, zot ti ganny masakre dan tanp Nanea par riz bann pret. 14Annefe, avek preteks pour selebre son maryaz avek Nanea, Antyokis ti'n vin avek son bann zanmi pli pros. An realite, i ti'n vin pour akapar bann trezor ki dan tanp. 15Apre ki bann pret dan tanp Nanea ti'n ekspoz bann trezor, Antyokis avek detrwa son bann zonm ti antre par laport akote pour al pran bann trezor. De ki i ti'n antre, bann pret ti ferm laport. 16Zot ti ouver en laport sekre dan plafon, saboul zot avek ros e kraz Antyokis ek son bann zonm. Apre, zot ti koup bann kadav an morso, sot zot latet ki zot ti anvoy avek bann dimoun ki ti deor.
17Nou loue nou Bondye pour tou sa ki i'n fer! In pini sa bann ki'n fer sakrilez.
Dife I Bril Sakrifis Nehemi
18Le 25 dan mwan Kislev, nou pou selebre lafet Pirifikasyon tanp. Nou krwar i neseser fer zot konnen, pour ki zot osi selebre sa lafet, parey pour lafet bann Payot. Zot ava osi rapel lafet Dife, ki ti aparet lo lotel, kan Nehemi ki ti konstri tanp, ti ofer bann sakrifis.
19Annefe, dan lepok ler nou bann zanset ti ganny anmennen prizonnyen an Pers, bann pret fidel anver Lalwa Bondye, ti pran dife an sekre e kasyet li dan fon en pwi sek. Zot ti fer sir ki personn pa ti konn sa landrwa.
20En bann lannen ti pase. Answit, kan Bondye ti ziz bon, Nehemi ti ganny anvoye Zerizalenm par lerwa Pers. I ti anvoy desandan bann pret al sers sa dife ki zot ti'n kasyet. Zot ti raporte ki olye dife, zot ti war zis en likid epe. I ti donn zot lord pour anmenn en pe sa likid.
21Kan tou preparasyon ti'n fer pour sakrifis, Nehemi ti donn lord vid sa likid lo dibwa ek tou sa ki ti lo la. 22Apre ki zot ti'n fer sa, e plitar, kan soley ki ti'n ganny kouver par bann nyaz, en gro dife ti pran e tou dimoun ti dan en gran letonnman.
23Pandan ki sakrifis ti pe brile, bann pret ek lasanble antye ti fer en lapriyer. Zonatan ti priy an premye; lezot, Nehemi ek leres dimoun ti reponn. 24La konman i ti priye:
Senyer! Senyer Bondye!
Ou ki kreater tou keksoz.
Ou terib, for, zis e ranpli avek lanmour.
Ou tousel ki lerwa; zis ou ki bon.
25Ou tousel ki zenere, zis, toupwisan
e ou viv pour touzour.
Ou'n swazir nou bann zanset
pour fer zot en pep konsakre pour ou
e ou delivre Izrael dan tou mal.
26Aksepte sa sakrifis
delapar ou pep Izrael antye.
Prezerv ou pep ki ou'n swazir; konsakre zot.
27Rasanble nou pep ki'n ganny disperse.
Delivre bann ki dan lesklavaz
parmi bann nasyon etranze.
Zet en regar lo bann ki'n ganny rezete e meprize.
Alor, lezot pep ava rekonnet
ki ou nou Bondye.
28Pini bann diktater ki kraz nou
e ki ensilte nou avek arogans.
29Retabli ou pep dan ou later sen,
parey Moiz ti anonse.
Lanperer Pers I Tann Koz lo Sa Dife
30Apre, bann pret ti konmans sant kantik. 31Kan sakrifis ti'n fini brile, Nehemi ti donn lord ki delo ki reste, i ganny vide lo bann gro ros. 32Kan zot ti fini, en gro dife ti pran, me dife lotel ti pli for e i ti tenny li.
33Nouvel sa levennman ti fannen. Zot ti rakont lerwa Pers ki dan landrwa kot bann pret ti kasyet sa dife avan zot ganny deporte, zot ti trouv en likid ki Nehemi ek son bann zanmi ti servi pour alim dife sakrifis. 34Lerwa ti fer en lanket e bar sa landrwa ki i ti deklar en landrwa sakre. 35Lerwa ti fer larzan avek sa e i ti donn kado son bann prefere. 36Nehemi ek son bann zanmi ti apel sa likid neftar, savedir, pirifikasyon; me laplipar dimoun ti apel li nafta.
Currently Selected:
2 Makabe 1: BSK
Highlight
Share
Copy
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.