1 Makabe 14
14
Simon I Ganny Felisite
1Dan lannen 172#14.1 Savedir depi Oktob 141 ziska Septanm 140 avan Zezi-Kri., lerwa Demetriis ti rasanble son larme e al dan pei Medi pour demann led, pour li al lager kont Trifon.
2Kan Arsas, lerwa Lapers ti tande ki Demetriis in antre dan son teritwar, i ti anvoy enn son bann zeneral pour al pran li vivan. 3Sa zeneral ti ale e bat larme Demetriis. Zot ti sezi li e anmenn li kot Arsas ki ti met li dan prizon.
Poenm lo Simon
4Pei Zide ti reste anpe pandan tou lavi Simon.
Pandan tou son lavi, i ti rod lentere son nasyon.
5Pour azout plis loner, i ti pran por Zafa
e ouver en larout maritim ver bann zil Grek.
6I ti agrandi teritwar son nasyon,
e pran kontrol pei antye.
7I ti fer en kantite prizonnyen lager.
I ti pran lavil Gezer, Bet-Sour ek sitadel Zerizalenm.
I ti retir tou sa ki fer sa lavil enpir.
Personn pa ti kapab opoz li.
8Bann zabitan ti kiltiv zot later anpe;
prodiksyon ti ogmante.
Bann pye fri dan laplenn ti raporte.
9Bann vyeyar ti kapab asiz lo bann plas piblik.
Zot ti koz zis lo bann levennman ere.
Bann zennzan ti met zoli liniform militer.
10Simon ti fer asir provizyon manze pour lavil.
Bann militer ti ganny provizyon zarm pour zot defans.
Son renonmen ti ariv ziska dan bout later.
11I ti etabli lape dan pei.
Pep Izrael ti viv dan lazwa.
12Sakenn ti viv an sekirite dan son plantasyon rezen ek fig,
san ki personn i vin fer zot per.
13Ti nepli annan personn pour lager kont bann Zwif.
Sa lepok, bann lerwa etranze ti'n ganny kraze.
14Simon ti donn lasistans bann pov parmi son pep.
I ti aplik Lalwa, e fer disparet bann foter dezord.
15I ti rann tanp laglwar ki i ti annan avan.
I ti ogmant lakantite lobze sakre dan tanp.
Bann Spart I Ekri Simon
16Nouvel lanmor Zonatan ti ariv Ronm, menm ziska Spart. Dimoun ti regret en kantite. 17Kan zot ti tande ki Simon son frer, ti'n vin Gran-Pret dan son plas, e ki i ti pe kontrol pei ek bann lavil, 18zot ti fer grave lo bann tablet an bronz, renouvelman trete lalyans ek lanmitye ki zot ti'n deza etabli avek son bann frer, Zida ek Zonatan. 19Sa bann tablet ti ganny lir devan lasanble dan Zerizalenm.
20La en kopi sorti kot bann Spart:
“Bann dirizan ek lavil Spart i anvoy konpliman pour Gran-Pret Simon, bann sef ek bann pret, ansanm avek pep Izrael antye. 21Delegasyon ki zot in anvoy kot nou in enform nou lo ou repitasyon ek respe ki zot annan pour ou. Zot vizit in fer nou bokou plezir.
22La deskripsyon ki'n ganny fer lo zot vizit:
Noumeniis, garson Antyokis, ek Antipater, garson Zason, ki form delegasyon Zwif, in vin kot nou pour renouvle zot lanmitye avek nou. 23In donn nou pep bokou plezir pour resevwar zot avek loner e plas en kopi zot rapor dan arsiv piblik pour pep Spart. Nou pe anvoy en kopi sa dokiman kot Gran-Pret Simon.”
24Plitar, Simon ti anvoy Noumeniis Ronm avek en gran boukliye annor ki ti pez 500 kilo, pour konfirm lalyans avek bann Romen.
Simon I Ganny Onore
25Kan bann Zwif ti antann sa, zot ti demande:
“Ki mannyer nou pou remersye Simon ek son bann garson? 26Annefe, se li, son bann frer ek lafanmir son papa antye ki'n touzour reziste kont nou bann lennmi. Zot in lager pour debaras Izrael avek son bann lennmi e donn nou pep laliberte.”
27La teks ki ti ganny grave lo en plak an bronz e ki ti ganny plase lo bann kolonn lo montanny Siyon: Le 18, mwan Eloul, lannen 172#14.27 Savedir 13 Septanm lannen 140 avan Zezi-Kri., ki ti trwazyenm lannen Gran-Pret Simon, 28dan en gran lasanble bann pret ek lepep, bann sef lepep ek bann ansyen dan pei, bann levennman swivan ti ganny proklanmen: 29Pandan bann lager ki ti annan souvan dan pei, Simon, garson Matatyas, en pret sorti dan lafanmir Yoarib ek son bann frer, zot in riske zot lavi fas avek bokou danze. Zot in reziste bann lennmi nou nasyon pour defann nou tanp ek nou Lalwa. Zot in anmenn bokou loner pour nou pep.
30Avan son lanmor, Simon ti reisi ini sa nasyon e vin zot Gran-Pret. Apre, i ti al rezwenn son bann zanset.
31Kan bann lennmi ti deside atak zot pei e met zot lanmen lo tanp, 32Simon ti pran komann e konbat kont zot. I ti depans en kantite son prop larzan pour arm bann solda larme nasyonal e donn zot en lapey.
33I ti konstri bann miray defans otour bann lavil Zide, Bet-Sour, lo frontyer Zide ki avan, ti servi koman arsenal lennmi. I ti poste en group gerye Zwif la.
34I ti osi konstri miray defans otour Zafa, obor lanmer, otour Gezer, pre avek lavil Asdod. Avan sa, lennmi ki ti okip sa rezyon. Me Simon ti enstal bann Zwif la e i ti fourni sa bann lavil avek tou sa ki ti neseser pour fer bann reparasyon.
35Bann zabitan ti'n war devouman Simon e koman i ti'n deside anmenn loner pour son nasyon. Alor, akoz son fidelite dan tou sa ki i ti'n fer pour anmenn lazistis, e fer tou pour ki bann Zwif i vin en gran nasyon, zot ti fer li vin zot sef e Gran-Pret.
36Dan son lepok, Simon ti reisi sas bann non-Zwif dan Zide, osi sa bann ki ti Zerizalenm, dan lavil David, kot zot ti'n konstri en sitadel. Depi sitadel ki zot ti sorti pour rann tanp ek son zalantour enpir. 37Simon ti enstal bann solda Zwif dan sitadel. I ti fer konstri en miray otour pour defans pei ek lavil e i ti fer monte bann miray Zerizalenm.
38Pour tou sa ki i ti fer, lerwa Demetriis ti konfirm li dan pozisyon Gran-Pret, 39e donn li tit: Zanmi lerwa e kouver li avek bokou loner.
40Annefe, lerwa Demetriis ti'n tande ki bann Romen ti apel bann Zwif zanmi, alye e frer; e ki zot ti'n resevwar avek bokou loner, delegasyon sorti kot Simon.
41Lerwa ti'n osi tande ki bann Zwif ek zot pret in osi aksepte Simon ek son desandan koman zot sef e Gran-Pret, ziska zour ki en vre profet ava aparet.
42Simon ti'n vin zot zeneral. Alor i ti osi responsab bann zafer tanp, nonm bann ki ansarz travay, ladministrasyon pei, sef militer ek bann komandan.
43Simon ti osi responsab tanp. Alor, tou dimoun ti devre obei li. Tou dokiman ofisyel ti devre ganny fer lo son non. I ti annan drwa abiy dan lenz rouz seremoni e met bros annor#14.43 War 10.89..
44Personn parmi lepep, ni bann pret, pa pou annan drwa rezet enn son bann desizyon. Personn pa pou kapab opoz lord ki Simon i donnen, ni reini en lasanble san son lotorizasyon, ni abiy dan rob rouz seremoni, ni menm port bros annor. 45Tou dimoun ki al kont sa bann desizyon oubyen rezet zot, ava ganny pini.
46Tou dimoun ti dakor pour donn Simon drwa azir dapre sa bann desizyon. 47Alor, Simon ti aksepte e i ti dakor pour li vin Gran-Pret, sef larme, sef nasyon Zwif ek pret e komandan an sef pei antye.
48Bann Zwif ti deside ki tousala i ganny grave lo bann plak an bronz e ganny plase dan en landrwa dan lakour tanp kot tou dimoun i kapab war. 49Bann kopi ti osi ganny depoze dan lasal trezor tanp, kot Simon ek son bann garson ava kapab konsilte.
Currently Selected:
1 Makabe 14: BSK
Highlight
Share
Copy
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.