1 Makabe 13
13
Simon I Siksed Zonatan
1Simon ti tande ki Trifon ti'n rasanble en gran larme pour atak pei Zide e detri li. 2I ti remarke ki lepep ti pe tranble ek lafreyer. Alor, i ti mont Zerizalenm e rasanble lepep. 3I ti ankouraz zot. I ti dir zot, “Zot tou zot konn tou sa ki mon bann frer, mwan ek mon fanmir in fer pour defann bann lalwa ek tanp. Zot osi konn tou sa ki'n arive: Bann lager ek bann problenm ki nou'n pas ladan. 4Akoz tousala, tou mon bann frer in mor pour pep Izrael; la i reste zis mwan tousel.
5Aprezan, i pa kestyon ki mon anvi sov mon lavi dan moman danze, akoz mon pa pli parfe ki mon bann frer. 6Me mon pou defann mon nasyon ek tanp, zot bann fanm ek zot bann zanfan, akoz dan zot laenn kont nou, lezot pep in rasanble pour detri nou.”
7Sa bann parol ti redonn kouraz lepep. 8Zot ti reponn byen for:
“Ou ki nou sef dan plas ou bann frer, Zida ek Zonatan. 9Diriz nou dan lager e nou ava fer sa ki ou ava dir nou.”
10Alor, Simon ti rasanble tou bann gerye. I ti depese pour konplet rekonstriksyon miray Zerizalenm e ranforsi bann fortifikasyon otour lavil. 11I ti anvoy Zonatan, garson Absalon, Zafa, avek en ase gran larme. Zonatan ti sas tou bann zabitan e enstal zot dan sa lavil.
Trifon I Tronp Simon e I Touy Zonatan
12Trifon ti kit Ptolemais avek en gran larme pour li al pran pei Zide. I ti anmenn avek li Zonatan, frer Simon, koman prizonnyen. 13Simon ti kanp Adida, an fas avek laplenn.
14Trifon ti tande ki Simon ti'n ranplas son frer Zonatan e i ti pare pour lager kont li. Alor, i ti anvoy mesaze kot li pour dir li, 15“An rezon bann fonksyon ki ou frer Zonatan ti okipe, i ti devre anvoy larzan dan trezor rwayal. Me i pa'n fer li. Alor, mon gard li prizonnyen. 16Anvoy nou 2,700 kilo larzan ek de parmi son bann garson koman otaz, pour ki i pa revolte apre ki nou'n larg li.”
17Simon ti konnen ki zot ti pe tronp li. Malgre sa, i ti fer rod larzan ek bann garson, pour pa senm ledout e pour zot pa dir apre: 18Akoz Simon pa'n anvoy larzan ek son bann garson, ki Zonatan in ganny touye.
19I ti anvoy sa 2,700 kilo larzan ek de garson Zonatan. Me Trifon ti kas son parol, i pa ti larg Zonatan.
20Apre sa, Trifon ti sorti avek son larme pour atak e detri pei. Son larme ti fer en detour par Adora. Me Simon ek son larme ki kontinyen fer fas avek li partou kot i ti ale.
21Pandan sa letan, bann gerye ki ti dan sitadel Zerizalenm ti kontinyen anvoy mesaz pour Trifon pour pas par semen dezer, pour anmenn manze pour zot. 22Trifon ti prepar son kavalri pour ale, me sa swar, ti annan bokou lannez. I ti prefere al Gilgal. 23Kan i ti ariv pros avek Baskama, i ti touy Zonatan e anter li laba. 24Apre, i ti retourn dan son prop pei.
Latonm Zonatan
25Simon ti anvoy rod lezo son frer Zonatan, e anter li Modin, lavil son bann zanset. 26Pep Izrael antye ti plere pour lapert Zonatan. Zot ti port dey pandan en kantite zour.
27Simon ti fer en moniman lo latonm son papa ek son de frer. I ti fer li ase o, pour ki dimoun ava kapab byen war li. I ti kouver li devan deryer avek ros poli.
28I ti osi fer set piramid, enn akote lot, pour son papa, son manman ek son bann frer. 29I ti osi fer antour sa bann piramid avek bann kolonn byen o. I ti dekor zot avek bann zarm koman en souvenir permanan. Par lao, ti annan bann bato pour ki tou sa ki navigater ava kapab war. 30Sa latonm ki i ti konstri Modin i ankor la ziska ozordi.
Lendepandans Zide
31Trifon ti mal fer avek zenn lerwa Antyokis. I ti touy li. 32I ti vin lerwa dan son plas e pran kouronn Lazi. Sa ti anmenn gran problenm dan sa pei.
33Simon ti konstri bann fortifikasyon dan Zide. I ti konstri miray toultour avek bann tour, miray epe ek baro. I ti met manze an rezerv dan bann fortifikasyon.
34Simon ti osi swazir bann anbasader ki i ti anvoy kot lerwa Demetriis pour demann konsesyon taks pour son pei, akoz Trifon ti'n zis depouy pei. 35Lerwa Demetriis ti anvoy li en repons favorab pour son demann. La sa ki i ti dir, 36“Lerwa Demetriis i anvoy salitasyon pour Gran-Pret Simon ek bann zanmi lerwa e pour tou bann sef dan nasyon Zwif.
37Nou'n resevwar kouronn annor ek bann brans palm ki ou'n anvoye. Nou dakor pour etabli lape konplet avek ou e ekri nou bann zofisye pour akord konsesyon taks. 38Nou konfirmen ki tou bann konsesyon ki nou'n deza fer, i reste valab e ou kapab gard bann fortifikasyon ki ou'n konstri, koman ou propriyete.
39Nou pardonn ou tou lerer, tou fot ki ou'n fer ziska ozordi. Tou det taks anver lerwa i ganny anile. I pa pou bezwen pey okenn lezot taks ki ti'n ganny enpoze lo Zerizalenm. 40Si i annan parmi zot ki kalifye pour vin gard rwayal, zot kapab anrole. I devre annan lape ant nou.”
41Apartir lannen 170#13.41 Savedir lannen 142 avan Zezi-Kri., Izrael ti ganny libere anba dominasyon bann nasyon etranze. 42Lepep ti konmans ekri lo zot bann dokiman: Dan premye lannen Simon, Gran-Pret, komandan e sef bann Zwif.
Simon I Pran Gezer
43Dan sa lepok, Simon ti atak lavil Gezer. I ti plas son bann troup otour lavil e fer konstri en tour mobil ki i ti fer roule kont miray lavil. I ti atak enn bann tour dan lavil e pran posesyon. 44Bann zonm ki ti dan tour mobil ti sot deor dan lavil e kre en gran panik. 45Bann zabitan ti grenp lo miray avek fanm ek zanfan. Zot ti desir zot lenz e kriy avek Simon pour demann li fer lape avek zot. 46Zot ti dir Simon, “Pran pitye pour nou; pa pini nou pour bann ditor ki nou'n komet.”
47Simon ti fer en lakor avek zot e i ti fer aret lager. Me i ti sas zot dan sa lavil e netway bann lakaz kot ti annan bann fo bondye. Apre, i ti antre dan lavil avek kantik ek louanz. 48I ti fer tir tou sa ki ti rann lavil enpir e etabli bann zonm ki ti met Lalwa Bondye an pratik. I ti ranforsi bann fortifikasyon e konstri en lakaz pour li menm.
Simon i Repran Sitadel dan Zerizalenm
49Dan Zerizalenm, bann ki ti pe reste dan sitadel e ki pa ti kapab sorti pour swa aste, oubyen vann dan lakanpanny#13.49 War 12.36., ti pe telman soufer lafen, ki en kantite ti mor akoz lafanmin. 50Zot ti sipliy Simon pour fer lape avek zot. Simon ti aksepte. I ti sas zot dan sitadel ki ti ganny pirifye kont tou sa ki ti rann li enpir.
51Venntrwazyenm zour, dezyenm mwan, lannen 171#13.51 Savedir le 4 Zen, lannen 141 avan Zezi-Kri., bann Zwif ti antre dan sitadel avek gran selebrasyon. Zot ti anmenn brans palm, sant kantik avek lanmizik laarp, senbal ek lezot lenstriman lanmizik. Annefe, en gran lennmi ti'n ganny kraze e debarase dan Zerizalenm.
52Simon ti donn lord ki sak lannen, sa zour pou ganny selebre. I ti ranforsi fortifikasyon tanp ki ti akote sitadel. I ti reste la avek son bann zonm.
53Simon ti war ki son garson, Zan, ti'n vin en zonm. I ti nonm li komandan larme antye e i ti reste Gezer.
Currently Selected:
1 Makabe 13: BSK
Highlight
Share
Copy
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.