ZEKARIA 14
14
Jerusalem ko Yuchoti
1 Abüdongba tsü yukhachah pümnung becho chihle. Hütsüpü Jerusalem kengchonung, ko akengchocho tsü nührü nahtse tenü changtanung. 2Abüdongba-nü Jerusalem nyüm mongchiinung yuchoti apüm nübülungnung. Yangdi tsü khyünung, kuh tsü zühnung, ko khingkurüti khing thsangnyangnung. Nyitsarünü changsho rang tsinung, ta anyingcholü yangdi lanü mühitsinung. 3Hütsüpü Abüdongba shemüsunung, ko atsichola Abinü khatacho roh-i, Abinü hiri yuchoti nyüm mongchiinung. 4Hütsüde Abinü Jerusalem nyüchüro lahpi Olive zong chah yanung. Hütsüde Olive zong anyüh kang nyüchüro lanü nyüzüdu chii tsohrüpnung. Changsho kihku lahpi ko changsho kihjing lahpi khyümüinung. 5Hiba zong anyüh kang chang liba ngah khu nührü tsichehnung. Juda yangthsaba Uzziah chichah alihyo zingde nührü tpurü roh-i nührü tsinung. Abüdongba I Tsingrang Abi yola ninglang riwürü Abinü nüpü ronung.
6Hütsü bekhyah chihde, arüsahkünang mahkhang müdhrang müjüronung mahkhang amarürah mülinung. 7Yürüpla mii lede tsingse du linung. Hi tikehnung Abüdongba-nü du müdhele.
8Hütsü nyümong rode, Jerusalem lanü kih amüseng changsho Asü Kihdi ko changsho Mediteranean lang pohnung. Hi kang ayung poh du pohnung, tsingkang müyü ayung.#Ezk 47.1; Jhn 7.38; Mis 22.1 9Hütsüde limih apüm michah Abüdongba tsü yangthsanung. Nyitsarü müipi Tsingrangba apu nengla Abi mübünung.
10Kihku lang Geba lanü kihjinglang Rimon chii mükyah apüm angah kangsohnung. Mükang liba limih lanü Jerusalem dhikehnung; yangdi tsü Benjamin tbükhüm lanü papade tbükhüm liba Corner tbükhüm chii, ko Hananel roshengvi lanü yangthsaba cikih nyehji chii. 11Hütsüla adelü adrünung mülipü nyitsarüti tbachi linung.#Mis 22.3
12Jerusalem la rothsarü yucho apüm michah Abüdongba-nü adrünung adhsa hirojünung. Arüh akang linü arüh shutsa sühnah tsinung; arüh nahtse ko amüle sühnah tsinung.
13Hütsüde Abüdongba-nü nyitsarü müipi abürü müshümba rangnung ko müpsehnungthsa Tsingrangba-nü yüyümingming ko drüsohnung. 14Judarünü Jerusalem khüm chitanung. Arühnü yuchoti kuthsi, hon, taripi ko jengki khütang zühnung.
15Arorüh müdongjila kuri, gaduza, ut ko gadu, ko kanglungrü apüm michah adrünung dhsara küdusohnung.
16Jerusalem mahrü yuchoti apüm la akang lirütinü kang mütoh Akohbong Abüdongba tsü yangthsaba apu mübünung ko Mütpahvi thsüti mungnung hütsüla wünung.#Lev 23.39-43 17Yucho khürünü Akohbong Abüdongba tsü yangthsabaepü mümübükhang, arüh lih la tsing mürosohnung. 18Ijiprünü Mütpahvi Thsüti mümungkhang, Abüdongba-nü Abi mümübürü yucho michah müthehnung dhsaranü arüh xüpnung. 19Hiba akhingchi hi Ijiprü ko Mütpahvi Thsüti mümungba yuchoti chahsü küdunung.
20Hiri nyümongla kuri chah shuküp lanü “Abüdongba khyang khakhuchüjücho” pü thrahkeh linung. Amübükuh la chongkya füh tsü bholu chah liba roh-i du Amüsa linung. 21Jerusalem ko Juda apüm la chongkya füh tsü Akohbong Abüdongba mübübala bichinung pathsa yohpünung. Kangmübü jürütinü amübü jücho shuh chongnung hütsüri bichinung. Hütsü bekhyah rode, Akohbong Abüdongba Amübükuh la shithsabhülehrü mülinung.
Currently Selected:
ZEKARIA 14: SANGBSI
Highlight
Share
Copy
Want to have your highlights saved across all your devices? Sign up or sign in
Sangtam Naga (Re-edited) Bible - AMÜSA BAIBEL
Copyright © 1995 by The Bible Society of India
Used by permission. All rights reserved worldwide.
