MATHI 4

Jisu Thsadsücho

(Mrk 1.12-13; Luk 4.1-13)

1Hütsüpü motsingnü thsadsüsohnung nengdang Anbünü Jisu lipilih lang nowücho.#Ibr 2.18; 4.15 2Nyümong yüre ko romang yüre kongko khanglang, Jisu yangcho. 3Hütsüde motsing tsünü abi yang ro yocho, “Nüh Tsingrangba Tsurükhang, lung hirinü hümdhse kangsohnung yuzeng jüng.”

4Ta Jisu-nü lalingcho, “Amüsa yunü yore, ‘Nyitsarünü hümdhse dunü akang mülicheh, ta Tsingrangba belanü chürocho yutse mükhunü.’ ”#Azk 8.3

5Hütsüpü motsingnü Jisu tsü Amüsa yangdi Jerusalem lang nowücho, ko Amübü kumung athsenguba chah pümsohcho, 6ko abi te yocho, “Nüh Tsingrangba Tsurükhang, nü jangjangthsa tsohchoung, tunüo Amüsa yunü yore:#N. Khi 91.11-12

“‘Tsingrangba-nü nü nengdang abi riwürüti khyang yuzeng jünung,

nü jing mii lung chah mümüthinungthsa,

arüh khehlanü nüh wüpchonung.’ ”

7Jisu-nü lalingcho, “Ta Azengtacho nüsü yore, ‘Nühnü Abüdongba nü Tsingrang tüthsadsü.’ ”#Azk 6.16

8Hütsüpü motsingnü Jisu tsü azong athseng khüdu yang nowücho ko abi te limih yanglihti ko arüh ahechi atümung ngusohcho. 9Motsing tsünü yocho, “Nühnü mükhukeh Ih mübükhang, hi atümung nü khyang Ihnü jünung.”

10Hütsüde Jisu-nü lalingcho, “Tsipehng, Satan! Amüsa yunü yore, ‘Abüdongba nü Tsingrang mübüng ko abi du dikehng!’”#Azk 6.13

11Hütsütade motsing tsünü Jisu pehjücho; ko riwürütinü ro abi rükucho.

Galil la Jisu-nü Anguchi Dikehcho

(Mrk 1.14-15; Luk 4.14-15)

12Khode Johan akhangtikuh la rangyohkopü Jisu-nü yuchicho, abinü Galil lang tsipehcho.#Mat 14.3; Mrk 6.17; Luk 3.19-20 13Abinü Nazaret la müpümpü, Zubulun ko Naftali lih Galil kihdi müshüm liba Kapernaum lang alinung wücho.#Jhn 2.12 14Hiba hi Isaya azikehbanü chochoba tikehsohnung nengdang nguchicho:

15“Zebulun ko Naftali lih,#Isa 9.1-2

kihdi langla, Jordan kikeh khüulang,

Galil, yangpirü lih!

16Amala lirütinü atsingse amülah khüdu ngunung.

Asürü lih amala lirüti michah atsingse vijünung.”

17Hütsütinü Jisu-nü abi yusi thsingyunung dikehcho: “Nührü münyi lanü ximülaang, tunüo ninglang Yanglih amünyethsa lile!”#Mat 3.2

Jisu-nü Ngu Rangrü Nyüh Müyü Dsicho

(Mrk 1.16-20; Luk 5.1-11)

18Jisu-nü Galil kihdi bekhüm tung tside, abinü ngu rangrü jüninyü Simon (Peter pü dsiba) ko, ani Andria, kihdi la yojehnü ngu rang ngucho. 19Abinü arüh te yocho, “Ih iirung, ko Ihnü nührü nyitsarü rangrü kangsohnung.” 20Hütsütade tsünü arühnü arüh yojeh pehjüpü abi iiwücho.

21Abinü khü wüpü aparü jüninyü, Zebede tsurüti, Jakob e Johan nyüh arüh au Zebede te kihtang la yojeh müthsüchi ngucho. Jisu-nü arüh dsicho. 22Hütsüde tsünü arüh kihtang ko arüh au pehjüpü abi iiwücho.

Jisu-nü Do Thsingyucho ko Kyangjüre

(Luk 6.17-19)

23Jisu-nü Galil apüm bongnü, Sinagog la donü, ninglang Yanglih Yuse Atsa thsingyu, ko dhsara ko füdhsa alang papa kehrü kyangjü wücho.#Mat 9.35; Mrk 1.39 24Ko abi nengdang Yusi tsü Syria limih apümlang sobhocho. Achotsü nyitsarünü abi yang füdhsarü ko dhsara alang papa kehrü: amünyi nbünü rangrü, füyüm zehrü, ko dsidsisürü norocho, ko Jisu-nü arüh atümung kyangjücho. 25Ko Galil lanü ko yangdi dhüre lanü, Jerusalem, Judea, ko Jordan khüulang liba lih lanü abi khanglang sühdi iiwücho.

Currently Selected:

MATHI 4: SANGBSI

Highlight

Copy