MATHI 3

Baptijüba Johan-nü Thsingyuba

(Mrk 1.1-8; Luk 3.1-18; Jhn 1.19-28)

1Hütsütade Baptijüba Johan ro Judea lipilih la thsingyunung dikehcho. 2Abinü yocho, “Nührü münyi lanü ximülaang, tunüo Ninglang Yanglih amünyethsa lile!”#Mat 4.17; Mrk 1.15 3Isaya azikehbanü yoba nyitsarü tsü Johan hi sü nengdang abinü yocho:#Isa 40.3

“Nyüh khüdunü lipilih la züdecho yuva,

‘Abüdongba lang rungnüm;

Abi lang müchongkhüti külüpm!’”

4Johan Jengki ut nbühnü külüpcho; abinü shuküpnü akih rümcho, ko abi tsuyongnung tsü khengqu ko thsakukih thsacho.#2 Yang 1.8 5Abi yanglang Jerusalem lanü, Judea lih atümung lanü, ko Jordan yongkhi amünyeh yangdongti lanü nyitsarüti rocho. 6Arühnü arüh münyi nyengchocho, ko abinü arüh Jordan yongkhi la baptijücho.

7Khode Johan-nü Farisirü ko Sadukirü adrong baptisohnung abi yanglang rochi ngucho, abinü arüh te yocho, “Nührü mürüti, Tsingrangba-nü müthehnung liba akhingchi lanü tsichehnung sünü nührü te yocho?#Mat 12.34; 23.33 8Nührü münyi lanü ximülakopü ngusohnungthsa nguching. 9Ko Abraham tsü nührü jümürüepü yochonü nührü akhingchi lanü tsiphunungepü tülüm! Ihnü nührü te yore, Tsingrangba-nü lung hiri khyüpü Abraham tsurüti chürochehsohle!#Jhn 8.33 10Singdong ara lanü re pehnung püh tsü tikehpo lile; asih atsa müsihba singdong müipi retsunung ko michang la yohnung.#Mat 7.19 11Nührü lasih thsamülacho amüdhethsa Ihnü nührü kih la baptijüre, ta sü I khanglang ronung liro abinü nührü Anbü Amüsa ko michang la baptijünung. Abi I tenü dee adiu; Ihlü abi jingkhüm hinungsü müdekheng. 12Fürü apüm winung abi kheh la müro biyale. Abinü abi shih la fürü hibülungnung, ta abinü mayülü khodesü mümehba michang la tahpehnung.”

Jisu Bapticho

(Mrk 1.9-11; Luk 3.21-22)

13Hütsütade Johan khyang baptisohnungba Jisu Galil lanü Jordan yang rocho. 14Ta Johan-nü abi alümcho mülichisohnung müküpcho. Johan-nü yocho “Ih uthring nühnü baptijüba khüli; nüh Ih yang rorüh ang?”

15Ta Jisu-nü lalingcho, “Ade nengdanglü yah thsaang. Tunüo Ihsanü hita Tsingrangba-nü khyünyücho apüm nguchinung.” Achotsü Johan-nü hepü nguchicho.

16Jisu bapti yeng, abi kih lanü chürocho. Hütsüde ning khangthrucho, ko abinü Tsingrangba nbü mümüdhrü roh-i jüro abi chah pümcho ngucho.

17Ko dhing ninglangnü yuva khüdunü yocho, “Hiba hi Ihnü müiba Tsurü, sü chah I long kyangre.”#Lip 22.2; N. Khi 2.7; Isa 42.1; Mat 12.18; 17.5; Mrk 1.11; Luk 9.35

Currently Selected:

MATHI 3: SANGBSI

Highlight

Copy