MATHI 21

Jerusalem lang Akoh Ngu Züducho

(Mrk 11.1-11; Luk 19.28-40; Jhn 12.12-19)

1Jisu ko amonoti Jerusalem chinyo rode, arühnü olive zong la Betfage lang rocho. Jisu-nü mono anyüh tsehleh müthehchünü 2yocho: “Nührü bekhu liba yang la tsü züdung, ko nührünü Gadu khüdu azaa yola xohchingpo ngunung. Arüh lehcheh I yanglang norung. 3Ko khürünü tunang yokhang, abi te young, ‘Abüdongba-nü dhsütahre’ ko hütsüde tsünü abinü arüh müthehchünung.”

4Aronung nengdang azikehrünü tu chocho hütsü tikehre:

5 # Zek 9.9 “Zion yangdi te young,

Dhing, nü yangthsaba nüh yang tsehle!

Abi alonglüm ko Gadu za khüdu chah pümpü.”

6Hütsüpü monoti tsü wücho ko Jisu-nü arüh te tu nguchinung yocho hütsü roh-i nguchicho: 7arühnü Gadu ko azaa tsü norocho, ko arüh shü arüh chah khyangjücho, ko Jisu küdu pümcho. 8Sühdi la tsü adrongnü arüh shü langla khyangjücho ko khürünü rangva khung langla khyangjücho. 9#N. Khi 118.26 Jisu belang ko khanglang tsehba sühdinü züdecho, “David Tsurü te Hosana thsaang! Abüdongba nengla sü roro abi müwajüng! Amichahba la Hosana thsaang!”

10Khode Jisu Jerusalem la züducho, Yangdishünü duduyayacho. “Hi süo?” Nyitsarütinü tsingdhingcho.

11“Sühdi tsünü hiba hi Galil la Nazaret-rü, azikehrü Jisue” pü lalingcho.

Jisu Amübükuhlang Wücho

(Mrk 11.15-19; Luk 19.45-48; Jhn 2.13-22)

12Jisu-nü amübükuh la züdu alihrü ko airü atümung iipehcho. Thsi mülihrü tsingthsang ko kuh-mümüdhrü irü pümji mükhapehjücho, 13#Isa 56.7; Jer 7.11 ko arüh te yocho. “Amüsa yula Tsingrangba-nü yore, ‘I amübükuh te dangkhidangnang kuh pü dsinung.’ Ta hütsü nührünü aführü kumünyiji kangsohre!”

14Nahtohrü ko jahloh-hilohrü abi yang amübükuh la rocho ko abinü arüh kyangjücho. 15Bebü ayingti ko Yuzeng adorütinü khode abinü anyemüyangnung nguchicho ngucho, ko amübükuh la azarütinü “David Tsurü Neng seing” pü züdecho ngu zichürocho! 16#N. Khi 8.2 Hütsünü arühnü Jisu te tsingdhingcho, “Arühnü yoba tsü nühnü müyuchio?”

“Ihnü yuchile” Jisu-nü lalingcho. “Nührünü Amüsa yu hi khodesü mükhidhing ang? ‘Nührünü azarü ko akhungarünü nengse ajeng jüsohnung nüchehko.’ ”

17Jisu-nü arüh pehjüpü Yangdi la tsünü Bethany lang wücho ko hütsüla yüpcho.

Jisu-nü Ngurüsing Chokehcholacho

(Mrk 11.12-14, 20-24)

18Nyangnyü khüu abi Yangdi lang thali rode, Jisu yangcho. 19Abinü langte ngurüsing khüdu ngunü hütsü yang wücho, ta hütsü chah ava chah khu tusü müngucho. Hütsünü abinü singdong te tsü yocho, “Nü chahnü khodesü asih tüsisoh!” Hütsüde tsünü ngurüsing tsü tohsehpehcho.

20Monotinü hütsü ngu nyemüyang yocho, “Ngurüsing tsü khodedenü khüta tohsehcho?”

21 # Mat 17.20; 1 Kor 13.2 Jisu-nü lalingcho, “Ihnü nührü te ajüje yore, nührünü mütütohnyünyehpü yudsikhang, Ihnü hiba ngurüsing chah nguchicho kyo nührünüsü nguchichehnung. Hütsü du mah, ta nührünü hiba akhang te, ‘Shemüsung ko Kihdi la tsü longyohng’ pü yocho mii tikehnung. 22Nührünü yudsikhang, tuturü dangkhidangnang tsingdhingnang nührünü ngunung.”

Jisu Tase Nengdang Atsingdhingba

(Mrk 11.27-33; Luk 20.1-8)

23Jisu-nü thali Amübükuh lang rocho; ko abinü do yode, Bebü ayingti ko azibarüti abi yang ronü tsingdhingcho, “Hiri nguchinung nüh tu tase liro? Sünü nü khyang hiba tase jücho?”

24Jisu-nü arüh te lalingcho, “Ihnü nührü te atsingdhingba khüdu du tsingdhingnung, ko nührünü lalingchehkhang, hiri nguchinung Ih tu tase lirünang Ihnü nührü te yonung. 25Johan Baptijüba tase tsü khüdenü rocho: Tsingrangba chahnü a nyitsarü chahnüo?”

Arühnü arühbürü yola rehtamüsucho, “Ihsanü tu yonung? Ihsanü ‘Tsingrangba chahnüepü yokhang’ abinü yonung, ‘khang tuepü nührünü Johan chah müyudsicho?’ 26Ta Ihsanü, ‘Nyitsarü chahnüekhang’ nyitsarünü tonung hütsü drüre, tunüo nyitsarü atümungnü Johan tsü azikehrüepü müdhecho.” 27Achotsü arühnü Jisu te lalingcho, “Ihrünü mümüdhe.”

Ko abinü arüh te yocho, “Khang, Ihnüsü tu tasenü hiri nguchiro hütsü nührü te müyonung.”

Atsurü Anyünü Yukitacho

28“Ade, nührünü tu lümro? Shikhe khüdu nyüh khüdu atsurü anyüh licho. Abinü aziba te wü yocho, ‘Itso, wüng ko chünye shükusiluh la yuthsahng.’ 29‘Ih müwünung’ abinü lalingcho, ta akhanglang alasih thsamüla wücho. 30Hütsüpü au tsünü atsurü akhüuba tesü wü hütsü roh-i yocho, ‘Ih wünung’ adirü, ta abinü müwücho. 31Anyüh yola khüibanü aunü lümcho nguchicho?”

“Aziba tsünü” arühnü lalingcho.

Hütsünü Jisu-nü arüh te yocho, “Ihnü nührü te yore: Alihmüthsü dhrirü ko nahtrahnaxenglarü nührü te akhu Tsingrangba yanglih la züdure. 32#Luk 3.12; 7.29-30 Tunüo Baptijüba Johan-nü nührü yang yuje lang ngusoh rocho, ko nührünü abi chah müyudsicho; ta alihmüthsü dhrirü ko nahtranaxenglarünü abi chah yudsicho. Nührünü hütsü ngunye, akhanglang dusü lasih thsamüla abi chah müyudsicho.

Shükusih Luthsarünü Yukitacho

(Mrk 12.1-12; Luk 20.9-19)

33 # Isa 5.1-2 “Jisu-nü yocho, Yukitaba apa khüdu nyieng,” “Shikhe khüdu alih abüdongrü khüdunü shükusiluh khüdu thsacho, ko hütsü mükang tbü tbücho, anyehnung akhi jucho ko roshengvi khüdu thsacho. Hütsüpü anguchirü khyang luh tsü dhingyeh pehjüpü shitsehnung wücho. 34Khode shükusih laanung akyang chihcho, abinü anguchirü yang abi nohlüm chingnung akulirüti müthehcho. 35Anguchirü tsünü kulirüti tsü rangcho, khüdu lahcho, khüdu müpsehcho ko aparü tsü lungnü kengsehcho. 36Anyüpiu abinü akhudi tenü adrongu kulirüti müthehcho, ko arühnü hütsü roh-i du tsü arüh chah nguchicho. 37Achangkathsa abinü atsudhre arüh yang müthehcho. Abinü yocho, arühnü ‘Ajüje I tsudhre jengrenglü drünung.’ 38Ta khode arühnü atsudhre tsü ngucho, arühbürü chotacho, ‘Hiba hi abüdongba tsurüe. Rung, Ihsanü abi müpsehnung ko Ihsanü abi kuthsi khyünung!’ 39Achotsü arühnü abi rangpü shükusiluh lanü tphahcheh abi müpsehcho.

40“Khode luh abüdongba tsü ronang, abinü hiri anguchirü chah tu nguchinung?” Jisu-nü tsingdhingcho.

41Arühnü lalingcho, “Hütsüri amükhyu nyitsarüti tsü abinü müpsehriri, ko shükusiluh tsü sürünü akyang la abi nohlüm jünung arüh khyang thsasohnung.”

42 # N. Khi 118.22-23 Jisu-nü arüh te yocho, “Amüsa yunü tu yoro nührünü khodesü mükhidhingcho ang?

‘Kuthsarütinü müdhsütahba lung tsü

apüm tenü ayingba kangcho.

Hiba hi Abüdongba-nü nguchicho;

Hi Ihsa nahte khütoh-i anyemüyangnung!’

43“Hütsüeko Ihnü nührü te yore,” “Nührü chahnü Tsingrangba Yanglih tsü hitsinung ko asih sihsohba nyitsarüti khyang jünung.” 44Hiba lung chah sü longchonang abi lahzangzangnung; ko lung tsü khürü chah longkehkhang, abi asongsong kang kengnahnung.

45Bebü ayingti ko Farisirütinü abi yu kitacho yuchinü, abinü arüh nengdang chorepü arühnü nyichehcho, 46hütsünü arühnü abi rangnung müküpcho. Ta arühnü sühdi tsü drücho, tunüo arühnü abi azikehrüepü müdhecho.

Currently Selected:

MATHI 21: SANGBSI

Highlight

Copy