LUK 7
7
Jisu-nü Roman Rothsazirü Kulirü Kyangjücho
(Mat 8.5-13; Jhn 4.43-54)
1Jisu-nü nyitsarütite yu hiri apüm yokhangpü abi Kapernaum lang wücho. 2Hütsüla Roman rothsazirü khüdu kulirü sü abinü dee müi licho, hütsüvi tsü asünungthsa füdhsa licho. 3Adibong tsünü Jisu nengdang yuchide, abinü Jihudarü azirü khürü müthehnü ro abi kuliba kyangjüng pü tsingdhingnung wüsohcho. 4Arühnü Jisu yanglang ro abi te kihchi yocho, “Hiba nyitsarünü nü arüku ngunung alenge. 5Abinü ihrü nyitsarü dee müire ko ihrü khyang Sinagog-sü thsajüko.”
6Achotsü Jisu-nü arüh yola wücho. Abi kuh chihnungthsade adibong tsünü abi shangrüti abi yang müthehnü yocho, “Adirü, nüh tülongmüzi. Nüh I kulang ronungthsa Ih müdekheng, 7mahkhang nü yanglang Ipu ronungsü I jangjang müdekheng lümre. Yah yuzeng du jüng, ko I kuliba tsü kyangpehnung. 8Ih miinü I pohki rothsarü yohpüpü yuzeng pohki tase bichirü nyüh khüdu. Ihnü khüdu te, ‘Wüng’ khang abinü würe; ko khüu te ‘Rung’ khang abinü rore; ko Ihnü I yurü te, ‘Hi nguching’ khang abinü hütsü nguchire!”
9Hi yuchide Jisu nyemüyangcho; ko abinü ximüla abi khanglang rorüh amülungte yocho, “Ihnü nührü te yore, Israel la Ihnü hiroh-i yudsi khodesü müngudhing!”
10Yusi hirüti tsü thali adibong kulang wüdelü kuliba tsü kyangpü licho.
Jisu-nü Chomirü khüdu Tsurü Kanglisohcho
11Tunyah mülipü Jisu-nü yangdi khüdu anengnü Nain lang amonoti ko sühdi amülahnü müyang wücho. 12Abi yangdi tbükhüm chihyeng, merang würü ro mütohcho. Asüba nyitsarü tsü chomitpü tsurü hütsü du thsacho, ko amülung arangcheh yangdila tsünü abükyü te iiwücho. 13Abüdongba-nü abükyü ngude, alasih la abükyü nengdang dhsa lümcho, ko abinü abükyü te yocho, “Tütra.” 14Hütsüpü abinü wünü kong chah tsü thahpücho, ko me dhirü tsünü yajücho. Jisu-nü yocho, “Dhrezaba! Ihnü nüte yore, Shemüsung!” 15Asüba nyitsarü tsü shemüsu pümcho ko chotanung dikehcho, ko Jisu-nü abi atpa khyang jücho.
16Arüh atümung adrünü jeng Tsingrangba secho. “Ihsa yola azikehrü amülah khüdu chüroko! Tsingrangba amüyurü khümchonung ro lile!”
17Jisu nengdang yusi tsü Judea lih ko mükangmüshü apümlang sobhocho.
Baptijüba Johan Chahnü Yusi Hirü
(Mat 11.2-19)
18Khode Johan te amonotinü hiri apüm nengdang yocho, abinü arüh nyüh anyüh dsicho 19ko Abüdongba te hita tsingdhingnung müthehcho, “Aronung liba tsü nüh a mahkhang aparü khürü yingnung?”
20Khode arühnü Jisu yanglang rocho, arühnü yocho, “Baptijüba Johan-nü aronung liba tsü nüh a mahkhang aparü khüdu yingnung pü tsingdhingnung nüh yang ihrü müthehchoe.”
21Hütsü shikhela tsü Jisu-nü füdhsa, dhsara ko amünyi nbünü rangcho nyitsarü adrong kyangjücho, ko nahtohrü adrong ngusohcho. 22#Isa 35.5-6; 61.1Abinü Johan yusi hirüti te lalingcho, “Thali wüng ko nührünü tu ngucho ko yuchicho hütsü Johan te young: nahtohrünü ngure, jingjahrünü tsehchehre, mübhira kehrü müsachehre, nangtbengrünü yuchire, asürü kanglisohre, ko yuse atsa tsü ailümrü te thsingyure. 23Sürünü I nengdang tu tütohnyünyeh müliro arüh akünyangnung!”
24Johan yusi hirüti tsiko khanglang, Jisu-nü Johan nengdang amülung te chonung dikehcho: “Nührünü lipilih lang tu dhingnung wücho? Thohva nyübongnü füchi yacho dhingnung wücho mah-o? 25Asehyahcho jengki khyürü khüdu dhingnung wücho mah-o? Hütsütari jengki khyürü tsü yangthsarü kuh la lire! 26Nührünü tu dhingnung wücho? Azikehrü khüdu ang? Ho, yuje, ta nührünü azikehrü tenü awüu nguko. 27#Mal 3.1Tunüo Johan nengdang amüsa yunü yore: ‘Ihnü nü bekhu nü lang rungnümsohnung I yusi hirü müthehnung.’ 28Jisu-nü yocho, Johan tsü lirocho nyitsarü yola atümung tenü adiu. Ta sü ninglang yanglih la azau liro abi tsü Johan tenü adiuba.”
29 #
Mat 21.32; Luk 3.12 Nyitsarü atümungnü abi yu nyicho; arüh ko alathsa alihmüthsü dhrirüti, arühnü Tsingrangba amüsa yu nyicho ko Johan-nü arüh baptijo licho. 30Ta Farisirü ko yuzeng adorütinü arüh nengdang Tsingrangba alümcho tsü mükhyüchocho ko Johan khyang mübaptisohcho.
31Jisu-nü mütozah yocho, “Ade Ihnü tu te hiba shang nyitsarü hi müjangdhingnung? Arüh tu kyoro? 32Arüh shithsachah pümba azarüti kyole. Mülung khüdunü khüdu te züderü, ‘Ihrünü nührü nengdang kukangba khi thsacho, ta nührünü münyiichi. Ihrünü meshü khi thsacho ta nührünü mütra!’ 33Baptijüba Johan rocho, abinü kongcho ko yongkha müyongcho ko nührünü yocho, ‘Abi chah amünyi nbü lile!’ 34Nyitsarü Tsurü rocho, abinü tsucho ko yongcho ko nührünü yocho, ‘Nyitsarü hi dhing! Abi amünyomüra ko amüxüprü, alihmüthsü dhrirü ko münyirü shangrü!’ 35Ta Tsingrangba lümlong tsü yuje-epü hütsü khyüchorü atümungnü ngusohre.”
Jisu Simon Kuh la
36Farisirü khüdunü Jisu yangtsunung dsiyohcho, ko Jisu-nü arüh kulang wücho ko yangtsunung nengdang pümcho. 37#Mat 26.7; Mrk 14.3; Jhn 12.3Hütsüba yangdila amünyilarü khüdu licho. Abükyünü Jisu tsü Farisiba kuh la yangtsu pümlepü yuchinü, axümlichi tuji alabaster füh#7.37 Alabaster Füh: Mrk 14.3 tsü dhing. khüdu jeng bipü ro 38Jisu khangte, ajingte tranü anahshükihnü ajing kyangjücho. Hütsüpü abükyü kuvanü ajing nipehjücho ko ajing chah müthsüpnü axümlichi tuji tsünü müyühjücho. 39Khode Farisiba tsünü hi ngucho, ajangjang lümcho, “Hiba nyitsarü hi yuje azikehrüelang, abi chah thahpüba khingkurü tsü sünang müdhebae; tunüo abükyü tsü münyilarü khüdu lile!”
40Jisu-nü abi te laling yocho, “Simon, Ihnü nüte lango ayonung lile.”
Abinü yocho, “Youngtü, Adorü.”
41“Alirü khüdu te thsite teerü nyüh anyüh licho,” “Nyüh khüdu thsih münga ko akhüu tsü thsi dhünyang kehcho. 42Anyüh sünüsü müsahchehchonü, abinü anyüding thsite pehjücho. Hütsükhang, anyüh yola sünü abi alaa müinung?”
43Simon-nü lalingcho, “Ihnü lümchonü, sü khyang alaa pehjücho, hütsüvinü alaa müinung.”
Jisu-nü yocho, “Nühnü yuje yoko.”
44Hütsüpü abinü khingkutpü yanglang ximülanü Simon te yocho, “Nühnü khingkurü hi münguo? Ih nü kuh la zürocho ko I jing thsütohnung nühnü kih müjü, ta abükyü nahshükihnü I jing kyangjücho ko akuvanü nikungjücho. 45Nühnü bemüthsüpnü Ih münüyoh, ta abinü Ih rodu I jing chah müthsüpcho müzahre. 46Nühnü tujinü I thah nengdang mümüyühjü, ta abükyünü axümlichi tujinü I jing müyühjüko. 47Hütsüeko Ihnü nüte yore, abükyünü ngusohba amüi amülah tsünü abükyü mülang khütango pehjükopü yuzi jüre. Ta sü khyang mülang azikyah pehjücho abinü amüi azikyah du ngusohre.”
48Hütsüpü Jisu-nü khingkutpü te yocho, “Nü münyiti pehjüko.”
49Aparü yangtsu chah pümrütinü arüh yola chotacho, “Amünyi mii pehjüba nyitsarü hi süo?”
50Ko Jisu-nü khingkutpü te yocho, “Nü yudsinü nüh khümchoko; mülümxüpü tsieng.”
Currently Selected:
LUK 7: SANGBSI
Highlight
Share
Copy
Want to have your highlights saved across all your devices? Sign up or sign in
Sangtam Naga (Re-edited) Bible - AMÜSA BAIBEL
Copyright © 1995 by The Bible Society of India
Used by permission. All rights reserved worldwide.
