LIPOH 7

Kihmülüm

1 Abüdongba-nü Noa te yocho, “Singkong la tsü nührü kukhirü atümung züdung; tunüo hiba shangla I nahtse te nüh du yuje ngure. 2Amüsa kanglungrü apüm ahung müipi lanü dhrela dhünyühnyeh, ta amümüsa kanglungrülü ahung müipi lanü dhrela khüdu-khüdu du nüyola nüng. 3Uzasü ahung papa lanü dhrela dhünyühnyeh nüng. Limih la thali kanglungrü ko uza ahung papa suchehnung nengdang hita nguching. 4Nyümong dhünyeh khanglang Ihnü limih la nyümong yüre ko romang yüre tsing rosohnung ko Ihnü thricho akang liba lüpcho changsohnung.” 5Ko Abüdongba-nü mülacho apüm Noa-nü nguchicho.

6Limih la kihmülüm rode Noa kang thsih dhüroh azirü licho. 7#Mat 24.38-39; Luk 17.27Abi ko anitpü, atsurüti ko arüh nitpürüti kihmülüm lanü tsiphunung singkong la tsü züducho. 8Kanglungrü ko uza amüsanye amümüsanye ahung apüm lanü atrüh khüdu ko apung khüdu, 9Tsingrangba-nü mülacho roh-i Noa te singkong la tsü züducho. 10Nyümong dhünyeh lipü kihmülüm tsü rocho.

11 # 2 Pet 3.6 Noa kang thsih dhüroh azirü thsade, choo anyüula nyümong dhüredhünyeh nyümong, alih yonglang kihna kihsi apüm tsohphohcho, ninglang kihmülüm trahtri apüm khangthrucho, 12ko limih la nyümong yüre ko romang yüre tsing rocho. 13Hütsü nyümong tsü Noa ko anitpü nyüh, arüh tsurü asang Shem, Ham ko Jafet ko arüh nitpürü nüpü singkong la tsü züducho. 14Arüh yola kanglungrü ahung apüm, kuh la kangba ko rangmü la liba, azikyah ko amülah ko uza ahung apüm züducho. 15Ko Tsingrangba-nü mülacho kyo, akang liba apüm lanü atrüh khüdu ko apung khüdu singkong la tsü züducho. 16Hütsüpü Noa khanglang Abüdongba-nü kukhang tsü khangtijücho.

17Nyümong yüre mütozah kihmülüm tsü limih la rocho ko kih tsü tingchonü singkong tsü alih tenü dhimüsucho. 18Kih tsü alaa ting kürochonü singkong tsü kih michah mülingkeh kürocho. 19Azongti mii tingtinungthsa kih tsü ting kürocho; 20Alaa alaa ting küronü akhang tenü khehap 15 alaa tingcho. 21Limih la akang apüm, uza, kanglungrü ko nyitsarü apüm sücho. 22Limih chah asah chichiba lüpcho sücho. 23Abüdongba-nü limih la akang liba apüm, amüi tsurü, kanglungrü ko uza apüm changsohcho. Anyingrü tsü Noa ko singkong la abi yola lirüti du thsacho. 24Kihmülüm tsü nyümong thsihpü dhünyang yingcheh münyehcho.

Currently Selected:

LIPOH 7: SANGBSI

Highlight

Copy