LIPOH 6

Amüi Tsurü Mütsacho

1 # Job 1.6; 2.1 Khode amüi tsurü lihküp jeng suchehcho ko khingkuzarü nümüsucho, 2ninglangrünü nyitsarü tsularüti tsü tsa ngucho, achotsü arühnü arüh müru khyücho. 3Hütsüde Abüdongba-nü yocho, “Ihnü nyitsarü amüsüde mülisohnung; arüh asüba nyitsarü. Ade tinü arüh kang thsih khüdupü mükyü chah alaa mülisohnung.” 4Hütsüri nyümongla ko akhanglang mii ninglangrü ko limih khingkurüti chahnü trahchocho akuhrongrü (Nifilim) licho. Papade arüh akurahrü ko anengkhong licho.#Khi 13.33

5 Abüdongba-nü limih la nyitsarü mütsacho ko bekhyah apüm la arüh amünyi lümlong ngude,#Mat 24.37; Luk 17.26; 1 Pet 3.20 6abinü arüh külüp limih la yohpücho wah lümcho. 7Abinü dira wah lümchonü yocho, “Ihnü thricho nyitsarü hiri ko kanglungrü ko uzatisü, Ihnü wohpehnung, tunüo Ihnü arüh külüpcho dee wah lümre.” 8Ta Noa telü Abüdongba künyang licho.

Noa

9Noa yukheh tsü hiroh-i lile. Abi tsurü Shem, Ham ko Jafet arüh asang licho. 10Noa amüsarü thsacho ko abi chichah nyitsarü atsalü abi du licho. Noa-nü Tsingrangba te tsehcho,#2 Pet 2.5 11ta aparü atümung Tsingrangba jingte amünyi licho ko apümlang shühkhatohnü jeng licho. 12Tsingrangba-nü alimih chah dhingcho ko amünyi du ngucho, tunüo nyitsarü apüm amünyi la akang licho.

13Tsingrangba-nü Noa te yocho, “Ihnü amüi tsurü apüm changsohnung dhrongchehko. Ihnü arüh riri changsohnung, tunüo limih tsü arüh shühkhatoh nguchinü jengko. 14Nühnü nüpu nengdang cypres singzinü Singkong khüdu külüpm; ayonglang achongnah yohng ko amilang ko ayonglang amünatisingnü münating. 15Hütsü ashenglang khehap 300, adilang khehap 50, ko athsenglang khehap 30 külüpm. 16Singkong nengdang kumung külüpm ko kumung e züdi nyüh kahla tsü kuthrung 18 vieng. Achung asang külüpm ko nangolang trahtri vieng. 17Ihnü limih la akang liba lüpcho changsohnung kihmülüm müthehnung. 18Limih la lüpcho sünung, ta Ihnü nütelü azengtaba khüdu külüpnung. Singkong la tsü nüh, nü nitpü, nü tsurüti ko arüh nitpürü nüpü züdung. 19-20Arüh müchangsohnung nüyola singkong la tsü kanglungrü ahung apüm ko uza ahung apüm lanü, atrüh apung khüdu-khüdu nüng. 21Nührü ko kanglungrü shulüm tsuyongnung adhangpi kükyo hieng.” 22Noa-nü Tsingrangba-nü mülacho lüpcho nguchicho.#Ibr 11.7

Currently Selected:

LIPOH 6: SANGBSI

Highlight

Copy