NÜCHEHCHO 4

Tsingrangba-nü Mosa Khyang Zii Jücho

1Hütsüde Mosa-nü lalingcho, “Ta adüzünü Israelrünü I chah müyudsikhang ko Ihnü yocho münyikhang khüta. Ko adesü nühnü I bete mümisha pü yokhang khüta?”

2Achotsü Abüdongba-nü abi te tsingdhingcho, “Nü kheh la tu biro?”

Abinü yocho, “Ja khüdu.”

3 Abüdongba-nü yocho, “Alih la tsü pehng.” Khode Mosa-nü hütsü pehcho, hütsünü mürü khüdu kangcho, ko abinü hütsü bete shang tsicho. 4Hütsüde Abüdongba-nü Mosa te yocho, “Mükhung ko hütsü amüyingnü thromüsung.” Achotsü Mosa-nü mükhurang hütsü rangcho ko hütsü thali ja kangcho. 5Abüdongba-nü yocho, “Abüdongba, arüh jümürü Tsingrang, Abraham, Isak ko Jakob Tsingrang-nü nüte mishako pü yuzithsanung hi Israelrü te nguching.”

6 Abüdongba-nü thali Mosa te yocho, “Nü kheh tsü nü ququ la yohng.” Mosa-nü hütsüta nguchicho; ko khode abi kheh khyüchehcho, akheh tsü shurü kyo mübhiranü tsütipü licho. 7Hütsüde Abüdongba-nü yocho, “Nü kheh tsü thali nü ququ la yohng.” Abinü hütsüta nguchicho, ko abinü thali akheh khyüchehde, hütsü akhudi roh-i kyangpehpü licho. 8Abüdongba-nü yocho, “Arühnü nü chah yu müdsikhang mahkhang akhudiba thsayahiya tsünü müyudsinye, hinülü arühnü yudsinung. 9Thsayahiya hinyi nguchinye arühnü yu müdsikhang, ko nühnü yocho münyikhang, Nile yongkhi lanü kih aza khachehng ko alih la tungpehng. Kih tsünü ashüh kangnung.”

10Ta Mosa-nü yocho, “Doh, Abüdongba, Ih tümütheh. Ih yuthrungrü khüdu mah. Ih akhudinü mahkhang nühnü chotapü khanglang mii hütsüta mükang. Ih yula müxüpcheh.”

11 Abüdongba-nü abi te yocho, “Sünü nyitsarü khyang be jücho? Sünü nangtbengsohro mahkhang müle jahsohro? Sünü ngusohro mahkhang nahtohsohro? Hütsü Ih, Abüdongba. 12Ade, wüng! Ihnü achonungla nüh tronung ko tu chonung nüte yonung.”

13Ta Mosa-nü yocho, “Doh, Abüdongba, aparü khüdu müthehng.”

14Hütsükhu Abüdongba-nü zichüro Mosa te yocho, “Levirü nümung Aron khüta? Abinü yu tsa chocho Ihnü müdhele.” Ko dhing nüh shirünung abi role ko nüh ngu abi künyangnung. 15Nühnü abi te chotang ko tu chonung abi te young. Ihnü chonung nühjüding tronung, ko tu nguchinung nühjüding te Ihnü yonung. 16Abi nü mülih achorü thsanung ko müyurü te nü mülih chonung. Hütsüde nüh Tsingrangba kyonü abinü chonungti yonung. 17Nühnü hiba ja bieng; tunüo hi khu nühnü thsayahiya nguchinung.

Mosa Ijip lang Thalicho

18Achotsü Mosa-nü aku Jethro yanglang wücho ko abi te yocho, “Ijip la jünirüti tsa mülinang shirünung wünung yanglilüm Ih wüsohng.” Jethro-nü mülacho ko abi te aza yu yocho.

19Mosa Midian lanü mütsie, Abüdongba-nü abi te yocho, “Ijip lang thali wüng, tunüo nüh müpsehnung yangchirü atümung sükhangko.” 20Achotsü Mosa-nü atsurü ko anitpü gadu chah pümsohcho ko arüh yola Ijip lang Tsingrangba-nü yoba Ja tsü bipü shemüsucho.

21Adesü Abüdongba-nü Mosa te yocho, “Adelü nüh Ijip lang thalire, yangthsaba bete Ihnü nü khyang jüba zii tsü bichi thsayahiya nguchinung tünbüchü, ta Ihnü yangthsaba hong alaa zisohnung ko abinü müyurüti mütsisohnung. 22Hütsüde nühnü abi te, ‘Ih Abüdongba-nü Israel tsü I tsurü aukhubaepü yorepü young. 23#Nüch 12.29Ihnü nüte I tsudhrenü Ih mübünung shulüm abi tsisohng pü yoko, ta nühnü mütsisoh. Hütsüeko ade Ihnü nü tsurü aukhuba müpsehnung.’”

24Ijip lang wüde langla Abüdongba-nü Mosa shiro abi müpsehnung müküpcho. 25Hütsüde anitpü Zippora-nü lungthsuh khüdu hiro atsudhre küp tsehpehcho ko hütsünü Mosa jing chah lüpkehcho. Amüjüp-pehba ayah khu tsünü abükyünü Mosa te yocho, 26“Nüh ashüh la rarüta I nii lile.” Hütsünü Abüdongba-nü Mosa akang rikijücho.

27Hütsütade Abüdongba-nü Aron te yocho, “Mosa shirünung lipilih lang wüng.” Achotsü abinü amüsa zong chah abi shirünung wücho; ko abi shirüde abi chah müthsüpcho. 28Hütsüta Mosa-nü Aron te Abüdongba-nü yocho lüpcho yocho: abi te Abüdongba-nü thsayahiya nguchinung yocho hütsüsü yocho. 29Achotsü Mosa e Aron nyühnü Ijip lang wücho ko Israel zirü müjang dsibülungcho. 30Aron-nü arüh te Abüdongba-nü Mosa te tuturü yocho apüm yocho ko arüh bete Mosa-nü thsayahiya apüm tsü nguchi ngusohcho. 31Arühnü yudsicho ko khode Abüdongba-nü ro arüh sehchi bichicho nguko pü yuchicho, arühnü mükhukeh mübücho.

Currently Selected:

NÜCHEHCHO 4: SANGBSI

Highlight

Copy