LUK 2

Jisu Chhat Ngin

(Mt 1.18-25)

1Augustas pa Chofa dângpoatko Roman Chofa khenwah chentô diakwah mihnyan heh khoroakweih rãng chienwah. 2Chenthu khebângrãng mihnyan heh khoroakweih poatko, Kurinas pa Siria diakko Govono dângwah. 3Anga ngama mâmâ nok ahah nâng khoroakweih lahma mînraangrãng chhoanwah.

4Josep min Galilijaa Nazarat hahnâng katwah, erehahpa Devit Lowang chhat hah Judia diakwah Bethlehem nâng katwah. Josep pa Devit pôali dângjunko erehahko katwah. 5Atea Mariam demnâng katwah. Mariam pa ate demko kepmînrãng ngama kahkhetmîn choan dângwah. Phumma Mariam pa naawun dângwah, 6ngale thin a Bethlehem nâng dângpoatko Mariam ma ate chha chhatrãng sanpoat pa thângwah. 7Mariam ma ate khhepho chha pa chhatwah. Ngale atema khetko doaplahma mânhoko jupthukwah - chenrãngma ngako thin tôngrãng humkhen nâng the aho dângwah.

Saaksokte ngale Rangkhethung wah Joban Ngintatte

8Ere diakko saaksokte khuthe thin saak heh sok nungma pitnâng rangpen jemlahma dângwah. 9Rangkhethung wah Teso ngintatte thintâko hôngkatwah, ngale Teso chaanpa thin khohko phiakkat wah. Thin a nyahrãng chei rewah, 10Phumma ngintatte pumma thinnâng ngatwah, “Nekchei en! Ngama nenâng nginsen thôkoh rãng kaerâng, erengin pumma mihnyan heh phangtang khu ehahthuk a. 11Thejâ Devit hahko ne Pângte Chhaeka - Atea Krista Teso! 12Ngale nema are junko jet en: Nema naachha pa khetnâng doaplahma mânhoko jupthuk lahma ekhe en.”

13Lemlienma rangkhethung wah ngintatte heh jahmõang hong lahma ngintatte demko Joban nâng rôsê sewah:

14“Rangkhethung choangthôan nâng Joban mîndong thukeka,

ngale hahtokkhoh ko hendemnâng ate rinme eka ereheh mêmo chendanga!”

15Chenthu ngintatte heh thin tâwah chhoan lahma rangkhethung nâng ngakwâng diko, saaksokte hehma wathema wathe nâng jabmînwah, “Bethlehem nâng wãnglihma Teso ma chenni thôkohthia ereheh sûwãnge.”

16Phumma thin sitsiak wãng lahma Mariam le Josepnii chohkhe wah, ngale naachha pa mânhoko jupthuk lahma khêwah. 17Saaksokte hehma naachha pa khêdiko, naachha junma ngintatte hehma thinnâng chenni thôkotah a ereheh thinma thôkoh wah. 18Saaksokte hehwah ngin chohtatte heh phangtang bârit rewah. 19Mariam ma erengin heh chhemhun lahma ate hungnâng lulili thônghun wah. 20Saaksokte hehma chentô tattah le khetah heh junma, thinma Joban nâng rôsê selahma ngakchhoanwah; erepa thinnâng ngintatte ma chenroh thôkotah a eroh dângwah.

Jisu Mînmîn wah

21Haptathe diko, naachha khoankhen niemhôan rangwo hokphumma, atenâng Jisu ngama mînwah, ere mînpa ate seknâng dângmako rangkhethung wah Joban ngintattema kohwah.

Jisu Rangsoamhum nâng Sietkat

22Mosa Niem junko Josep le Mariamnii seksâsietrit niemhôan sanpoat pa hokwah. Erohwah atenii ma naachha pa Jeroselem nâng Teso tânâng sietkatwah, 23Teso Niem nâng raangeka rãngrãng: “Chentô khhepho chhapa Teso mînko rangsoam lahma araangraang Joban moatlem moatte dângrãng thienmin.” 24Thinmemin Teso Niem junko, phari ba phari rãngrãngjat wochha wannii Joban mînko kohrãng katwah.

25Ere sanpoatko mihwa wathe ate mînpa Simon ngama Jeroselem nâng songlahma dângwah. Atea mihnyansen ngale Joban rancheite mihnyan dângwah. Ngale Joban ma Isrial mihnyan heh pepângrãng katpa bemla lahma dângwah. Asâthôanju pa ate demko dângwah 26ngale Teso ma toamsem tah Misaia pa lekhema nanga leriimin ngama atenâng ngatwah. 27Juma sietwên lahma, Simon Rangsoamhum nâng wãngwah. Chenthu nyong awa niima naachha Jisu pa Rangsoamhum nâng niem junko aterãng niemhôan kohrãng sietwênko, 28Simon ma naachha pa ate dekko pelahma Joban nâng dangkoh a ngatwah:

29“Teso, ade phumma nangma toamsem tohpa linlin lâdangtah,

ngale nang haapa rinmeme tariithuk o.

30Ngadede mitma nangwah khopepa lâchoh khetek,

31Erepa nangma chentô mihnyan nyuchha heh mathahko khoakhem eko:

32Atea Jews ledangte jat hehnâng nangma hun eko moatlem pa loatkhesokte wen

ngale nang mihnyan Isrial heh mînsenthuk eka.”

33Naachha junma Simon ma jab ekapa tatlahma ate nyong awanii bârit rewah. 34Simon ma thinnâng rangkoh lahma ate nyong Mariam nâng ngatwah, “Are naachha pa Joban ma ren eka, ate junma ajahthem Isrial mihnyan chhihjâmin erea ngale khopete min ehonga. Atea Joban wah ngama jetrãngma ajahthem mihnyan hehma ate lelatnâng echhihjab a 35ngale thin hungkhen nâng huhthonghun eka heh eloatthôkoh a. Ngale dangnahma nedede mongtoh pumma liensuhwah rãngrãng ere rekwah nehung elien chhihhèn.”

36-37Nyahrãng wiku mõngnyu wathe dângwah, atea janthoinyu ngale ate mînpa Ana, Phanuil chha dângwah. Ngale ate Ashar jat dângwah. Ate tangwa demko pâengit lolo roamsông diko ate tangwapa ritwah, phumma atea erepoatko roak eset pâbelii rangpâ dângwah.#2.36-37: atea roak eset pabelii rangpâ dângwah. Ba roak eset pâbelii janthoinyu dângwah. Ate Rangsoamhum kowah leloat thangma; rangwo rangnyek phhekchhah lechhah thangma Joban nâng rangsoam lahma dângwah. 38Ere sanpoat poatko ate hukhoam hûlahma Joban nâng dangkoh a ngatwah, ngale Joban ma Jeroselem pêsietrãng bemlâte mihnyan heh tâko atema naachha junma jabwah.

Nazarat nâng Ngakkat

39Teso Niem junko moatthin moatlem heh phangtang râmoat diko, Josep le Mariamnii thin hah Galilijaa wah Nazarat hahnâng ngakkatwah. 40Naapa donglahma chaanthepthep dângwah; ngale atenâng buthi mongthemsen hehmin jêngjah jahhong dângwah, erediko Joban mînchen pemin ate khohko dângwah.

Letachha Jisu pa Rangsoamhum nâng Hok

41Rangpâ roakweih Jisu nyong awa heh Jeroselem nâng Adankhoam lokuh rãng katwah. 42Chenthu Jisu echhi pânii dângko, jâhan pâhan wah rãngrãng lokuh rãng katwah. 43Chenthu lokuhpa râphumma thinhumnâng ngakwâng wah, phumma letachha Jisu pa Jeroselem nâng tângtôngwah. Phumma arepa ate nyong awa hehma lejet dângwah; 44Ayong awa hehma atea thinkhuchhang kojô edangthem a ngama thônghun wah, erohwah ngihjeng khoam diko thintang amang ngale lemru lemchha heh chhangko phoanglemsok wah. 45Thinma lechohlem dâng phumma, Jeroselem nâng ate lemsokrãng ngakkatwah. 46Jârem jâko Rangsoamhum nâng Jews heh Niemarang hethôte heh demko tonglahma thin ngin jetat ngale thinnâng ngin heh thôngphâ relahma chohkhe wah. 47Atema ngin heh chhemlala dânthâng junko ate ngin chohtatte heh bârit rewah. 48Chenthu ate nyong awa hehma ate chohkheko bârit rewah, ngale ate nyongma ngatwah, “Echha, nangma ninâng chenrãngma aroh hôan ehia? Nangwa chenii nang chohlem ele ngama nyahrãng lâpatriitih.”

49Jisu ma dânthâng wah, “Nema nga chenrãngma lemsû eha? Nema nga Ewa Humnâng edanga ngama jet hone?” 50Phumma Jisu ma danthang eka nginpa thinma jetwak ho.

51Ephumma Jisu thin demnâng Nazarat nâng ngakwâng wah, ngale enâng thin nginkepkep danglahma tôngwah. Are chentô ngin heh ate nyongma hungnâng thienwah. 52Jisu phoang aroang ngale buthi mongthem nâng adông rewah, erediko Joban memin ngale mihnyan hehmemin atenâng sênchohwah.

Currently Selected:

LUK 2: NOKTBSI

Highlight

Copy