LUK 1

1Ngama nyahrãng ahun Thiofilas:

Ajahthem mihnyan hehma nitânâng chenni dangtah a erengin heh raangthienrãng thatphungwah. 2Khebâng thuma areheh khelahma Joban nginkongsen pa phoangthôte hehma ninâng thôkohthi ngin heh jôba thinma raangthien eka. 3Adongthôan Thiofilas, chenrãngma ngako, ngama are ngin heh khebeng mejô senthemthem lâthat sûtantek. Phumma nangrãng khophen lemphen raangkohpa asen edanga ngama thonghun ekang. 4Ngama are raang ekãngpa nangnâng hethô thoheh nangma phangtang toangtang ngama chenjet o ngama raang ekang.

Jon Baptis Chhat Nginpa Loatthô

5Hirot pa Judia Lowang dâng sanpoatko,#1.5: judia: Arepa Palistan diaktang nâng ngaeka. soam aroakte wathe ate mînpa Zakaria ngama dângwah, atea soam aroakte jat Abija kuwah dângwah. Ate tangnyu mînpa Ilijabet dângwah; atemin soam aroakte kuwahjô dângwah. 6Atenii wanii niijô Joban mitsokko asen dângwah, ngale Joban Niemarang ngale Hôkum hehmin senthemthem kepwah. 7Thin a chhuho chhaho dângwah, chenrãngma ngako Ilijabet pa chhaho dângwah, ngale atenii waniinii nyahrãng wiku teka dângwah.

8Jâthenâng atema soam aroak moatlem moatpan jâko Zakaria ma Rangsoamhum ko soam aroak lahma dângwah. 9Soam aroakte heh Niem junko, thinma tanlahma Zakaria pa chaamko wenkhuh tûmrok kohrãng renwah. Ephumma Zakaria Teso Rangsoamhum ko wângwah, 10Wenkhuh pa tûmrokkoh sanpoatko rangsâ wah mihnyan hehma rangsoam wah. 11Atema wenkhuh tumrokkoh eka chaam dekchah ngeko rangkhethung wah Teso ngintatte ate tâko hôngchep katwah. 12Chenthu Zakaria ma ate kheko, patrit ngale chei rewah. 13Phumma rangwah ngintatte pumma atenâng ngatwah, “Zakaria, nekchei! Joban ma nang rangsoam pa lâtattho, ngale nang tangnyu Ilijabet ma delachha echha a. Nangma ate mînpa Jon ngama mînmin. 14Chenthu atema naa mechha tahko, nang chentô khuhah nâhah dângmin a, ngale ahan mihnyan hehmin ajahthem khuhah nâhah edanga! 15Jon pa Teso mitsokko adong edanga. Atema khem ngale lihân amok aleklimin lejok phhekchhah min. Ate achhat mejû Asâthôanju demnâng echha a, 16ngale atema ajahthem Isrial mihnyan heh Teso Joban tânâng engaksiet hûa. 17Atea Teso mako ekala a, ngale atea Ilija mõng rãngrãng chaanwin edanga. Atema wa achha heh ethe ngakroapsiet a; ngale ngin lekepte mihnyan heh toangtang lemkhôko engak thonghun thuk a; ngale atema mihnyan heh Teso rãngma khoakhem lahma ethienkoh a.”

18Zakaria ma rangkhethung wah ngintatte ko ngatwah, “Ngama nang nginpa toangtang ngama chenroh jienjetmin a? Nga a teka lâdangtek, ngale nga tangnyu pemin wiku lâdangtah.”

19Ngintatte ma dânthâng wah, “Nga a Gabarial,” “Nga Joban tâko chep ekang, atema are nginsen pa nangnâng thôkoh rãng chienkat ehang. 20Rohkomin nangma nga nginko putemoh, arepa sanpoat methang tahko toangtang edang kara. Nangma lepute dângdi, nangma jab lejienjab dângmin; Ngama nangnâng toamhoan eki rangwopa linlin madang dangkako nanga jabmuhma dângmin.”

21Ngale mihnyan hehma Zakaria Rangsoamhum ko aretô chenrãngma lektong eka ngama sekmah lahma bemwah. 22Ngale chenthu ate Rangsoamhum kowah loatkhoam katko, atema mihnyan hehnâng jienranjab tuho. Phumma atema Rangsoamhum khenko thânkhe lâretah ngama mihnyan hehma thônghun wah. Atema khapthe tumin lejien jabtu thangma mihnyan hehnâng atedekma thak amak kohwah.

23Chenthu atema Rangsoamhum ko soam aroak sanpoat pa râphumma, Zakaria ate humnâng ngakkatwah. 24Erediko ate tangnyu Ilijabet ma naawun lahma humwah leloat thangma dâjeng bangâ humko tôngwah. 25Ilijabet ma ngatwah, “Teso ma nganâng chohsû ehang,” “ngale mihnyan nyuchha mitsok wah nga rêsêpa lâre phekohthang!”

Jisu Chhat Ngin Loatthô

26Ilijabet ma jeng erok naawun poatko, Joban ma rangkhethung wah ngintatte Gabarial pa Galilijaa wah Nazarat hahko chienkatwah. 27Atema janchhônya wathe Devit Lowang pôali Josep demnâng kepmînrãng kahkhetmîn choanko ngin thôkat kohwah. Janchhônya mînpa Mariam dângwah. 28Rangkhethung wah ngintatte pa ate tâko kalahma Mariam nâng ngatwah, “Khuhah nâhah dango! Teso pa nang demnâng, ngale Teso ma nangnâng rangkoh eho!”

29Joban ngintatte ma thôkoh nginko Mariam nyahrãng tungmaangwah, ngale arepa chenni junko ngaeka ngama nyahrãng patritwah. 30Joban ngintatte ma atenâng ngatwah, “Mariam, nekchei o; Joban ma nangnâng nyahrãng mînchen eho. 31Nangma naawun lohma delachha echhao, ngale nangma ate mînpa Jisu ngama mînmin. 32Atea adong dângmin, ngale achoang thôanwah tôngte Joban Chha ngama roomin. Ate te awa Devit dangtah rãngrãng Teso Joban ma atemin Lowang edangthuk a, 33ngale atea Jakob pôali hehrãngma roantang roangjêng rãng Lowang edanga; ate Hahsông pa chenthumin leta thôanmin!”

34Mariam ma rangkhethung wah ngintatte ko ngatwah, “Nga a janchhô asâthu. Arepa chenroh jiendângmin?”

35Rangkhethung wah ngintatte ma dânthâng wah, “Asâthôanju nangkhoh ko ekara, ngale Joban chaanpa nangkhohko etong kara. Erohwah Asâthôan Naachha pa Joban Chha ngama ngatmin. 36Nang tang amang Ilijabet nâng thatthong hun tan. Ate memin naa tachha tumek ngatwah, rohkomin atea atô wikujô medang akomin athângheh dâjeng erok naawun lâdangtah, 37Chenrãngma ngako Joban ma letamoli chenjô aho.”

38Mariam ma ngatwah, “Nga a Teso haa,” “Nangma ngaeko rãngrãng nganâng chendang hang.” Ngale erediko ngintatte pa ate tâwah chhoanwah.

Mariam Ilijabet Tanâng Hok

39Erediko lemlienma Mariam chep achã lahma hahkong hahla diak Judia wah wanthe hahnâng wângwah. 40Atema Zakaria humko wãng lahma Ilijabet nâng rânjab wângwah. 41Chenthu Mariam ma rânjabpa Ilijabet ma tatko, ate wokkhen wah naachha pa phôangwah. Ngale Ilijabet nâng Asâthôanju mênchong dângwah 42ngale Ilijabet ma chaanmõang ma ngatwah, “Nanga chentô dihiak khuchhang kowah rangkepte thôan, ngale nangma wun eko naachha pemin rangkepte! 43Nga Teso nyong pa nga tâko hûlahma chohmînhu ehang, atôdông chenrãngma nga tâko hûera? 44Chenrãngma ngako nangma rânjabpa tatrienrien nga sekkhen wah naachha pa khuhah ma toak eka. 45Nangnâng Teso ngewah ngin kathapa toangtang dângmin ngama putedâlemdi nangma rangkep eko!”

Mariam ma Joban nâng Rôsê Sêwah

46Mariam ma ngatwah,

“Ngahungma Teso nâng rôeka;

47Joban nga Pângte junma ngaju rinroan eka,

48Chenrãngma ngako nga a ate haa arinchha thôan wathe phumma atema nganâng chhemhun ehang!

Adephumma chentô mihnyan ma nganâng rangkepte ngama roomin,

49Chenrãngma ngako achaanthôan Joban ma ngarãng adongthôan mokoh ehang.

Ate mînpa Asâthôan;

50Rôanthe kowah rôantheko

atenâng soam atôte hehnâng atema mînchen eka.

51Atema ate dek achaanthôan pa loatsiet eka,

thin hungnâng ngam poarii lahma themawa eka heh phansietkoh eka.

52Atema lowang chaan ahang heh thin tôngthin kowah jâsiet eka,

ngale mihnum mihne heh choangpe eka.

53Joban ma rêmritte mihnyan hehnâng asenli chhahthuk lahma wokphoatthuk eka,

ngale techhu heh dekphi phâwat chhoan thuk eka.

54Atema nãngte nãngwa hehnâng toamsem tahpa toangtang dângwah,

ngale ate haa Isrial mihnyan heh chohsok rãng kaera.

55Atema Abraham nâng mînchen khesok rãng thônghun wah

ngale ate pôali chentô nângmin roantang roangjêng rãng mînchen khesok rãng thonghun eka!”

56Mariam Ilijabet demnâng jengrem johtông diko ate humnâng ngakkatwah.

Jon Baptis Chhat Ngin Loatthô

57Ilijabet ma ate chhachhat sanpoat hokwah, ngale atema delachha chhatwah. 58Ate demnâng Joban pa patritli sen ekapa ate tok akhung wah mihnyan heh ngale tangkâ humkâ hehma chohtatwah, ngale thinkhu phangtang ate demnâng johrôan wah.

59Chenthu naachha pa haptathe dâng phumma, thinma khoankhen niemhôanrãng hokwah, ngale thinma ate mînpa atewa mîn demko Zakaria ngama mînrãng phungwah. 60Phumma ate nyongma ngatwah, “Eroh lemînmin! Ate mînpa Jon ngama mînmin.”

61Phumma thinma ate nyongko ngatwah, “Arepa ne tangkâmîn dangmah!” 62Erediko thinma atewako nangma naamînpa chenroh mînhun eko ngama thak amak lahma chhienwah.

63Zakaria ma nyapraang thin thalahma raang kohwah, “Ate mînpa Jon.” Phumma thin nyahrãng patrit wah! 64Ere sanpoat poatko Zakaria jienhong jabwah, ngale atema Joban nâng rôwah. 65Tok akhung wah mihnyan heh phangtang chei rewah, ngale erengin pa hahkong hahla diak Judia phangtang khêmtatwah. 66Are ngin chohtatte chentôma thinhung nâng thonghun lahma chhienwah, “Are naapa chenroh hongdôngmin a?” chenrãngma ngako Joban chaanpa ate khohko tongeka.

Zakaria ma Profisi Hôan

67Jon wa Zakaria pa Asâthôanju mênchong danglahma atema Joban ngin loatthôwah:

68Teso Isrial heh Joban nâng rôe!

Atema ate mihnyan hehnâng chohsok rãng kaera,

ngale atema thin pepâng eka.

69Atema ate haa Devit pôali wah,

nãngnâng Pângte chaanthôan kohehi,

70Atema ate mõng asâ heh junma khema thuma toamsêm wah

71Atema nãngran hehwah pepângmin,

Nãngnâng chhihchohte chentô hehwah epânghi.

72Atema nãngte nãngwa hehnâng mînchentek ngama ngaeka

ngale atema asâma toamsem tahpa thonghun eka.

73-74Atema nãngte nãngwa Abraham nâng toamsêm wah

Atema nãngran hehwah pepângrãng toamsêm wah

ngale lechei lewãn thangma atenâng soamtôthuk ehi,

75erohwah ate mako nãng asâ ngale toangtangma nãng roandông dôngtang dângmin.

76“Nanga ngachha, nangnâng achoang thôanwah tôngte Joban mõng ngama ngatmin.

Nanga Teso mako wãnglohma ate lempiak kohmin,

77ngale thinpap heh map kohlahma thin khopemin,

ngama nangma ate mihnyan hehnâng thôkohmin.

78Nãng Joban pa hun achette ngale mînchênte Joban.

Atema nãng khope pa rangkhah sanphiak rãngrãng nãngkhoh nâng ehongthuk a

79rangnyek ngale rit amah thenâng sôngte chentô nâng atema rangkhethung wah ephiakkat thuk a,

ngale atema nãngnâng mêmo moatlem emothuk hi.”

80Naapa donglahma phoang aroang ngale Ju amoang nângmin achaan dângwah. Atea Isrial nok atang heh anga nga mathahko hôngloat mako sehahkho nâng sôngwah.

Currently Selected:

LUK 1: NOKTBSI

Highlight

Copy