LUK 18

Janthoinyu ngale Nginpatte Thakthô

1Erediko Jisu ma ate dijunte hehnâng roantang hung lechha thangma rangsoam nungmejû tôngrãng nginthakthô thôkoh wah. 2“Hahdaang wanthenâng nginpatte wathe dângwah, atea Joban ranmin lechei, ngale mihnyan ranmin lechei dângwah. 3Ngale ere hahdaangko janthoinyu wathema atenâng roantang hûlahma, ‘Nga lelatnâng dângte ngaran hehwah mampânghang!’ ngama butbut roatsep hokwah. 4Melâng rangwo rãng ere nginpatte pumma dihiaknyuko lechohsû dângwah, phumma athôanko nginpatte pumma atedede ngatritwah, ‘Nga a Joban ranmin cheimek ngale mihnyan roak atoakmin leweih medang angkomin, 5are janthoinyu pumma butbut thamngat hokphumma, ngama atenâng chohsû ang. Ngama lechohsû medang angko, atema butbut thamhû lahma athôanko nga eboansiet hang!’ ”

6Ngale Teso ma thôkoh wah, “Tattan en, are nginpatte chhih pumma chenni ngaeka. 7Joban nâng putedâlemte mihnyan hehma rangwo rangnyek atenâng merosep ako Joban ma thinnâng lechohsû minne? Joban ma thinnâng sitsiak lechohsû thangma dângminne? 8Ngama nenâng thôkoh eka, atema thinrãng emoa ngale sitsiak echohsûa. Phumma chenthu Mihnyan Chhapa ngakkat jâko atema hahtokkhoh ko putedâlemte echohkhe karã?”

Farasi ngale Thãkho Thâte Nginthakthô

9Jisu ma are nginthakthô pa thindede asen thonghun lahma mihhan nâng achhih thônghunte hehnâng thôkoh wah. 10“Rekthenâng wanii mihnyan Rangsoamhum nâng rangsoam rãng roamhokwah: Wathepa Farasi dângwah, ngale ahan wathepa thãkho thâte dângwah. 11Farasi pumma ataangnâng ate araangraang cheplahma rangsoam wah,#18.11: ate raangraang cheplahma rangsoam wah; wanwanthe ma arepa raangeka toanchep lahma soamwah. ‘Joban, ngama dangkoh a ngaeki, chenrãngma ngako mihnyan ahan heh rãngrãng nga chhahnyoak dangmek, mothô khoanglepmin dangmek, ba mih tangnyu demnâng kaamchhih moatte min dangmek. Ngama nangnâng dangkoh a ngaeki chenrãngma ngako are thãkho thâte rãngrãngmin dangmek. 12Ngama heptako lephhek lechhahma rang jânii rângsoam ang, ngale ngama chentô chohbi ekang hehwahmin thãkho rângkoh ang.’ 13Rohkomin thãkho thâte pa ataangnâng cheplahma ate khojô rangkhethung nâng leta toansûwên thangma ate thhenkhuhko teprii lahma soamwah, ‘Joban nga papi mihnyan, nganâng mammînchen hang!’ 14Jisu ma ngatwah, “Ngama nenâng thôkoh eka, Farasi noma thãkho thâte pa Joban wah rangkep lahma ate humnâng ngakchhoanwah. Chenrãngma ngako henhen atedede dong sietrii eka erepa arînsiet rêmin, ngale henhen atedede arin dangrii eka erepa dôngsiet rêmin.”

Jisu ma Letachha hehnâng Rangkoh

(Mt 19.13-15; Mak 10.13-16)

15Mihnyan hehma thin chhuchha heh Jisu tânâng ate dekma chensahloa ngama siethok kohwah. Phumma erepa dijunte hehma lepkhe lahma thinnâng ritngatwah, 16Rohkomin Jisu ma naachha heh ate tâko roolahma ngatwah, “Nekjektang en naachha heh ngatânâng chenwãngra, chenrãngma ngako Joban Hahsông pa arerãngrãng heh thiak. 17Arepa thonghuntan en! Henhenma Joban Hahsông pa are naachha heh hung arin rãngrãng danglahma lekep dangeka ereheh chenthumin Joban Hahsông theko leta chohwãngmin.”

Techhuwa

(Mt 19.16-30; Mak 10.17-31)

18Jews khhepho wathema Jisu nâng thôngphâ wah, “Hethôte sen, ngama roantang roanjêng roandông tâchoh rãng chenni moatmin a?”

19Jisu ma atenâng thôngphâ wah, “Nangma nganâng asen ngama chenrãng roo ehanga?” “Asen henjô aho, Joban loloba asen etonga. 20Nangma Joban hôkum pa ajet: ‘Mihtangnyu demnâng kaamchhih nekmo; mih nekritphe; ahuh nekre; lethenâng mih neksêkham; nang nyong nangwa nginkepkep dango.’ ”

21Mihwa pumma dânthâng wah, “Nga letachha thumajû are hôkum heh phangtang lâkeptek.”

22Chenthu Jisu ma are nginpa tatphumma atenâng ngatwah, “Nangma moatthin ademin wanthe tonga. Nang chhahkhem heh phangtang senglohma ngunpa tangchhih hehnâng koh o, ngale erohkoba nanga rangkhethung nâng techhu thôan edango; erediko kalohma ngadijun hang.” 23Rohkomin chenthu atema are nginpa tatphumma nyahrãng hungkêwah, chenrãngma ngako atea nyahrãng techhu dângwah.

24Jisu ma ate hungkê khelahma ngatwah, “Techhu heh Joban Hahsông thenâng wângpa chentolat a! 25Techhu heh Joban Hahsông thenâng tâwâng noma ut peba metku polo pumma eta lienlup a.”

26Ate ngin tatte mihnyan hehma Jisu nâng thôngphâ wah, “Eroh medang ako henkho tâpemin a?”

27Jisu ma thinnâng dânthâng wah, “Chenpa mihnyan nyuchha ma letalia, erepa Joban ma tamoa.”

28Erediko Piter ma ngatwah, “Sûtan! nima ni humte tangkâ heh phethien lihma nang dijun eki.”

29Jisu ma thinnâng ngatwah, “Ngama nenâng thôkoh eka, henma komin Joban Hahsông rãngma ate humte tangkâ, ate tangnyu, pho anaa, nyong awa, ba chhuchha, heh phethien eka 30erehehma are roanko ajahthem echoh a, ngale ahokmin roandông komin roantang roanjêng roandông echoh a.”

Jisu ma Lôremrãng Ate Rit junma Jabwah

(Mt 20.17-19; Mak 10.32-34)

31Jisu ma dijunte echhi waniipa araangraang sietchhoan lahma ngatwah, “Tattan en! Nãnga Jeroselem nâng wãngeki, ngale mõng hehma Mihnyan Chha junma chentô raangtah a ereheh phangtang toangtang edanga. 32Atea Jews ledangte heh deknâng ekoh a, phumma thinma thãjõ lembe ehôan a, erediko jõjêm lahma thoakkahma thoak erea. 33Thinma watlahma ritphe erea, rohkomin jârem diko atea ngakhîn erea.”

34Rohkomin are ngin thôkoh ekapa dijunte hehma jetloho; are nginpa thinnâng lejetthuk thangma huhthien lahma dângwah, ngale Jisu ma chenni jabeka erepa thinma jetloho.

Jisu ma Chutphhek Chhahte Mitdoak Sênsiet

(Mt 20.29-34; Mak 10.46-52)

35Jisu Jeriko hah kêko hokko, mitdoak wathe lemkahko tonglahma thaphhek chhah lahma dângwah. 36Chenthu atema mihnyan heh dânkhoam pa tatko, “chenni dangeka?” ngama thôngphâ wah.

37“Nazarat wah Jisu dankhoam eka” ngama mihnyan hehma atenâng thôkoh wah.

38Phumma, “Jisu! Devit Chha! Nganâng mammin chenhang!” ngama ate raksepwah.

39Ate mathah kowah mihnyan hehma kihchepchep tongo ngama ritngatwah. Rohkomin atema, “Devit Chha! nganâng mammînchen hang!” ngama ajahjah chaanrakwah.

40Ephumma Jisu ma cheplahma mitdoak wapa ate tânâng sietwênrãng ngatwah. Ate tâko hokwâng phumma Jisu ma atenâng chienwah, 41“Ngama nangrãng chenni moatkohhun eko?”

Mitdoak pumma, “Teso, ngamitma ngakkhe hun ekang,” ngama dânthâng wah.

42Jisu ma atenâng ngatwah, “Eroh medang ako kheo! Nang putedâlem pumma lâsensiettho.”

43Ephumma atema lemlienma jienkhe wah, ngale Joban nâng dangkoh a ngama ngalahma Jisu diko junkhoam wah. Chenthu mihnyan hehma erepa khelahma phangtangma Joban nâng rôwah.

Currently Selected:

LUK 18: NOKTBSI

Highlight

Copy