LUK 19

Jisu ngale Zakaria

1Jisu Jeriko hahdaang pumma dânkhôamwah. 2Ere hahko thãkho thâte kowah dongthôanpa dângwah, ngale ate mînpa Zakaria dângwah, atea nyahrãng techhu dângwah. 3Atema Jisu pa hen a ngama nyahrãng khehun dângwah, rohkomin atea hathoan dâng phumma ngale mihnyan heh jahmõang dângjunko atema tachoh kheho. 4Erohwah mihheh mako chhoanwãngla lahma Jisu nâng sokrãng ate katlem wah Sykomor bãngko koatwâng lâwah. 5Jisu ma eretheko hûlahma bãngkhoko suwên lahma Zakaria nâng ngatwah, “Zakaria, sitsiak jâkaro, chenrãngma ngako thejâ nga nanghumnâng tôngmin.”

6Zakaria sitsiak jâka lahma khuhah nâhah Jisu nâng tãngroowah. 7Erepa khête mihnyan heh phangtang jabwah, “Are mihnyan pa papi mihnyan humnâng hûeka!”

8Zakaria toanchep lahma Teso nâng ngatwah, “Teso tattan! Ngama nga chhahkhem hehwah khakapa tangchhih hehnâng ekoh ang, ngale ngama hennâng komin mediapchhah tekko, ngama erenoma thiakbelii ajah engakkoh ang.”

9Jisu ma atenâng ngatwah, “Thejâ khope pa are mihnyan humko lâkatha, chenrãngma ngako are mihnyan pemin Abraham pôali jôba. 10Chenrãngma ngako, Mihnyan Chhapa mah asamte heh lemtê ngale pepângrãng kaera.”

Kem Ngunpha Thakthô

(Mt 25.14-30)

11Mihnyan hehma are nginpa jetat poatko, Jisu ma thinnâng nginthakthô wanthe thôkoh wah. Ere sanpoatko atea Jeroselem nâng hunemnem dângwah, ngale thinma Joban Hahsông pa arohroh ehongka themra ngama thônghun wah. 12Ephumma atema ngatwah, “Rekthenâng sahhabdong wathe hahtaang diak wanthenâng chhoan lahma atea ere diakko Lowang rãng dângchoanwah, ngale erediko ate humnâng ngakhokrãng themawa wah. 13Ate chhoan mako, ate haa waechhi pa roolahma thinnâng kem ngunpha kohlahma ngatwah, ‘Nga chhoan diko nema are ngun pumma biila en.’ 14Phumma ate mihnyan hehma atenâng mitchekwah, ngale erohwah thinma ate diko nginmatte junchien katwah, thinma ngatwah, ‘Nima are mihnyan pa ni lowang rãng dângthuk hunmih.’

15“Ere wapa lowang danglahma ngakhok wah. Ngale ate haa hehma chentôru khôanbitah a ngama jetrãng atema haaheh lemlienma khôanroo thukwah. 16Khebâng wah pa hûlahma ngatwah, ‘Tângte, nangma nganâng phathe kohthang pumma ngama kem ngunpha phaechhi lâchoh biilatek.’ 17Tângte pumma ngatwah, ‘Kaamsen lâmotoh’ ‘Nanga haasen! ngale nangma amãnchha pa toangtangma jiensemdi, ngama nangnâng hahdaang wanechhi epênthuk e.’ 18Erediko wah haa wathepa hûlahma ngathokwah, ‘Tângte, nangma wanthe kohthang pumma ahan wanbangâ kem ngunpha lâchoh biilatek.’ 19Erewa komin atema ngatwah, ‘Nangmemin hahdaang wanbangâ pênmin.’ 20Ahan haa wanthe pa hûlahma ngatwah, ‘Tângte, nang kem ngunpha pa anã; ngama khetnâng sitlekma huhthienwah. 21Nga nangran chei rekãng, chenrãngma ngako nanga nyahrãng mihchhihjat. Nangma chenpa nangthiak ledanga erepemin kepeko ngale nangma lekhiat leliwah hehmin kepeko.’ 22Tângte pumma atenâng ngatwah, ‘Nanga haachhih! Nangdede jabkhab junko ngama nangnâng echêmsiet e! Nangma ajet nga mihchhihjat ngama, ngale chenpa ngarãng ledanga erepemin ngama rângkep ang ngama, erediko ngama lekhiat leliwah hehmin rângkep ang ngama. 23Ephumma nangma nga ngunpa chenrãngma ngunthien humnâng lethien dangtoh a? Nangma ngunthien humnâng thien lohmeko nga ngakhokko ngunchha demnâng ajah chohminwah.’ 24Erediko erethe kowah chepte hehnâng atema ngatwah, ‘Ate ngewah kem ngunpha pa thaletma wanechhi Cheiteko koh en.’ 25Phumma thinma tângteko ngatwah, ‘Tângte, atenâng wanechhi pa tongajû dangmahne!’ 26Atema dânthâng wah, ‘Ngama nenâng thôkoh eka,’ ‘hennâng chenni komin tongeka, ereko ajah lêkohmin; rohkomin hennâng chennimin aho dangeka, atema chenni cheieka erepemin toanchhoan rêmin. 27Ade dangeka, Nga thin lowang rãng dângthuk lehunte ngaran heh aretheko siethu letma nga tâko ritphe en!’ ”

Tajien Lahma Jeroselem nâng Hok

(Mt 21.1-11; Mak 11.1-11; Jhn 12.12-19)

28Jisu ma arepa ngatdiko, thin mathah pumma Jeroselem nâng dânwângwah. 29Ate Oliv hahho kowah batphas ngale Bathani hahko hokko, atema khemanâng dijunte wanii chienwên lâwah 30Atema are ngin heh thôko lahma chienwên lâwah: “Nema wah hahdaangko wãngla en; eko nema Gado chha mihnyan henjô mathat chhang thietlahma echohkhe en. Erepa jânletma anâng sietkatrên. 31Henma komin chenrãng jân eken a ngama methongpha hènko, atenâng Teso ma arepa#19.31,34 Teso ma; ba ate tângte. lemeka ngama thôkoh en.”

32Wãng lahma thinnâng Jisu ma chenroh thôkotah a eroh chohkhe wângwah. 33Thinma Gado chhapa jân thuko, tângte pumma ngatwah, “Chenrãng jân eken a?”

34“Teso ma#19.34: Teso ma; ba ate tângte. lemeka,” ngama thinma dânthâng wah, 35Ngale thinma Gado chhapa Jisu tânâng sietkat kohwah. Erediko thinma khet ekhu heh Gado khohko kêmwên lahma chhangthuk wah. 36Jisu Gado khohko chhang lahma khôamko, mihnyan hehma thin khet heh lemko kêmwah.

37Chenthu Jeroselem kêwah Oliv hahho nâng jâkhôam katthin lemtheko hokko, ate dijunte jahmõang dangtah hehma chentô moatlem dong patritli heh khelahma Joban nâng chaanmõang raklahma rôwah: 38“Teso mînko hokte lowang ko Joban ma rangkoh eka! Rangkhethung nâng mêmo dangeka ngale Joban mîn dongthuk eka!”

39Erediko mihnyan heh chhangwah Farasi hehma Jisu nâng ngatwah. “Hethôte” “Nang dijunte hehnâng kihchepchep tôngrãng chien o!”

40Jisu ma dânthâng wah, “Ngama nenâng thôkoh eka, areheh mekihtong ako, long hehma ehongrak a.”

Jisu Jeroselem Rãngma Sep

41Ate Jeroselem tâko hokkhoam rienrien, Jeroselem pa khelahma sep rewah, 42Atema ngatwah, “Thejâ nema chenroh mêmo jiendângmin a erepa jetngako chentôsên dângmin wah a! rohkomin athângheh erepa khemet! 43Neran hehma netumlitko panhoan lahma chentô suk anoangma nelemtek lahma kôam sanpoat pa ehûra. 44Thinma nemin erediko ne mihnyan heh phangtang eritphehèn; longphang phangthemin khohkhoh petpet thintheko letong tumin, chenrãngma ngako Joban ne pepângrãng katha sanpoat pa nema jetmet!”

Jisu Rangsoamhum nâng Wâng

(Mt 21.12-17; Mak 11.15-19; Jhn 2.13-22)

45Erediko Jisu Rangsoamhum nâng wãng lahma erekowah phinseng thãsengte heh junloatwah, 46Thinnâng ngatwah, “Joban ma aroh jablahma Joban nyapraang nâng raangeka, ‘Nga Hum pa Rangsoamhum ngama ngatmin.’ Rohkomin arepa nema ahuhte heh huhtông thin therãng hôan eken!”

47Rangwo roakweih Jisu ma Rangsoamhum ko hethô wah. Soam aroakte adong, Niemarang hethôte, ngale khhepho phannang hehma Jisu ritphe rãng hunwah, 48Rohkomin thinma jienritpheho, chenrãngma ngako mihnyan heh phangtang Jisu jabkhab khabthemin lienphe lehun thangma jetat hunwah.

Currently Selected:

LUK 19: NOKTBSI

Highlight

Copy