MARK 8

Jisui Haja Ali Ühyingpü

(Mt. 15:32–39)

1Hathü nyih kü mechem khongnyü longpü hük meheyao hahhen neshiüi nyupa, büpai laophülei nanglomthü kü nyükei jomphong kü, 2“Ngei khong kü shinshangei deihnyüke; mehenangkü jomphong shaang thahshi nyih jempabü ngei mü nyunyu khih, hatü hahhen meheyao neshiü. 3Aeidaitü ngei hathü jomei shemei leishihjema, jom lemei shomeiyinghen; haneiyü tailu leipü peiküpü khih” shei e.

4Büpalei nanglomthüi, “Mekei etü shennyak hüki jahpanei hajükpü khongnyü kü ühyingaokhen?” shei e. 5Büpai jomphong kü, “Amphongei aan meshük nyüpa?” shei phe. Jomphongi, “Nyet nyüke” shei e. 6Hahepak kü büpai khongnyü kü kahdokei uohen e, hatü büpai aan nyet yah-ei menvih shuohpheikü ha bhaoktü büpalei nanglomthü kü bhehen shingvaishi shuoh; hatü jomi khong kü bheteke. 7Shao jomei nyah maani nyu, hatü ha kü moihiman pheikü büpai hathüao bhetuh shei e. 8Jomi moh-ei hah, hatü jomi aopünyeipü phuohinu thaishingkü mühdow nyet maei nyu. 9Halei shennyak haja ali hükshing nyuteke. Büpai jom leitükkem. 10Shülangi büpai nanglomthü mü ai mongei shü, hatü Dalmanutha lemei heihdai.

Yashanyale Dou

(Mt. 16:1–4)

11Phariseethü peiyei büpa mü shah dakteiyei büpa kü dokei vangsho leipü yashanyale dou hük yüteke. 12Büpai ngülu heetü, “Mehekei hapa den shennyakthüi yashanyale yünya? Ngei hingmei am kü enyeih, hapa den kübü shennyakthü kü mepa yashanyale dou-ao nehupih” shei e. 13Büpai jom tuhtü shao ai mongei shütü lebü yungdangei heihdai.

Pharisee hatü Herodei Daw

(Mt. 16:5–12)

14Shaang nanglomthüi hahying kohen betük, hatü ailei jom mü aan hük mon nyu. 15Shaang büpai jomphong kü, “Ammi Pharisee am hatü Herodei daw kü lituh” shei lihen shah e. 16Jomphong hüki hük mü, “Hayü jen hahying neshiüpü nangkü enyu khih” shei etei. 17Ha nyingei Jisui jomphong kü, “Ammi hahying neshiüpü jung mehekei eteinya? Ammi shaang thahshi ne-ee, hatü nenyingnyu je? Amphongi nedeih-aoknyu je? 18Amphongü mük kohtü ne-eeaoknyu je? Dhaong tuhtü nedanaoknyu je? Amphong kü nedeihkünyu je? 19Ngei shennyak haja nga shingvaishi aan pha nga bhaokei ühying shingkü amphongi aopünyeipü phuohinu mühdow meshük thaipa?” Jomi büpa kü, “Mühdow anpünyi” shei e, 20hatü ngei shennyak haja ali shingvaishi aan nyet bhaokei ühying shingkü aopünyeipü phuohinu mühdow meshük thaipa? Jomphongi büpa kü, “Mühdow nyet” shei e. 21Hahepak kü büpai jomphong kü, “Amphong shao-üng nenyingnyu je” shei phe.

Jisui Bethsaidalei Mükphüngpa Meihüpü

22Jomphong Bethsaidalei pei, hatü shennyak hanei-i büpa touei mükphüngpa hük müei peiyei büpalei mük kü hongtuh shei büpa kü khüm. 23Büpai büpalei lak kü düktü ching kübü yanei deitü büpalei yien yah-ei mük kü nyio, hatü büpa kü büpalei laki shüngtü, “Nüngi meheyao eenyüla?” shei phe. 24Hapa shennyaki ngangei veitü, “Ngei shennyakthü eenyüke, shejao pü kamteipükei eenyüke” shei e.

25Jisui shao büpalei laki hapa shennyakei mük kü düktü hüngei vei, hatü büpalei mük meidai, hatü büpai lemphü lekei ee. 26Hapheikü büpai büpa kü, “Chingei nyokei telei”#“Chingei nyokei telei, hatü üpa kao ha jung te-e” shei lai haneilei eehen. shei etü shemei leishihteke.

Peteri Jisu Nang Epü

(Mt. 16:13–20; Lk. 9:18–21)

27Jisui büpalei nanglomthü mü Kasarea Philippi kahdok leipü chingthülei dai, hatü dailemei Jisui nanglomthü kü, “Shennyakthüi ngei kü üpa khih shei eteinyüke?” shei phe. 28Jomphongi büpa kü, “Hanei ami nüngü Johan baptükbü shei, hanei ami Elijah khih shei, hatü shao hanei ami thibüthü khongkü hük khih shei eteinyüke” shei e.

29Büpai jomphong kü, “Shejema amphongiyao ngeiyü üpa khih shei enya?” shei e. Peteri, “Nüngü Khrista”#“Messiah” sheiyao eehen. shei jangei e. 30Büpai jomphong kü büpa jung üpa kao ne-ehen ngeükhüam wongmü shuoh.

Jisui Büpa Dihen, Yangei Leihen Jung Epü

(Mt. 16:21–28; Lk. 9:22–27)

31Hapheikü büpai jomphong kü nyuhhen pangei, Shennyak Ha longi shangponghen hatü behethü, ngongpathü hatü shahkung nyuhbüthüi büpa yaktükhen, hatü jühen, hatü nyih jem pheikü yangei leihen. 32Büpai ngaiyei ha e, hatü büpai Peter khaatei deitü büpa kü lohhen pang. 33Shejao büpalei nanglomthü philei yaakei veitü büpai Peter kü loh, hatü, “Kahshih, lüdaituh! Nüngei mongei Kahvangei dou nevai, shennyakei douthü deihshi nyüke” shei e.

34Büpai khongnyü kü büpalei nanglomthü mü nyükei jomphong kü, “Hanei ami ngei phei mühüjema, laophü nyingi maanpü leituh, hatü laophülei shophang paitü ngei pheilei mükei. 35Mehenangkü üami laophülei yangnyu yanghünya, mahhen, hatü üami ngei shingvaishi hatü shahjangmei nangkü laophülei yangnyu mahnya, yanghen. 36Shennyak hüki kahdoknyü kemei aoktü laophülei yangnyu mahtükjema mehe nanglei nyüpa? 37Nevaijü shennyak hüki laophülei yangnyu nangjei mehe shuohhen? 38Hanei ami hapa mükbongjuyung hatü mang shennyakthü den kü ngelei men hatü ngelei shah kü vin nedejema, Shennyak Ha Palei müknyinshekhang kü daülangpü vangsho phongshanthü mü yiüshingkü jom shingvaishi vin nedehen” shei e.

Currently Selected:

MARK 8: PHOMBSI

Highlight

Copy