LUK 9
9
Anpünyi kü Kangpü Dousho
(Mt. 10:5–15; Mk. 6:7–13)
1Hapheikü Jisui anpünyi chemi nyüktü jomphong kü kahshih peü shak kü hatü dinlem peü meihen wong hi ngan shuoh, 2hatü büpai jomphong Kahvang ongching baonghen hatü tüngpü meihühen shom. 3Büpai jomphong kü, “Ammei yendai kü meheyao teyah; lenshuoh, nevaijü khoungha, nevaijü hahying, nevaijü lop nevaijü bhagthuh dangkao nyeinya teko. 4Mepa shemei am shühenshang hapa shing kübü mangdai thahshi halei nyutuh. 5Melei melei jomi am mongongshi neyahhen, jom khüei denpü vaishi am hapa shing kübü lüdaishingkü la kübü kübhih kaongei tuhphongtuh” shei e. 6Hanangkü jom layaongei ching hük kübü hük shei shahjangmei chongvenei hatü peülei tüngpüthü meihüei dai.
Herod Mongngapü
(Mt. 14:1–12; Mk. 6:14–29)
7Mechem Herod vanglem lembüi vamei peipü douthü jung danpa, büpa mongongteke. Mehenangkü hanei ami jütükpü Johan yangei leiteke shei e, 8hatü hanei ami Elijah vamei nyüke shei e, hatü hanei ami meyangpü thibüthü khongkü hük vamei nyüke shei e. 9“Johanü ngei shangjing dakei jütükpeih, shejao ngei hapa keipü douthü vampü danhen mü hayü üpaang?” shei Herodi e, hatü büpai büpa kü veihen khe.
Haja Nga Ühyingpü
(Mt. 14:13–21; Mk. 6:30–44; Jn. 6:1–14)
10Mechem jom nyokei leipa, phongshanthüi Jisu kü jomi dükpü jung peü ejateke. Büpai jomphong büpa mü lomei chingnyü hük Bethsaida shei epülei müei dai. 11Mechem khongnyüi ha danpa, jomphongao büpa phei mü, hatü büpai jomphongao mongongshi yah, hatü jomphong kü Kahvang ongching jung eshuoh, hatü tüngpü meihahhüpüthü meishuoh.
12Om dhüdaiyaki anpünyi büpa touei peiyei eteke: “Khongnyü yanei shinpü chingthülei leiyei hahying hatü paümhen shing nyemyemhahnüng leishihtuh; mehenangkü jenphongü phaülulei nyüke” shei e.
13Shejao Jisui jomphong kü, “Jomphong kü hahhen lemhük yah-eishuoh” shei e. “Jenphongei aan pha nga hatü nyah nyi mü lenei jeni daiyei hathü nanglak peü shing neshakpheikü meheyao nyeinya neshiü” shei jomphongi e. 14Mehenangkü halei shennyak haja nga hükshing nyu. Büpai büpalei nanglomthü kü, “Jomphong ieyei pinyipüan an uohütuh” shei e. 15Jomi hapakei dük hatü jom peü uohü. 16Büpai aan pha nga hatü nyah nyi yah-ei vangsho philei ngangei veitü moihiman hatü bhaok, hatü khongnyü kü bhehen büpalei nanglomthü kü shuoh. 17Jom peüi moh-ei hah. Hahtü aopü phuohinu thaishingkü mühdow anpünyi nyuteke.
Peteri Jisu Nang Epü
(Mt. 16:13–19; Mk. 8:27–29)
18Nyih hük mechem Jisu monha phopei nyupa, büpalei nanglomthü büpa touei pei. “Khongi ngeiyü üpa khih shei eteinyüke?” shei büpai jomphong kü phe.
19“Hanei ami Johan Baptükbü shei enyüke, lebüthüi Elijah shei, hatü shao lebüthüi meyangpü thibü hük yangei leipü khih shei eteinya-ai” shei jomphongi jangei e. 20Büpai jomphong kü “Shejema amphongiyao ngeiyü üpa khih shei enya?” shei e. Peteri, “Nüngü Kahvang Ha Khrista”#Messiah shei e.
Jisui Büpa Dihen hatü Yangei Leihen Enyüke.
(Mt. 16:20–28; Mk. 8:30—9:1)
21Jisui jomphong kü ha üpa kao te-e shei wongshongi ngeükhüam shuoh. 22Büpai, “Shennyak Ha shangpong longpü homei daihen, hatü behethü, ngongpathü hatü shahkung nyuhbüthüi büpa yaktükhen, hatü jühen, hatü nyih jempabü kü yangei leihen” shei e.
23Hapheikü büpai jomphong kü ha eteke: “Hanei ami ngei phei müpü am leihüjema, büpai laophü nang betüktuh, hatü nyihjeih büpalei shophang paitü ngei pheilei mükei. 24Mehenangkü üpai laophülei yangnyu yanghünya, mahtükhen, shejao üpai laophülei yangnyu mahtüknya, yanghen. 25Shennyak hük kahdoknyü kemei shakeishen pheikü laophülei yangnyu mahtükjema mehe nanglei nyüpa? 26Shennyak hanei-i ngei hatü ngelei shah nangkü vin nedejema, mechem Shennyak Ha laophülei müknyinshekhang hatü Palei müknyinshekhang kü daülangpü vangsho phongshanthü mü yiühenshang, büpa shingvaishi vin nedehen. 27Shejao hingmeipa ngei am kü enyeih, Kahvang ongching mang-ee thahshi dipü neponghen hanei am hatouei yaongshi nyüke.”
Hangbong Jeipü
(Mt. 17:1–8; Mk. 9:2–8)
28Shaang hathü epheikü nyih shet hükshing angtü Jisui büpa mü Peter, Johan hatü Jakob hathü müei kahshangei phopnüng aong. 29Mechem büpa phopei nyupa, büpalei dhe veihen jeileidai, hatü büpalei büm-ow klang nyeppükei nyaei lei. 30Ngangahük kü jomphongi shennyak nyi, Mosa hatü Elijah nyi büpa mü shah eteiyei ee. 31Jiji müknyinshekhang kü vamei büpai Jerusalemei dipü homei dhaümhühen nang etei. 32Shaang Peter hatü büpalei küphüthü mükhet dhaongei nyu; shejao mechem jomphong mük thaapa, jomi büpalei müknyinshekhang hatü büpa mü yaongpü shennyak nyi ee. 33Jiji büpa toueipü lüdaiyaki Peteri Jisu kü, “Shembüpa, jenphongü hammü nyuhen meihen khih; hamphongi tap jem veshah, hük nüng shing, hük Mosa shing, hatü hük Elijah shing” shei büpai mehe enya, ha nenyingi eteke.
34Mechem büpai ha eyei nyupa, phum peiyei jomphong dhümlang, hatü phum mongei shüshingkü jomphong nyemteke. 35Hahepak kü phum leipü ngeü hük vamei, “Hapayü ngei bampü Ha; büpai epü bangtuh” shei e. 36Mechem ngeü vamei epa, Jisu monha yaongshi ee, hatü hathü nyih kü jomphongi mehe eepa, ha üpa kao meheyao ne-e-i nenmü nyu.
Jisui Mang Laanghai Yeppü Hashih Hük Meihüpü
(Mt. 17:14–18; Mk. 9:14–27)
37Nyihphei mechem jomphong kahshang leipü leipa, khongnyü longpü hük büpa mü pong. 38Hahepak kü khong chi kübü shennyak hüki, “Nyuhbü, nüngi ngelei hapeü kü veiphahen khümnyeih; büpayü ngelei halom hih. 39Ngangahük kü mang laanghai büpa yep, hatü büpa ngangahük kü vaüteke. Büpa büm haenei ju kü yung-op vam. Hapa mang laanghai büpa kü shüvei, hatü nedaihen mü nyu. 40Ngei nüngei nanglomthü kü ha changhen eshuohpeih, shejao jomi ne-aokpeih” shei e.
41Jisui, “Oh hingnelempü hatü nyongdaipü den, ngei meshük lushi am mü nyukahen hatü nenteiaokhen? Anha hatouei deikei” shei e.
42Büpa heihyaki kahshih-i büpalei büm haenhütü kahdokei doei shükteke, shejao Jisui mang laangha kü lohtü ha naü meihü, hatü chepa kü büpa nyokei shuoh. 43Kahvangei longpü ngan eetü peüi yashan.
Jisui Büpa Dihen Shao Enyüke
(Mt. 17:22–23; Mk. 9:30–32)
Mechem shennyakthüi büpai dükpü douthü kü yashanei nyupa, büpai büpalei nanglomthü kü e, 44“Hathü shah ammei dhaongei shühahtuh: Shennyak Ha shennyakthülei lak kü lanei shuohtükhen.” 45Shejao ha mehe lappa, jomi nenying; hapa lappü jomi neyepaokhen mü jom kübü joei nyuteke, hatü jomi ha jung phehen nyemei nyu.
Peü Mü Longpü Üpaang?
(Mt. 18:1–5; Mk. 9:33–37)
46Jomphong khongkü peü mü longpü üpaang shei shah dakteiyei pangteke. 47Shejao jomphongi deihpü nyingei Jisui maanpü hashih hük deiyei büpa touei yaonghütü, 48jomphong kü, “Üpai ngelei men kü hapa naü maanpü yahhenshang, ngei yahnyüke, hatü üpai ngei yahnya, ngei shompüba yahnyüke; mehenangkü amphong khongkü peü mü maanpübayü peü mü longpüba” shei eteke.
Lebüthüi Mang Laanghathü Changpü
(Mk. 9:38–40)
49Johani, “Shembüpa, shennyak hük nüngei men kü mang laanghathü changei hamphongi eepeih; büpa jen mü ne-ompü nangkü hamphongi büpa dohhühen khepeih” shei e. 50Shejao Jisui büpa kü, “Büpa tedohhü; mehenangkü üami am khüei nenyu hayü amphong shing hih” shei e.
Samaria am Ching Hüki Jisu Neyahpü
51Mechem büpa vangsholei anlanghen nyihthü yoei peipa, büpai Jerusalemei heihhen layaong. 52Büpai büpa shekü phongmokbüthü shom. Jom lemei daishingkü jomi büpa shing temhen Samaria am ching hükei shü; 53shejao jomi büpa neyah; mehenangkü büpa Jerusalemei daiteke. 54Mechem büpalei nanglom Jakob hatü Johan nyi-i ha eepa, jiji-i, “Shembüpa, henjinyi-i#Lai haneilei, “Elijah-i dükpükei” shei eehen. vangsho leipü aw yiüei hathü shamtüknünga?” shei e. 55Shejao büpai yaakei leiyei jiji kü loh. 56Hapheikü jomphong lebü ching hükei dai.
Jisu Phei Mühüpüthü
(Mt. 8:19–22)
57Jomphong lemei daiyei nyushingkü hanei ami büpa kü, “Nüng melemei daihenshang ngeiyao müküshah” shei e.
58Jisui büpa kü, “Mahuthü dung nyüke, hatü shangouhathü jep nyüke; shejao Shennyak Ha laophülei shangjing haühen shing neshiü” shei e.
59Lebü hük kü büpai, “Ngei phei mükei” shei e. Shejao büpai, “Shembüpa, ngei leiyei opalei mahng shong vütükkeih” shei e. 60Shejao Jisui büpa kü, “Dipüthüi jomei mahng nyemvühah, shejao nüng payü daiyei Kahvang ongching baongtuh” shei e.
61Lebü hüki, “Ngei nüng phei müküshah, Shembüpa, shejao ngei shemei nyupüthü kü shong nyu-e shei etükkeih” shei e.
62Jisui büpa kü, “Üpai hanshong kü laki düktü ngaümphei lemei yaakei veihenshang Kahvang ongching kü nechang” shei e.
Currently Selected:
LUK 9: PHOMBSI
Highlight
Share
Copy
Want to have your highlights saved across all your devices? Sign up or sign in
Phom Naga Bible - DAÜLANGPÜ LAIHING
Copyright © 2005 by The Bible Society of India
Used by permission. All rights reserved worldwide.
