LUK 10

Pejempüan kü Kangpü Dousho

1Hapheikü Shembüpai lebüthü jom pejempüan#Lai haneilei, “Pejempüanpü nyi” shei eehen. jetü büpai daihen shei deihpü jila hatü peülei büpa shekü nyi nyi shom. 2Büpai jomphong kü e, “Hah meandaiteke, shejao nanglak maani mon; hanangkü büpalei kahlei kahling am shanshihtuh shei kah shembüpa kü yütuh. 3Daituh, ngei amphongü shuw chi kü mithü kei shomnyeih. 4Ammi loptuw, nevaijü khoung, nevaijü lathuh teko, hatü lemei üpa kao selam teshih. 5Mepa shemei am shühen, shongei, ‘Hapa shem kü chingmei nyutuh!’ shei etuh, 6hatü halei chingmei kü bampü shennyak nyuküjema nüng leipü chingmei büpa kü nyuhen; hei nevaijema nüngei nyokei leidaihen. 7Jomi mehe yahphahenshang hah-ei yingei ha shemei nyutuh; mehenangkü dou dükbü-ü nanglat danghen jiüpeih. Ammi shem hük kübü hük shei telongtei. 8Mechem am jila hükei peihen, hatü jomi mongongshi yahhenshang, am kü mehe temei shuoh, ha hahtuh. 9Haleipü tüngpüthü meihütuh hatü jom kü, ‘Kahvang ongching am yopailei nyüke’ shei etuh. 10Shejao mechem am jila hükei peihen, hatü jomi am mongongshi neyahjema, jomei chingyangshongei daiyei, 11‘Ammei jila leipü hamei la kü ghapü kübhih-ao am khüei kaongei tuhnyeih. Shejao ha nyingtuh: Kahvang ongching am yopailei nyüke’ shei etuh. 12Ngei am kü enyeih, hapa jila leimeyü hapa nyih kü Sodom am kü-üng nyeinya phahjihen.”

Hingnelempü Chingnyüthü

(Mt. 11:20–24)

13Am Khorazin am onyükei! Am Bethsaida am onyükei! Mehenangkü am kü dükpü ngan dou Tyre hatü Sidon am kü düklangmeyü dhoila ashak ümtü depla nyioei shelei mebü-üng mong lepdaitü nyuhah shepeih. 14Shejao shahphen shingkü am leimeyü Tyre hatü Sidon am kü-üng nyeinya phahji huhen, 15hatü am Kapernaum am, am vangsho thahshi aonghen deihnyu je? Nevai, amü molo awlei shükei shanshihhen.

16Üami ammi epü bangnya, ngei epü bangnyüke, üami am yaktüknya, ngei hatü ngei shompüba yaktüknyüke.

Jom Pejempüan Nyokei Leipü

17Pejempüan#Lai haneilei “Pejempüanpü nyi” shei eehen. mongongshi nyokei leiyei, “Shembüpa, nüngei men kü kahshihthü dangkao hamphongi epü bangküpeih” shei e. 18Büpai jomphong kü, “Klang keiha vangsho leipü Satan vüpü ngei eepeih. 19Veituh, ngei amphong kü biü hatü yiüjikaungkang, hatü vepathülei ngan peü shak kü la-i shouphen wong shuohtepih, hatü mepaiyao am kü ma neshahühen. 20Shejoongpa, mang laanghathüi amphong kü bangpü nangkü mongte-ong, shejao vangsholei ammei men nyangei nyupü kü mongongtuh” shei eteke.

Jisu Mongongnyüke

(Mt. 11:25–27; 13:16–17)

21Hapa hepak kü-üng Jisui Laangha Daülangpü kü mongongei e, “Ngei nüng vihnyeih, Opa, kahdok vangsho Shembüpa; mehenangkü nüngi hathü dou kon kohpü hatü nahpülangpüthü kübü jolangtü aküngnaühathü kü shakei vamhüteke; hih, Opa, hayü nüngi mongpü nyuteke. 22Opai ngei kü douthü peü lanei shuohteke; hatü Pa mü lenei Ha üpaiyao nenying, nevaijü Ha mü lenei hatü Ha-i büpa shakei vamhühen jepüba mü lenei üpaiyao Pa nenying.”

23Hapheikü nanglomthü philei yaakei leitü büpai jomphong kü lomei e, “Ammi mehe ee, ha eepü mükthü moihiman! 24Mehenangkü ngei am kü enyeih, thibü hatü ongthü longi amphongi mehe ee, ha eehüei nyupeih, shejao jomi ha ne-ee, hatü ammi mehe dan, ha danhüei nyupeih, shejao jomi ha nedan.”

Meipü Samaria ami Shahlappü

25Shan hük shahkung nyingbü hük Jisu kü dokhen yaong. “Nyuhbü, vanyangyem danghen shingvaishi ngei mehe dükhenang?” shei büpai phe. 26Büpai büpa kü, “Shahkungnyülei mehe nyangei nyüpa? Nüngi halei mehe iepa?” shei e. 27Büpai, “Nüngi Shembüpa, nüngei Kahvang kü nüngei mong kempai, nüngei laangha kempai, nüngei wong kempai, hatü nüngei mongdeih kempai; hatü nüngei chingyow kü laophü kü kei bamtuh” shei jangei e. 28Büpai büpa kü, “Nüngi jiüpü shahnyok shuohteke, ha düktuh, shejema nüng yem nyuhen” shei e.

29Shejao büpai laophü nying dahshakhü, hanangkü büpai Jisu kü, “Ngelei chingyowpa üpaang?” shei phe.

30Jisui jangei e, “Shennyak hük Jerusalem leipü Jerikolei yiü, hatü büpai gühpathü pongei büpalei ashakviha peü aetlangtü khih mü bheitü mahng kei shükphongtü lüdai. 31Shaang ngongpa hük hapa lem kü dai, hatü mechem büpai büpa eepa, büpai lebü lemei keüei lüdai. 32Hapa keiha Levi am hük hapa shing ngoijü büpa eeyei lebü lemei keüei lüdai. 33Shejao Samaria am hük yendai shingkü büpa yopailei pei, hatü büpai büpa eeyei mong nemei-i deih. 34Büpai büpa touei heih-ei mainga-i phu, hatü yiü langtü makaw kü shateke. Hapheikü büpai laophülei gadu kü büpa uohütü shem hükei müei daiyei büpa kü jung. 35Nyihphei büpai lop nyi ngaiyei shem shembü kü shuohtü, ‘Büpa kü jungtuh, hatü ngei nyokei leijü ammi mehe nyeinya tük, ha kü ngei shemphahen’ shei e. 36Hathü jem khongkü gühpathülei lakei shüpü shennyakei chingyowpayü üpa khih shei nüngi deihnyüke?”

37“Büpa kü phahji hupü shennyak” shei büpai e. Jisui büpa kü, “Daiyei hapakei düktuh” shei e.

Jisui Martha hatü Mary Nyi Thümpü

38Shaang jomphong lemei daiyei nyushingkü büpa ching hükei pei, halei Martha shei menpü nyüha hüki jomei shemei büpa ngoihü. 39Mary shei menpü pinnyülei chenaüi Shembüpalei la tüngei uotü büpai ejapü bangei nyu. 40Shejao Martha payü dou longi nyupü nangkü nang nekoh-i nyu; hanangkü pinnyü heih-ei büpa kü, “Shembüpa, naüpeüi dou kemei ngei kü mon dükhen tuhphongtü nyudaipü nüngi ne-eenyu je? Ngei kü sheühhen eyeishuoh” shei e.

41Shejao Shembüpai pinnyü kü e, “Martha, Martha, nüngü dou longi nyupü nangkü mongshangei nang nekongi nyunyüke; 42shejao dou hük mon nanyüke. Mary-i meipüba hean jehahteke, hatü ha pinnyü leipü neyahlanghen.”

Currently Selected:

LUK 10: PHOMBSI

Highlight

Copy