LUK 2
2
Jisu Bühpü
(Mt. 1:18–25)
1Hathü nyih kü Augustus ongpai kahdoknyü peü kübü men nyanghen shingvaishi ngeükhüam hük shuoh. 2Hapayü shongpü men nyangpü hatü hayü Syria kü Quirinias-i governor vaipü hepak kü nyuteke. 3Shennyak peü laophü laophülei jilalei men nyanghen dai.
4Joseph-ao Galil kahdok Nazareth leipü Judea kahdok kübü David Chingnyü Bethlehemei dai; mehenangkü büpayü David am shahishem kübü phaakpü nyuteke. 5Büpayü men nyanghen shingvaishi büpai yahhen doi phepü Mary mü dai, hatü hapeü anghen ngoidaitü nyu. 6Mechem jom halei nyupa, pinnyüi hapeü anghen hepak ngoi. 7Pinnyüi yeshang hük angei büpa kü ashaki jümtü mohoh hetshung kü lemhü; mehenangkü jom ngoipü khaokei dung neshiüi nyuteke.
Mi Yombüthü hatü Vangsho Phongshanthü
8Hapa kahmükei mi yombüthü yanüng nyak kü mi yomei nyu. 9Hahepak kü Shembüpalei vangsho phongshan hük peiyei jomphong touei yaong, hatü Shembüpalei müknyinshekhang jomphong shinei khang, hatü jomphong nyem. 10Shejao vangsho phongshani jomphong kü, “Amphong tenyem; mehenangkü veituh, ngei am touei nanglak peü shingvaishi mongong longpü shahjang meipü koei peikünyeih: 11Shinnyih David chingnyü kü am touei Yemleipüba, üpa Khrista, #Messiah sheiyao eehen Shembüpa nyüpa, büpa angei nyüke. 12Hapayü am shingvaishi nyangeihepü hük nyukahen: amphongi naü hük ashaki jümtü mohoh hetshungei lemshi eehen” shei e. 13Ngangahük kü vangsho phongshan mü vangsho shanthü khong longpü hük Kahvang men longei eteke:
14“Shaopüba vangsho leipü Kahvang müknyinshekhangtuh,
hatü kahdoknyü kü büpalei phahji nyupü shennyakthü touei chingmei nyutuh.”
15Mechem vangsho phongshanthüi jomphong tuhphongtü vangsholei aongdaipa, mi yombüthü hüki hük mü, “Jeni shaang Bethlehemei daishah hatü Shembüpai jen kü nyinghüpükei mehe dou vampa, ha kü jeni veishah” shei etei. 16Hanangkü jomphong mokei daijashingkü Mary hi Joseph nyi hatü naü mohoh hetshungei lemshi ee. 17Mechem jomi ha eepa, hapa naü nang jomphong kü mehe eshuohpa, ha jung baongeiyaüei e; 18hatü mi yombüthüi jomphong kü epü danpüthü peüi thama. 19Shejao Mary-i hathü shah peü mongei chüloh-i jaoei tuh. 20Jomphong kü epükei mi yombüthüi hathü peü danei eepü nangkü jomi Kahvang müknyinshekhangei men longei nyokei lei.
Jisu kü Men Menpü
21Nyih shet peihpheikü naü kü shuw japhen hepak ngoi, hatü büpa naü uoshingei mangko shekü vangsho phongshani shuohpü men keiha büpa kü Jisu shei menteke.
Jisu Phopshemei Deipü
22Mosa shahkung kü nyupükei mechem jom daühen hepak ngoipa, jomi büpa Jerusalemei Shembüpa kü lanei shuohhen yah-ei an, 23(Shembüpalei shahkung kü, “Shongpü hashongpathü peü Shembüpa kü daühütuh” shei nyangei nyupükei dük), 24hatü Shembüpalei shahkung kü, “Adhuba jora hük nevaijü khakhi ouha nyi” shei nyangei nyupükei jomi jakpü moila shuoh.
25Shaang Jerusalemei shennyak hük meni Simeon shei mentü nyu; hapa shennyakü daülangpü hatü Kahvang nyempü shennyak, Israel am nyiushem meihühen omdanei nyu, hatü büpa kü Laangha Daülangpü bak. 26Büpa kü Laangha Daülangpü homei büpai Shembüpalei Messiah mang-ee thahshi büpa nedipih shei shakei vamei eshuoh-ei nyuteke. 27Laanghai müei Simeon phopshemei pei, hatü mechem nyühipai shahkung kübü vanglem aimü büpa kü dükhen yah-ei nyujapa, 28Simeoni laophülei lakei yah-ei paümtü Kahvang men vih-ei e:
29Jeiyong Shembüpa, nüngi lahpükei shaang nüngei
chongphobü nyiushemmei kü dihütuh.
30Mehenangkü ngelei müki nüngei yemleipü eetepih,
31hayü nüngi nanglak peü nyushi tempeih,
32Kung am shakei vamhühen shingvaishi vangngai,
hatü nüngei Israel nanglak shingvaishi müknyinshekhang.
33Naüei chenyü chepa nyi-i naü nang mehe e, ha danei thama. 34Hapheikü Simeoni jomphong kü moihimanei chenyü Mary kü, “Hapa naü-ü Israel kü longshi shing dohühen, hatü phukhen nyangeihepü hük vaihen nangkü jepeih, 35shejüang longshi shingi mongei deihpü shakei vamhühen, hatü ammei mongdang kü aokpü yanlui kei vethen” shei e.
36Halei Asher am phang Phanuelei yiükha Anna#Anna kü “Hanna” sheiyao eehen. shei mentü thibülanyü hük nyu. Pinnyü longi behe leidai; pinnyü shem yempheikü chepaha mü bong nyet nyu, 37hatü pinnyü bong büalipüali ngoipü thahshi vaümnyü nyuteke. Pinnyüi mechemao phopshem leipü nedai shejao halei nyakhingai thüngei shüaeiyungleyei phopei khümei nyu. 38Hahepak kü pinnyü peiyei Kahvang kü menvih shuoh-ei hatü Jerusalem yemleihen nangkü omdanpüthü peü kü hapa naü jung eyei nyu.
Nazarethlei Nyokei Leipü
39 Shembüpalei shahkungi yüpü lemphü dükei tempheikü Galil kü jomei jila Nazarethlei jom nyokei lei. 40Ha naü long, hatü wong koh-ei kihikoni maei nyu, hatü Kahvang phahji büpa kü nyu.
Hashih Jisu Phopshemei
41Shaang bong ieyei chenyü chepai Jerusalemei Hompü Mo kü peihamteke. 42Mechem büpa bong anpünyi lompa, nyingnyoi kü kei jomphong molei dai. 43Mechem mo dohpa, jom nyokei leihen layaong, hashih Jisu-ü Jerusalemei nelei-i nyu, shejao chenyü chepai ha nenying. 44Jom chemi yen daipü khong mü nyüpeih shei deihshi jom nyih hük lem kü leiyei nyu. Hapheikü jomi shem am hatü küphüthü mü büpa nyüla shei yemhen pang. 45Jomi büpa nedangpü nangkü jom Jerusalemei büpa yemnüng nyokei lei. 46Nyih jem pheikü jomi büpa Jerusalemei nyuhbüthü mü uoshi jomphongi epü bangei hatü shah pheteiyei nyu, 47hatü büpai epü danpüthü peüi büpalei kihikon hatü büpai shahnyok shuohpü kü yashanei nyu. 48Mechem chenyü chepa ami büpa eepa, jom thama. Chenyüi büpa kü, “Hapeü, mehekei nüngi henji kü hapakei lingnya? Ampa henji longi mongshangei nüng yemei nyupeih” shei e. 49Büpai jiji kü, “Anjinyi-i mehekei ngei yempa? Ngeiyü Opalei shemei nyuhen shei anji-i nenyingpü je?” shei e. 50Shejao büpai mehe e, ha jijinyi-i nenyingaok. 51Hapheikü büpa jiji mü leiyei Nazareth ngoi, hatü jiji-i epü ven bangei nyu. Chenyüi lemphü mongei jaoshi ang.
52Jisu kihikon hatü bümhishao kü, hatü Kahvang hatü hangku touei bampü kü longteke.
Currently Selected:
LUK 2: PHOMBSI
Highlight
Share
Copy
Want to have your highlights saved across all your devices? Sign up or sign in
Phom Naga Bible - DAÜLANGPÜ LAIHING
Copyright © 2005 by The Bible Society of India
Used by permission. All rights reserved worldwide.
