LUK 18

Vaümnyü hatü Nemeipü Shahphenbü

1Hahepak kü Jisui jomphong kü düngei phophen hatü mong nemahhen vongbong shei shahlap hük eteke. 2“Ching hükei Kahvang nenyempü hatü nanglak kü dhüm nehupü shahphenbü hük nyu. 3Hapa chingei vaümnyü hük nedoh-i büpa touei peiyei, ‘Ngei mü khetbü khüei ngei kü shahhing shahphenshih’ shei ehamteke. 4Kanja shing büpai nemong; shejao pheishi büpa nyingi, ‘Ngei Kahvang kü nenyem hatü nanglak kü dhüm neshuohjao, 5hapa vaümnyüi ngei kü baokpü nangkü ngei pinnyü kü shahhing shahphen shuohhen hih, shejüang pinnyü nedoh-i peiyei ngei nenyiuhühen’ shei deihteke.”

6Shao Shembüpai nedoh-i e, “Hapa shahhing ne-epü shahphenbüi epü bangtuh. 7Kahvangi jelangpüthü büpa kü nyakhingai thüngei lenjü büpai shahhing shahphen neshuohhen je? Büpai jom kü sheühhen kaaei nyudaihen je? 8Ngei am kü enyeih, büpai shülangi jom kü shahhing shahphenhen. Mechem Shennyak Ha peihen, büpai kahdoknyülei hinglempü eehen je?”

Pharisee hatü Lat Thaibüi Lappü

9Hanei ami ham daülangpeih shei deihpü hatü mih kü yaüpüthü kü büpai hapa shahlap eteke: 10“Shennyak nyi phopshemei phopnüng aong, hükü Pharisee am hatü hükü lat thaibü. 11Hapa Pharisee ami büpa mon yaongtü hapakei phop: ‘Kahvang, ngeiyü lebü shennyakthü: gühpa, ten dükpüthü, mükbongjuyungpüthü nevaijü hapa lat thaibü keipü nevaipü nangkü ngei nüng men vihnyeih. 12Ngei hapta kü nyipa shüaeiyungleyei phopnyeih, ngei dangpü peü kübü ankhong shuohnyeih.’ ”

13Shejao lat thaibüi tailei yaongtü, vangsho philei dangkao ngangei nevei-i büpalei jaaba kü daüpei, “Kahvang, ngei keipü mang shennyak kü phahjishih!” shei phop. 14Ngei am kü enyeih, lebü leimeyü hapa shennyakang dahshakei shemei leidai; mehenangkü üami laophü nyingi longpü leinya maanpü leihen, shejao üami laophü nyingi maanpü leihen, longpü vaihen.

Jisui Maanpü Hashihthü Moihimanpü

(Mt. 19:13–15; Mk. 10:13–16)

15Shennyakthüi büpalei laki dangkao nyemhong shei naüjathü yah-ei pei, hatü mechem nanglomthüi ha eepa, jomi hathü kü hapakei nepeihen ngeükhüam mangshi shuoh. 16Shejao Jisui hathü kü nyüktü, “Maanpü hashihthü ngei touei peihütuh, jomphong kü tebangshuoh; mehenangkü Kahvang ongchingü hapa keipüthü shing hih. 17Hingmei, ngei am kü enyeih, üpai maanpü hashih keiha Kahvang ongching neyahhenshang, halei neshüaokpih” shei e.

Vanglem lempü Shemmeipa

(Mt. 19:16–30; Mk. 10:17–31)

18Vanglem lembü hüki büpa kü, “Nyuhbü meipü, vanyangyem danghen shingvaishi ngei mehe dükhenang?” shei phe. 19Jisui büpa kü, “Mehekei nüngi ngei kü meipü shei nyüknya? Kahvang mü lenei üpayao meipü neshiü. 20Nüngi hathü shahkung nyingei nyüke: ‘Nüngi mükbongjuyung tedük; nüngi tejü; nüngi tegüh; nüngi shahshem denpü teshuoh; ampa hatü anyü kü dhüm shuohtuh’ ” shei e.

21Büpai e, “Hathü kemei ngei hashih mebü dükei heihpeih.” 22Mechem Jisui ha danpa, büpai büpa kü, “Shao lemhüki taoei nyüke. Nüngi angpü peü yutü hapa lop taopathü kü shuohtuh, hatü nüng vangsholei mop nyuhen, hapheikü ngei phei mükei” shei e.

23Shejao mechem büpai ha danpa, büpa mongmang; mehenangkü büpa longi shemmei nyuteke. 24Jisui büpa kü veitü, “Mop angpüthü shingvaishi Kahvang ongchingei shühenü meshük wongpüang! 25Hingmei, shemmeipa hük Kahvang ongchingei shülei meyü nyiammet sha kü ut loukei daipü-üng yopüba” shei e.

26Ha danpüthüi, “Shejema üpa yangaokhen?” shei phe. 27Büpai jangei, “Hangku shingvaishi mehe neaokbenüng nyu, hathü Kahvang shingvaishi aokbenüng hih” shei e.

28Hahepak kü Peteri, “Veituh, hamphongi hamei shemthü tuhtü nüng phei müpeih” shei e. 29Büpai jomphong kü, “Hingmei ngei am kü enyeih, üpai Kahvang ongching shingvaishi shem, nevaijü nyüha, nevaijü jeihinaü nevaijü nyühipa nevaijü hapeüthü tuhphongnya, 30hathüi hapa den kao nyeinya nyokei danghen, hatü ngoikahen den kao vanyangyem danghen” shei e.

Jisui Büpa Dihen Jung Jempabü Enyüke

(Mt. 20:17–19; Mk. 10:32–34)

31Hapheikü büpai anpünyi khaatei deiyei jomphong kü eteke, “Veituh, jenphong Jerusalemei aongnyüpa, hatü Shennyak Ha nang thibüthüi epü peü dhaümkahen. 32Mehenangkü büpa Kung amei lak kü lanei shuohhen, hatü büpa kü eelahen, yaühen hatü yu-opi shaohen. 33Jomi büpa kü üppheikü jomi büpa jühen, hatü nyih jempabü kü büpa yangei leihen.”

34Shejao jomi hathü dou jung meheyao nenyingaok; hingmei, büpai mehe e, ha jom kübü jolang, hatü mehe epa, jomi ha neyep-aok.

Jisui Yühahjaiying Mükphüngpa Meihü

(Mt. 20:29–34; Mk. 10:46–52)

35Büpa Jeriko ngoija shingkü mükphüngpa hük lemhaoei yühahei ee. 36Mechem büpai khongnyü daipü ngeü danpa, büpai ha mehe vampa shei phe. 37Jomphongi büpa kü, “Nazareth am Jisu peih-ei dainyu khih” shei e. 38Hahepak kü büpai lenei, “David Ha Jisu, ngei kü phahjishih!” shei e. 39Shelei nyupüthüi büpa kü nenmü nyudaituh shei wongmü ngeükhüam shuoh; shejao büpai nyeishiang lenei, “David Ha, ngei kü phahjishih” shei len.

40Jisui shenei yaongtü hapa shennyak büpa touei deikei shei ngeükhüam shuoh; hatü mechem büpa yopailei heihjapa, büpai büpa kü, 41“Ngei nüng kü mehe dükhahhünya?” shei phe. Büpai, “Shembüpa, ngei shao eehüangke” shei e.

42Jisui büpa kü, “Nüngi eetuh; nüng hinglempai nüng meidaiteke” shei e. 43Ngangahük kü büpai ee, hatü Kahvang müknyinshekhangei büpa phei mü, hatü nanglakthüi mechem ha eepa, Kahvang men long.

Currently Selected:

LUK 18: PHOMBSI

Highlight

Copy